¹ Tubada ata a geile : Lawitina Daud. Ata a kabangnga lidda ne'e ate danada, "Da'ima Marobba Allah". Da buokala mono da rawige ne a diraka, da'ima a rawige a dessa. ² Muori na gillakage bawa walina ne'e Surga dana, barrada ata ana pi'a, ga'i ka ietayi wa'i mono idda ata a padde, a ngaddoya Marobba Allah. ³ Ngara dukkada da sillira. Yidda da rawige pa madiggila denga. Da'ima lakka iyya ata a rawige a dessa. Lakka iyya laito da'ima! ⁴ Ngara dukkada ata a buokala dada padde mage, bada pa moddayi ata-Gu, mirrika a nga'a rotiyi, mono dada danguma barrana Muori? ⁵ Ne'eya, yidda ata ne'edi madauta dana, oronage Marobba Allah ba wa'ini barrada ubbu iabada ata a bia. ⁶ You mu pamakkeyi patekkida ata a mayilla, takka Muori ngiadona padou mawona. ⁷ Ga'i ne manumara tubada ata Israel ka ammige walina Sion! Na Muori bada padessakowe muorikada ata-Na, ubbu aibana Yakub da maringa, ata Israel da maringa dommo.