Yesu na palengana ata nee loddo Sabat ¹ Mono, Yesu na tama kia nee sinagoge dana, bage wa'ini neeya na iyya ata a kalikku ngobba limmana. ² Yidda da paateni Yesu ga'i ka ietaya na palengana ata nee loddo Sabat ga'i kada tuduya. ³ Bage, linna Yesu barrana na ata a kalikku ngobba limmana, 'Dedewu nee tilluna'. ⁴ Mono, linna Yesu barrada yidda, 'Appa da peimana ba rawikona a dessa mono a buokala nee loddo Sabat? Gatage lolo ngau atau pamatewe?' Takka, yidda da kadenna. ⁵ Bage, Yesu na patietige nemmi barrada waige bani. Na milla takkawe atena tubana katto ateda. Bage, linna Yesu barrana na ata a kalikku ngobba limmana, 'Pajuolani limmamu'. Mono, na ata na pajuolani limmana, mono limmana na lengana. ⁶ Orona ba linnawe, yidda ata Farisi da kako, mono da sekongkol dugguda ata Herodian a lawa-Ni tubanage pei wa'ina ka pamate-Ya. Mangieda ata a diekuni Yesu. ⁷ Takka, Yesu na pamarro wekkina dugguda murit-Na nee loko dana, mono yidda ata mangieda a walina wilayah Galiea da dieku-Ni, mono a walina Yudea, ⁸ walina Yerusalem, Idumea, daerah balinage sungai Yordan, mono a wali allana barra Tirus mono Sidon, mangieda ata ne bada rengewe ngara dukkanage parawina Yesu, a mai barra-Na. ⁹ Oronage yidda ata mangieda, linna Yesu barrada yidda murita-Na ga'i kada siapkan iyya tiena tuba-Na ga'i yidda ka dada desakya Ngia. ¹⁰ Oronage Yesu bana palengana ata mangieda, bage ngara dukkada ata a mangu karoddukana da pakessina pakitana ga'i ka todo-Ya. ¹¹ Mono, yidda roh najis bada ietaya Yesu, da kawodo aro-Na mono da kawula, 'You ngiadona Ana Allah!' ¹² Takka. Yesu na laranguyi ga'i ka dada tekki kawe ba garrani Ngia. Yesu na patetapdi kabullu duada murita-Na. ¹³ Bage, Yesu na penne nee togo letena mono undangyi yidda ata pabeina bada palolo denga-Ni, mono yidda da mai barra-Na. ¹⁴ Ngia na tetapkandi kabullu duada ata ga'i kada palolo denga-Ni mono kana patukadi bada khotbah, ¹⁵ mono na yadi kuasa ga'i kada wuda muori tana. ¹⁶ Yesu na tetapkandi kabullu duada ata : Simon ( Payana ngara Petrus ), ¹⁷ Yakobus, anana Zebedeus, mono Yohanes, anguwuana Yakobus ( yidda duada ata na pangaradi Yesu Boanerges, artinage 'Ana Guruh'), ¹⁸ Andreas, Filipus, Bartolomeus, Matius, Tomas, Yakobus, Anana Alfeus, Tadeus, Simon ata Zelot, ¹⁹ mono Yudas Iskariot, a khianatiya Ngia. Kuasa Yesu a walina barrana Allah. ²⁰ Bage, Yesu natamage nee iyya umma, mono ata da pakassa kiana neeya bage Yesu mono yidda murita-Na dada bisama bada nga'a roti. ²¹ Yidda keluargana bada rengewe neya, da mai ga'i kada ngiddi baliya Yesu oronage yidda bada tekkiwe ba dana waras kiama. ²² Mono, yidda ahli Taurat a burru walina Yerusalem lidda, 'Ngia tamanani Beelzebul!' mono 'Ngia na wuda muori tana waige kuasana kapala muori tana'. ²³ Bage, Yesu na paoudi yidda ga'i kada mai barra-Na, mono na tekkidage waige aronewe, 'Peiwa'ina bana bisawe na muori tana bana wudaya ole muori tanana? ²⁴ Ne iyya kerajaan bana buakowe bana lawa wekki dounam ne kerajaan dana maddu kige. ²⁵ Mono, ne iyya umma bana buako bana lawa wekki douna, ne umma dana maddu kige. ²⁶ Na muori tana bana keddeko bana lawa wekki douna mono bana ma bareko, dana maddu kina, takka na ma bawe tubana. ²⁷ Da'ima lakka iyya ata a tama nee ummana ata a kullisa mono n adekenadi potena, kecuali bana kette ullukoni na ata a kullisa, bage makan na bisa bana dekenadi i ummana'. ²⁸ 'Yauwa kutekki takkaguge a bia barramu, ngara dukkada sala da ana ata na uopiyi, mono ngara dukkada hujat patekkida. ²⁹ Takka, garrakoni a hujatya Roh Kudus dapa uopimanadi sala na, takka na sala oronage ba sala a idda kadukka nadi'. ³⁰ Oronage, yidda ahli Taurat ba lidda, 'Ngia tamanani roh najis'. Du takkana Yesu. ³¹ Bage, innana mono anguwuana Yesu da mai mono da dede nee bali umma. Da patukana ata barra-Na bada pa ouni. ³² Yidda ata mangieda nedi a madi'i bada kaworoni Yesu mono liddani, 'Ieta, inna-Mu mono anguwua-Mu wa'idi nee bali gounga ngaddoda-Gu'. ³³ Mono, na walewe Yesu linna, 'Garradi inna-Gu mono anguwua-Gu?' ³⁴ Bage, Ngia na patietidi yidda ata a madi'i kaworoni mono linnadi, 'Ietawe, naya inna-Gu mono anguwua-Gu! ³⁵ Oronage, ba garrakoni a rawige pabeina Allah ngiadona anguwua-Gu, mono wotto-Gu, mono inna-Gu'.