¹ A nêndo wa'aho lumuai si Yesus biboho a mbale osa dumatuh a sili' i luah. ² Yana mangahi tow tado'o lulu-lulutênange osa lumipung i Sia, mahad Sia sumake a mbolutu osa rumatuh biboho, sarimbo tow tado'o pahasa tumotod a tapirig i luah. ³ 3Osa tado'o sinakum imbewanguaNa bewapangande-Na we silatahula. Kua-Na: "Baha nêsatow tapakêlod mahah kumêlod. ⁴ A noras sia makêlod, wa'aho pêpês bana mbewangakad a têmbir i ndalan, osa mahi melepad kuman iaho ahad i talam. ⁵ Bana mbewangakad a toba batu watuan, ê tahi'i takura ê tobana, osa ni aho pêpês tilaho i manow, apa'an tobana nipis. ⁶ Sata' lumuaioho nêndo, ilumatoiêm sia bo mawêla apa'an ahi'i mamut. ⁷ Bana hahi mbehakad a tutud i kabu' i patoh, osa mahawako' ni aho kabu' bo mêkuwit i sia ahad i mate. ⁸ Bo bana mbewangakad a toba maulêng osa mamua': bana ê mahamatus ngalikun, bana ê nênêm ngawulu' ngalikun, bana ê têlu ngawulu' ngalikunn. ⁹ Sisei mahatalingan, tumanga'ange sia." ¹⁰ Yana mangahi mangamuri'-Na osa tuma'an be Sia: "Ndea'aho How mênunu' be silatahula i wapangande?" ¹¹ Sowat i Yesus: "Behow binean tutuh tahu mahailah i sosonom i Kaholano'an i Sorga, sata' be silatahula ahi'i. ¹² Apa'an sisei ê mbana, sisia ê mbean, amahad sia kaaya'an; sata' sisei ê talahêm, asiamange mbesia pangindon besia. ¹³ Wa'aho kawalian si Ahu mênunu' iwapangande we silatahula; apa'an mandewe' mêlilah, ahi'i silatahula mahawilah bo mandewe' matanga' ahi'i silatahula mahatanga' bo ahi'i mahata'an. ¹⁴ Yana be silatahula lêkêwêm mbenobuat i Yesaya, ê mahaênu': Komotahula tumanga' bo mahatanga', sata' ahi'i mahata'an komotahula mêlilah bo mahawilah, sata ahi'i mahatiho'. ¹⁵ Apa'an ate ia'i mbangsa ihumunabêlêm, bo talingana tanêd matanga', bo bêlêna kupet tumakê-takêw; saniboho na'am silatahula mahawilah teka i mbêlêna bo mahatanga' teka i talingana bo mangarti teka i atena, osa sumomba'i mahad si Ahu ê mawamaulêng silatahula. ¹⁶ Sata' maênowange mbêlênu apa'an mahawilah bo talinganu apa'an mahatanga'. ¹⁷ Nde kumua Ahu wehow: kaulitana tado'o nabi bo taulit maibog mailah asia ê mbelilah i homotahula, sata' ahi'i mahawilah i aho, bo maibog tumanga' asia ê tinanga' i homotahula, sata' ahi'i mahatanga' iaho. ¹⁸ Apa'an wa'aho : tanga'an sondait ia'ho pangandean i tapakêlod. ¹⁹ A totowêsa ê mahatanga' i kukua sakum Kaholano'an i Sorga, sata' ahi'i mahatiho' iaho, mahi ê si ta'pia osa kumandet i mbehêlodêm a nate i aho totumu', êwa'aho pêpês ê mbêhêlod a têmbir i ndalan. ²⁰ Kêlod ê mbêhêlod a to'ba batu-watuan awa'aho totumu' ê nitumanga' i aho kukua osa tilaho i tumirima i aho karêngan i mbeat. ²¹ Sata' sia ahi'i imaut bo ihatahang sangaoras kêmoho. samahi pêkulêngan bo pêda'ian apa'an wa'waho kukua, totumu' wa'aho hahi tilaho sumakal. ²² Ê mbehêlod a tutud i kabu' i patoh awa'aho totumu' itumanga' i aho kukua, osa kalikokoan i mbaoitoba i'ai bo totondei i ka'aya'an dumasêl iaho kukua amahad ahi'i mamua'. ²³ Ê mbehêlod a toba meulêng awa'aho totumu' nitumanga' iaho kukua bo mahata'an, bo apa'an wa'aho sia mamua', bana ê matus ngalikun, bana ê nênêm ngawulu' ngalikun, bana ê têlu ngawulu' ngalikun." ²⁴ Si Yesus kumayas kahi êsa wangandean be silatahula, kua-Na: "Sakum wa'aho Kaholano'an i Sorga iwangande totumu' ê kumêlod pêpês maulêng a mbondoina. ²⁵ Sata' a noras pahasa tow i mo'om, mahi ê kasaruna kumêlod pêpês i kuhun a nêpang iaho nggandum, osa moho. ²⁶ A tumowoho ni aho nggandum bo tumu'tolem manangoan, kawilahan kahi ni aho kuhun. ²⁷ Yana mangahi ê mangaata i aho mahawondoi wesia osa humua: Awo', awahi'i pêpês maulêng , ê mbehêlod i nawo' a mbondoi i nawo'? Bisana sa mahi ni aho