¹ Ihaleotoho niaho isumakem si Yesus a suang i mbolutu osa tumetela'. osa ihomatoho Sia a kota-Na-mio'. ² Yana, beatodai i tow we-Sia êsa totumu' dupened ê meleletio' a paho'oana. kawilahanoho i Yesus ê iman i latahula, kumua Sia wiboho a totumu' dupened: "Emanêm, ei bata'-Ku. Sea'nu beapunganêm." ³ Yana mongutêh ê tatahula toutêh i Torat a suang i natena: "Si Sia matena' i Ningumêlêd." ⁴ Sata' si Yesus mahailah i pahutêhên i latahula, osa humua: "Ndeana homotahula mongutêh sasakum ê ta'pia a suang i natenu? ⁵ Êmbisa ê mowolah, kumuamoai: Sea'nu beapunganêm, suma humuamoai: Tumodêm bo lumapangêm? ⁶ Sata' saniboho halahan i homotahula, awahêm a mbaoitoba ia'i "Bata' i Totumu' mahaimbahut mapung i sea'." - osa kumua Sia wiboho a totumu' dupened - : "Tumodêm, iatangêm paheletanu osa malengêm a mbalenu!" ⁷ Osa niaho totumu' tumod osa maleng. ⁸ Yana tow tado'o nimêmilah sakum wa'aho matalo osa mêdayow i Ningumêlêd ê nimehem imbahut kelewa'aho a totumu'. ⁹ Ihaworusoho i Yesus biboho, mêlilah Sia êsatotumu' mahangalan Matius mêdatu-ratuh a mbale i cukai, osa Sia humua wesia: "Lumasêm i Ahu." Yana metodai si Matius osa lumas i Sia. ¹⁰ Osa a noras si Yesus manganyan a mbale i Matius, mangahi mangatapasa'aw i cukai bo totumu' sea' osa kuman makaru-harua wo si Sia bo mangamuri'Na. ¹¹ A kawilahanoho i tow warisi sakum wa'aho, kumua silatahula a mangamurid i Yesus: "Onde'aho ngguru makan makaru-harua wo tapasa'aw i cukai bo totumu' mahasea'?" ¹² Si Yesus imahatanga' iaho osa humua: "Ahi;i totumu' tombaoi ê mahawêrêlu dokter, sata' totumu' pahadosan. ¹³ Yana mohonêm osa silihên toro ia'i kukua: Ê papandungêyKu awa'i kobêlêsan bo ahi'i wowalad, apa'an mahi Ahu ahi'i tanu tumiang i totumu' ulit, sumata' totumu' mahasea. ¹⁴ Ahad iaho mahi mangamurid i Yohanes besi Yesus osa humua: Ondeaho hamitahula bo tow warisi mawapuasa, sata' mangamuri'-Nu ahi'i? ¹⁵ Sowat i Yesus be silatahula: "Awaro' na mangaambe i mampilei tuama monape-nape kaêto' niaho mampilei iwakarua i latahula? Sumata' mahi tepona niaho mampilei indon be silatahula osa atepo wa'ahom silatahula mapuasa. ¹⁶ Alahêm nêsatow tumapal sangatiras i ndoho' ê tawe' ihumesut a latang koyongan, apa'an sa helewa'aho wa'aho ndoho' betapal mawarênet iaho latang, osa mahawako'ange ndaya'na. ¹⁷ Kelewa'ahohem anggor taleya ahi'i i suang a asuang i sapoi bolulang koyongamêm, apa'an sa helewa'aho wa'aho sapoi iharayt a mahad niaho nanggor motia' bo wa'aho sapoi mêtêeri. sata' anggor taleya iêpa i tow a sapoi taleya hahi, bo sa helewa'aho mawia silandua." ¹⁸ Karêpêt si Yesus mênunu' kelewa'aho we silatahula, mahi nêsatow kapal i mbale waaibadatan, osa moniri' i Sia osa humua: "Bata'ku wene imatewe'mio, sata ohonêm bo itikêl kama-Nu wesia, yana sia tumow." ¹⁹ Osa si Yesus kahi tumodoai osa lumas iaho totumu' iwakaru-harua i mangamuri'-Na. ²⁰ A tepo wa'aho êsa wene ê sangawulu' bo ruam ngata'un kaêto'anna mahigon i totonaw dumior sumusutai si Yesus a talihud osa mamos i ndoyot i njuba'-Nga. ²¹ Apa'an kuana a ndalêm i natena: "Asar amosêykumange njuba'-Nga, mênyaman ahu." ²² Sata' si Yesus isumeleng osa tumotong i sia osa humua: "Iête'êm natenu, ei kedoy-Ku, emanu imawanaulêngêm i how." Yana tu'os tepo wa'aho imênyamanêm niaho mbene. ²³ A niho' amatoho si Yesus a mbale iaho kapala i mbale waibadatan osa mêlilah i mangatapasêput i poloit bo wuroso i tow tado'o, ²⁴ kumua Sia: "Mohonêm apa'an nia'i mbata'nu hi'i imate, sata' imo'o." sata' silatahula imêke'ke i Sia. ²⁵ Ahad besesem niaho tow tado'o, si Yesus sumuang osa tumaka' i kama iaho kedong, osa mêtodoai niaho kedong. ²⁶ Yana beharerem sahai sakum wa'aho a sakumên iaho lukad. ²⁷ A noras si Yesus lumawusêm i pahêben-Na wiboho rematang, dua totumu' buta mêlas i Sia osa mangomba-ngombal osa humua: "Ihlêsai hamitahula, ei Suru i Daud." ²⁸ A nisumuangêm si Yesus a nêsa wale, mahi niaho ndua totumu' buta we Sia osa kumua si Yesus be silandua: "Awaemanên i homotahula, awahêm Ahu do'na tumulid iaho?" Sumowat silandua: "Eyêm Tuhan, emanên i hamitahula." ²⁹ Osa si Yesus mamos i mbêlên i latahula osa humua: "Mamoalim behow kele i nemanu." ³⁰ Yana monuyat mbêlêt i landua. Bo si Yesus kahi tumêpu' sumani we silandua, kuana: "Atuhêm saniboho na'am mande êsatow mahailah sakum êwa'i. ³¹ Sumata' silandua lumuai osa imawarere i Sia a samumên iaho lukad. ³² Lumuaiwe'moho ni aho ndua totumu' buta, pine'angêmai we si Yesus êsa totumu' lemo' ê solo-solongan i setang. ³³ A nieleioho ni aho setang, doro'nam ni aho totumu' lemo' mohoda-hodait. yana maerang tow tado'o, kuana: "Ê kelewa'i awe' mahasa winêlilah i tow a Israel." ³⁴ Sumata' tow warisi kumua: "Karêngan i ngalan i pangulun i setang Sia mahelei i setang." ³⁵ Kelewa'ahom si Yesus makêkêd a pahasa kota wo ro'ong; si Sia mapêsani a mangawale waibadatan bo maposahai i kukua i kaholano'an i sorga osa mapawatala i pahasa mahados bo kahawelan. ³⁶ Mêlilah iaho tow tado'o, ihali'is nate i Yesus i kobêlêsan be silatahula, apa'an silatahula kêpe wo behawere kêpom ndomba ê talahêm tapêmia. ³⁷ Yana kua-Na a mangamuri'-Na: "Uwu'un ulit tunaw, sumata' tapatawoi keleawa. ³⁸ Apa'an wa'aho mangelei a nawo' mahauwu'un, saniboho Sia masiumoai mangatawoi tanu wa'aho nuwu'un."