¹ A tepo wa'aho iho'amat ê mangasahai sakum si Yesus be si Herodes kolano' mahalukad. ² Osa sia humua a mangawêgaweina: "Ewa'im si Yohanes Pembabtis; sisia itumowêm a tutud i tow imatem bo wa'aho kawalian wa'aho mangaimbahu'na matawoi we Sia." ³ Apa'an totu'u si Herodes imasium tumiho si Yohanes, tumorunggu i sia mawawênjara i sia, behauwud a nimamoali we si Herodias, karoang i Pilipus pog-Nga. ⁴ Apa'an si Yohanes mahasa imerow i sia, kuana: "Ahi'i tumutul kow mindo si Herodias!" ⁵ Si Herodes mapandung lumimêd i sia, sata' sia matalo i tow tado'o ê matele' si Yohanes kele nabi. ⁶ Sata' a nêndo lumo'or i ta'un tinowan i Herodes, luma'sih mbata' i Herodias bene a tutud silatahula bo imawawêkahi' i nate i Herodes, ⁷ Mahad si Herodes imasupa mehe wesia asiamange ê pangeleiêna. ⁸ Yana pahatêna'anoho i ninaga, wa'aho kedong bene kumua: "Bean ahu wia'i kohong i Yohanes Pembabtis a nêsa baki." ⁹ Osa masusa nate i kolano', sata' apa'an supana bo apa'an mangasaheina pinêrêtanamange tanu mehe i aho. ¹⁰ Bewasiuna morog i kohong i Yohanes a pênjara ¹¹ osa kohong i Yohanes êwa'aho pineangai i tow a nêsa baki, osa iehe wiboho a mbene osa sia me'angoho a ninanga. ¹² Ahad wa'aho mahi mangamurid i YOhanes Pembabtis mindo i mbangkena osa kumubur i sia. Osa silatahula moho humua we si Yesus. ¹³ Katanga'anoho i Yesus niaho sirita imomorusêm Sia wiboho osa mapandungêm kumêndus i mbatangan bo wolutu a lesad liai. Sata' tow tado'o imahatanga' i aho osa mêlas i Sia mêbe a têmbêran a mangakota i latahula. ¹⁴ Mobatunoho si Yesus a ndarat, mêlilah Sia i tow tado' omio', yana ihali'is nate-Na i kobêlêsan be silatahula osa Sia imawawaulêng silatahula i nadosên. ¹⁵ A mbawa'andom, mangamuri'-Na mahi we-Sia osa humua: "Lesad bia'i liai bo êndo susutêm dumêndêm iwasium ni'ange mangatotumu' maleng saniboho silatahula do'na tumêlês kakanên a mangaro'on." ¹⁶ Sata' si Yesus ihumua we silatahula: Silatahula ahi'i sana' maleng; komotahula musti mehe kan be silatahula." ¹⁷ Sowat i latahula: "Bana e mbehamitahula wia'i bati' lima roti bo dua nda'." ¹⁸ Si Yesus kumua: "Pe'angênai we Ahu". ¹⁹ Osa iwasium-Na ni aho mangatow mêdatuh a noho. Osa indo-Na moho ni aho lima roti bo rua da', si Yesus nguma'al a langit osa kumua i kamang, osa mamisung i aho roti osa mehe i aho a mangamuri'-Na, osa mangamuri'-Na mêbeteng a mangatow. ²⁰ Osa pahasa silatahula i human ahad i masuh. Osa panêsênên i tow mangawisung i roti wehaagat, sangawulu bo rua watang muhu-hu. ²¹ Ilumas ihuman ipa'io lima ngoribu tuama, ahi'i wetebe mbene bo mangahedong. ²² Ihaleotoho i aho si Yesus tilahom isumiu i mangamuri'-Na sumake a mbolutu osa mamunam be Sia moho a tetela', karêngan wa'aho masiu Sia i mangatow mangaleng. ²³ Osa ihaworusoho ni aho mangatow bewahialeng-Nga, si Yesus mamao a mbêtêl tanu sumombayang si Sia i nêsa. Dumêndêmoho, si-Sia hêmange mbiboho. ²⁴ Bolutu i mangamuri'-Na tatahulam mil karekangana a têmbir i tapirig osa pobambi-bambingên i mbohol, apa'an kakab masupah. ²⁵ Do'nam onah têlu ngaoras mahi si Yesus be silatahula ilumapang a mbao i nahe. ²⁶ Kawilahanoho i mangamuri'-Na ê malapang Sia a mbao i nahe, mêkombo' silatahula osaSumawang : "Wa'aho panunggu!". osa silatahula morosawang apa'an matalo. ²⁷ Sata' si Yesus tilaho ihumua we silatahula: "Tumêtêng! Si Ahu nia'i, na' matalo!". ²⁸ Osa si Petrus sumawang osa sumowat i Sia: "Tuhan, si si How nia'na, isiumai ahu mahi we How lumapang a mbao i nahe." ²⁹ Kukua i Yesus: "Moaiêm!" Yana si Petrus lumolos a mbolutu osa lumapang a mbao i nahe mogamat si Yesus. ³⁰ Sata' a mahahêlamoho sia i sêputan i kakab, imatalom sia osa molaim ihalêbêng osa sumawang: Tuhan, tulungêna ahu!" ³¹ Tilaho si Yesus imayomoho i kama-Na, tumaka' i sia osa humua: "Ei totumu' ê kaut neman, ndeaho how mêbambing?" ³² Osa silatahula sumake a mbolutu bo kakab kahi itumêtêngêm. ³³ Bo mangatotumu' ê na mbolutu moniri' i Sia, kuana: "kaulitana si How Bata' i Ningumêlêd." ³⁴ Ihaho'amatoho a tetela' silatahula mobatun a Genesaret. ³⁵ A kahilala'anoho si Yesus i mangatow wiboho, mangua silatahula a sêrêb iaho lukad. Yaha pahasa totumu' adosên binalaimai we Sia. ³⁶ Mamohong silatahula saroro'na ponge'an mamos i ndoyot i njuba'-Nga. Osa pahasa totumu' i mamos i Sia imêmaulêng.