¹ Nou atouna maidakaya kata matanya na kawodu-kawodu taka wungana na li peaka larana hi Kristus lappaka ka gehir noungu ta pangadang nama padening, abi hilu jiaha apa duabalija dapa langa rangu a touna naha riada ata woluya na mati, jaka namaninguda lahi Allah. ² Na larana na pataihhu pamanu waingu lima ta katiku, na lara kidi bali nama mati jaka na huku nada taladu muri. ³ Lappaka jiaya napa woluda, ana woakadaka kaloga hi Allah. ⁴ Kadang da jiamaha da tou dama hariabali dama langa peanya nama wahang, langa kolidanyaka nakanyuru nama waling ta awang, da koling padounguna na hangahu hari. ⁵ Nama langa padanya na wini kalung waling lahi Allah, jaka nakanyuru pinutana nama aming. ⁶ Jidinguka ada hilu matakang pakeriya hi Kristus da hilu piak amaha a hilu padua balinya toma ada hariya, kadang ada hilu harika baliya na Ana allah tutu taguda ada pahawawaya ta haga madangu. ⁷ Kadang, na tana nama habiritunya na wei urang, nama purung tapinu tana nama patubu ya nama tubu, nama pakanyuru waina nama rawinya, nakolinya nama ringu-malala walingu lahi Allah. ⁸ Jidinguka a kabata ri kayaka napa patubuna, jaka na tana da eimang gunana, toma patomanya lappaku a tunuya. ⁹ Jidinguka, aku olijaji buha gimi, langka tou noung awima gimi, mawainya einya lahi dimi nama reihi kalung napa manumarawaimi. ¹⁰ Kadang hi Allah da lara jala tiba manigimi dana dengamaja ngara dukada dapa kerami jaka na mila atimi lappaka napa namu gimi tadalu ngarana ami pahalakuya na deitu tidungumi ta tou napa langa papahigiluna, toma taladu hina ami pahalakuya. ¹¹ Napa kabu atima, agana pananya ngarana hatou-hatou kami patekanya na meara marenami kami wainya na ati maningumi toma ta hupu dikina. ¹² Abi noumi tadalu jau, jidinguka kami manudu kami keri haduda waingu ati maning ka kolinya na tutu taguna napa langa patura pajajina hi Allah. ¹³ Tadalu ana tikikiyanatura jajina lahi Abraham, napa rangu waingu ngarana, witi daemangu tou nama reihi jaga waling lahi dunna. ¹⁴ Hi winna : " Ku pamaringu-malalawu " jaka "kupawuahu guja da huhu-anamu. '' ¹⁵ jaka, nama toukarana madeina ana nading hi Abraham nakolinyaka agannanya napa langa peakananya. ¹⁶ Na tou rara ana parangu, nama ru wainya na tou nama reihi jaga ngoduna, walingu ta ihi wikina jaka naparungu jiaya napa maddung waina, nama pahupu-padiki wainya dukkana napa kangila dengang . ¹⁷ Nou atouna, hi Allah patekka nanya ana reihi hamaddunya napa langa bottahuna dana hilu paheapamanya, naha maddu wainyaka ana parungu. ¹⁸ toma a dubba kanaka nama jaji, da eimangu pahepanguna na tutuna hi Allah dana wallukmang iata nama manyeranya nama mawu pingi pahawuda einya ata pajjukang wikida kata koli tekkanya agananya napa manida nama einya ta hagada. ¹⁹ Na maning ya jiayaka napa buat kaitu tena nama maddung jaka nama pali kalogaya na dewada, napa langa paddiki ta padongu dapa hangawi. ²⁰ Ta padoungu pingi patamana hi Yesus nama lota lara tutuda ana jaji ratu bakul toma piangu-piangu tadalu kerinanya na nuku Melkisedek.