¹ Nou atouna, yanarahi adadi tomaya atatoma tapa doung pingi pahangahuna, jiaya duda kata mangeat waingu ka abi eingu waling tapa duada dama tama tapa doung nou. ² Tou tekana, na toma jellayaka na wini paegi ati dengang lahi jiata, tou jelada lahi duda, jidinguka na wini napa egi ati dengang weiga da eimang ihina lahi duda, kadang dana tubu maraimangu na ati maninguda tou kana nama ranguya. ³ kadang jiata nama maninya, ta toma tapa doungu pingi pahangahu keriya napa winada, " Kuparungu tadalu banigu : duda dada tomamanya napa doungu pingi pahangahugu, " langa kalanga mengananya napa kerana walingu ana pajajinya napinu tana. ⁴ kadang, nalarana na ladu kapituna einya awina ta mata winina : " taladu kapituna, hi Allah hangahunanya waling ngara dukada da pakerana." ⁵ Jidinguka, toungu napa langa peakana hi Allah duda dada tomamangu tapa doungu pingi pahangahugu. ⁶ Nou atouna, na woadaha kaloaga jiata ata pangadang ata toma tapa doungu pingi pahangahuna, manga eijelaja dama toma piraha da tou dama langa ranguya na wini pa egi ati dengang, jidika dada tomama, witina adada waitekanya. ⁷ Jiakadiya hina hillu pamadunya hangina na ladu, jiaya " taladu hina napa langa patomana lahi Daud adadi tomaya na rahina, taladu hina ami rangukayaka nalina, abimu beiatidingu toungu tadalu manyogarrumu. ⁸ Kadang, anadingu hi Yosua ana maraigimi ami toma taladu hangahu, toma hi Allah dana toma tikimaya na larana na ladu heaka. ⁹ Nou atouna einyaha na ladu hangahu, na ladu kapituna tutu dukana na huhu anana hi Allah. ¹⁰ Hou duda dama langa toma tapa doungu pahangahuna, duda hangahudanyaka walingu duka pakerada, toungu hi Allah ana hangahu walingu agananya napakerana. ¹¹ Nou atouna, maidakaya kata pajjukangu kata piku toma tapa dou pingi pahangahu, abi eingkang hatou tekka nama mana'u kadang ata keriya napata dama manudu. ¹² Kadang, nawini na hi Moiri, mamorikuya makulihuya, reihi tamaya walingu tapa hori nama tama pageang habali-habali. Nawinina napatojak hodu ana bottahu na touna jaka na hangahuna, waling takaluana lappaku tarina, jaka nakulihu ana yapukiradanya napapangadada. ¹³ Da eimang ma morik nama patodang ta hagana, tou jellana duna jiaya nama peadaja ngala dukada daha woluda. ¹⁴ Tou naka hina einyaka na ratu bakuluda nama langa dehangu ta awang, jiaya hi Yesus, Anak Allah, annakaya kata hamanu duakabapanya-pajukapalawiwanya aganananya napa langa manida. ¹⁵ Kadang na ratu bakuluda, da ratu bakul nama dama padamanya na lojada, kalikaina naha mearadengada lahi jiata, naliaka ana kamanya, jidinguka da eimang doku jalana, ¹⁶ Nou atounaka, keriya na maninguda, mai yaya dukada kata tara bani ata lihinya napa dou ngoduna nama paawi-panamu kata kolinya nakanyuru-kanaga tadalu ana gatada, keriya na kabu atida.