¹ Teguu', kalunaan bangu' ne bekerumun ha' sekeliling-Hia' jung ngering firman Tipang. Teguu' anan, Jisus nekering ha' tepi danau Genesaret. ² dahin nginaang dua' haru' alang tengaah nyandar ha' tepi danau anan, tapi lim nelayan au musang man haru'-haru' anan dahin tengaah mayo jala daha'. ³ Jisus mu'un ha' ji' haru' anum Simon, dahin nyuhuu' Simon jung mendayung haru' na' uk su' man darat. Au anan, Jisus melo' dahin mai pekale kalunaan bangu' man husun haru'. ⁴ Au selesai duaan, Jisus duaan ta' Simon, "Leka'nah ha' ngayan ata'alang halam dahi im pa'ap nah jala ka' jung kelaan masi." ⁵ Simon nyue, "Guru, kame nyadi mahing putung malam, tapi jaan kelaan nun-nun! Tapi, kenan Ika' alang nyuhuu', akui sang ma'ap jala ani'." ⁶ Dahin, teguu' daha' na' ina', daha' kelaan ngahum pate masi' atanng jala daha' nahari' bira'. ⁷ Lalo, daha' mai isyarat ta' kawan-kawan daha' ha' haru' alang bale jung atang dahin nulong daha'. Au anan, atangnah kawan-kawan daha' dahin ngisi' dua' haru' anan dahin masi' atang haru' anan sang tenggelam. ⁸ Teguu' Simon Petrus nginaang gat ani', hia' sujud ha' nang Jisus dahin duaan, "Leka' nah man akui, Tuan, kenaan akui ani' kalunaan alang bedusa!" ⁹ Petrus duaan nnunan kenan hia' dahin lim kalunaan alang peji' hia' merasa takjub ta' ngahum na' masi' alang daha' kela'. ¹⁰ Nunan pun dahin Yakobus dahin Yohanes, anaa'-anaa' Zebedeus, alang bekawan dahin Simon. Jisus duaan ta' Simon, "Am takut. Man kere ni', ika' alang menjala manusia." ¹¹ Au daha' mihir haru'-haru' daha' ha' darat, daha' mela' lim gat dahin ne Jisus. ¹² Ji' do, Jisus te' ha' ji' bua' kuta. Ha' kuta nan, te' ji' kalunaan alang batung na' penuu' kusta. Teguu' kalunaan anan nginaang Jisus, hia' ne sujud atang nang hia' ga' tanaa' dahin ake muhon ta'-Hia', "Tuan, ha' Ika' ikam, Ika' haman menahirkan akui." ¹³ Lalo, Jisus ne mai usu'-Hia' dahin mekam kalunaan anan. Kurin-Hia', "Akui ikam, jadinah tahir." Takjat anan pun, pedam kusta kalunaan anan pueh. ¹⁴ Namun, Jisus pesuhuu' kalunaan anan jung jaan megi' ta' hi' pun dahin duaan, "Te nah dahin im tujokkan nah ika' ta' imam. Persembahkan kurban ta' sayuu' na' ika' kelung alang au ga' suhuu' Musa sebagai bukti ta' daha'." ¹⁵ Daho' tentang Jisus makin tersebar atang ngahum kalunaan atang ngumpol jung ngering Hia' dahin jung na' sayuu' man pedam daha'. ¹⁶ Namun, Jisus peging leka' menyelinap ha' ngayaan-ngayaan ngeram jung te sabayaang. ¹⁷ Teguu' ji' do, Teguu' Jisus tengaah mai pekale, d'kalunaan Farisi alang atang man lim kuta ha' wilayah Galilea, Yudea, dahin Kuta Yerusalem pun melo' ha' tinan. Dahin, kuasa Tanangaan peji' Jisus atang Hia' haman na' sayuu' kalunaan bangu'. ¹⁸ Lalo, ga' kinaang nah kuri' kalunaan menggotong ji' kalunaan mam haman pano ha' husun ngayan tudu' hia', dahin daha' ne usaha geri' hia' mutam dahin melo' kalunaan anan ha' nang Jisus. ¹⁹ Tapi, kenan daha' jaan havung alan jung geri' kalunaan anan mutam kenan kerumunan kalunaan, mu'un nah daha' ha' husun atap dahin ngileh kan kalunaan mam haman pano anan peji' dahin ngayan tudu' hia' ha' tebeluaa'-tebeluaa' ha' nang Jisus. ²⁰ Teguu' nginaang iman daha', Jisus duaan, "Hai hari', dusa ka' au ga' ampon." ²¹ Ahli-ahli Taurat dahin d'kalunaan Farisi nahari' metang-metang, "Hi'kah alang haman mai ampon dusa-dusa kecuali Tipang tua'?" ²² Teguu' Jisus jaam pikiran daha', Hia' duaan, "Na' nun ika metang kelung nunan ha' halam kenap ika'? ²³ No' alang lebi' mele, duaan 'Dusa-dusa ka' au ga' ampon' atau 'Biti' dahin pano nah'? ²⁴ Tapi, sebe ika' jaam bahwa Anaa' Manusia te' kuasa ha' bumi jung mai ampon ta' dusa," Jisus duaan ta' kalunaan alang mam haman pano anan, "Akui duaan ta' ika': Biti'nah, im ju' ngayan tudu' ka' dahin te nim lap."' ²⁵ Takjat anan pun, kalunaan anan temoh nekeirng ha' nang lim kalunaan dahin api' ngayan hia' miri', lalo pano lap sambel memuji Tipang. ²⁶ Lim kalunaan anan merasa takjub dahin memuji Tipang. dahin ga' penuu' ta' rasa takut alang taya' ta' kuasa Tipang, daha' duaan, "Dani' kame' nginaang gat-gat alang luar biasa!" ²⁷ Au anan, Jisus musang dahin nginaang ji' kalunaan pengumpul pajak araan na' Lewi alang tengaah melo' ha' ngayan pemungutan pajak. Jisus duaan ta' hia', "Ne nah Akui." ²⁸ Maka Lewi pun nekering, mela' lim ina', dahin ne Jisus. ²⁹ Au anan, Hia' na' pesta taya' man Jisus ha' uma' na'. Ngahum pengumpul pajak dahin d'kalunaan bale alang kuman peji' daha'. ³⁰ Tapi, d'kalunaan Farisi dahin ahli-ahli Taurat nahari' menggerutu ta' murid-murid Jisus, "Na' nun ika' kuman dahin dui' peji lim pengumpul pajak dahin d'kalunaan bedusa?" ³¹ Jisus nyue dahin duaan ta' daha', "Jaan d'kalunaan alang sayuu' alang perlu tabib, tapi d'kalunaan medam. ³² Akui atang jaan jung muvi' kalunaan laan, tapi jung muvi' d'kalunan bedusa sebe daha' ne tubat." ³³ Daha' duaan ta' Jisus, "Murid-murid Yohanes pembabtis peging puasa dahin sabayaang, nunan pun murid-murid kalunaan Farisi. Tapi, murid-murid Ka' peging kuman dahin dui'." ³⁴ Jisus duaan ta' daha', "Haman kah ika' nyuhuu' lim pengiring pengantin lake' anan masih peji' dahin daha'? ³⁵ Namun, do-do anan sang atang, teguu' pengantin lake' anan ga' api' man daha', dahin teguu' do-do anan nah daha' sang puasa." ³⁶ Jisus pun megi' cerita perumpamaan ani' ta' daha', "Jaan ji' kalunaan pun sang ngebira' ji' putong kain dahin hakaow alang maring jung nambal hakaow alang au dara'. Kenan ha' nunan, kalunaan anan sang na' rusak hakaow alang maring, dahin kain penambal man hakaow alang maring anan jaan sang susok dahin hakaow alang dara'. ³⁷ Nunan pun jaan te' ji' kaunaan pun alang ma'oh anggur maring ha' halam kantong belanit alang dara'. Anggur alang maring anan sang na' bira' kantong belanit alang dara' atang anggur anan ma'oh dahin kantong belanit na' sang hancur. ³⁸ Anggur alang maring harus ga' lok ha' halam kantong belanit alang maring. ³⁹ Jaan ji' kalunaan pun alang au dui' anggur dara', ikam dui' anggur maring kenaan daha' duaan, 'Anggur alang dara' anan lebi' heling."'