kuhun? ²⁸ Sowat i aho nawo': Êsatow kasaru nitumawoi i aho. osa mohodait ni aho mangaata ata wesia: Yana awamaibog si nawo' saniboho hamitahula moho mangubut i aho kuhun? ²⁹ Sata' sia humua: Na'am, ndesa ni aho nggandum mêlas ihaubut a noras komotahula mubut i aho kuhun. ³⁰ Iwayai oho silandua tumowmakarua ahad tepona mangauwu'. A tepom wa'aho kumua ahu a mangatapanguwu': Sêsênêype' pahamunan ni aho kuhun bo pamoto'on tanu tutun, ahad i aho panêsênên ni aho nggandum a suang i nggodoyku." ³¹ Si Yesus kumayas êsa wangandean balina hahi be silatahula, kua-Na: "Sakum wa'aho Kaholano'an i Sorga kelemange batu i mostor, ê mbendo wo bewêpês i tow a mbondoina. ³² Totu'u batuna wa'aho ni'it kisit a mangawêpês, sata' sa itumowêm, wa'aho mostor lebe wako' nde tu'inoho walina, do'na mamoali wohong, mahad mangamelepad a kakaban mahi mêdumun a mangasapa'nga." ³³ Osa si Sia isumirita wangandean ê wa'i we silatahula: "Sakum wa'aho Kaholano'an i Sorga kelemange ragi ê mbendo i nêsa wene osa ihayo'na a topong i têrigu têlu sukat(=êpat ngawulu' liter) mahad pahasa wa'aho kumapet (sumêha)." ³⁴ Kesan wa'aho behua i Yesus a tow tado'o a pangandean, bo ahêmai mbehua-Na we silatahula a tahi'i wewangande, ³⁵ Saniboho lêkêwêm kukua ê mbehua i nabi: "Si Ahu mapandung muha i mba'ba-Nu mapakua i pangandean, Si ahu mapandung mohodait a sakum niru-ruru tu'os katulid i mbaoitoba." ³⁶ Yana si Yesus kahi mêpa'ange i aho tow tado'o osa maleng. Mangamuri'-Na mangahi osa humua we Sia: "Iwawataram be hamitahula pangandean sakum kuhun wa'aho na mbondoi." ³⁷ Sumowat Sia, kua-Na: "Totumu' i humêlod pêpês maulêng awa'aho Bata' i Totumu'; ³⁸ Bondoi awa'aho baoitoba. Pêpês maulêng wa'aho mangawata' i Kaholano'an bo kuhun i mangawata' i si ta'pia. ³⁹ Kasaru nihumêlod pêpês kuhun awa'aho si Tapatena', Oras i manguwu' awa'aho kasapêtan i katowan bo mangatapanguwu' awa'aho malaekat. ⁴⁰ Yana kalewa'aho kuhun sinêsên bo berupul a mbaha, kalewa'ahohêm na kasapêtan i katowa. ⁴¹ Bata' i Totumu' masiumai i mangamalaeka'-Na bo silatahula manêsên i pahasa asiamange ê mapawaureng bo pahasa totumu' matawoi i kata'pia'an a suang i Kaholano'an-A. ⁴² Pahasa wa'aho iwawarupul a papêbaha'an; bibohom ê mbana nisod bo kalêkêt i mba'ang. ⁴³ A tepo wa'ahom mangatoulit maindo sumulo kele êndo a Kholano'an i nAmang i latahula. Sisei mahatalinga matanga'ange sia!" ⁴⁴ "Sakum wa'aho Kaholano'an i Sorga kele arta ilêbe-lêbêng a mbondoi, ê kinaerean i tow, osa malenga i lêbêng. Apa'an i kahi'na moho sia mêgu'un i pahasa sawana osa tumêlês i aho mbondoi. ⁴⁵ Kelewa'ahohêm sakum wa'aho Kaholano'an i Sorga kele êsatow mawadangang ê mangilah mutiara monunga. ⁴⁶ A kaereanamoho ni aho mutiara monungamio, imohom sia ihumu'un i pahasa sawana osa tumêlês i mutiara wa'aho." ⁴⁷ Kelewa'aho hahi sakum wa'aho Kaholano'an i Sorga kele lolombo' bewasot a saloyon, osa mahasapoi morowalina nda'. ⁴⁸ Mawundatoho puhêt wa'aho kosên i tow a tapirig, osa mêdatuhio, silatahula osa manêsên i nda' lo'or a loyan bo mangada' ahi'i lo'or itia' i latahula. ⁴⁹ Kelewa'ahohêm kahi na kasapêtan i katowan. Mangamalaekat mangahi mawatared i totumu' ta'pia a totumu' ulit, ⁵⁰ osa mêdupui i tota'pia a suang i papêbaha'an; bibohom kaerean i nisod bo kalêkêt i mba'ang. ⁵¹ Awa kawiowan i homotahula pahasa wa'aho? Silatahula sumowat: "Ei, kawiowan i hamitahula." ⁵² Yana kumuam si Yesus be silatahula; "Wa'aho kawalian mangatoutêh i Torat, nitumirima sasani asakum wa'aho Kaholano'an i Sorga kele mahawale ê nilumuai i narta taleya bo hoyongan a powêndamana." ⁵³ Ihalawusoho si Yesus nimasirita i mangawangandean wa'aho, matang Sia wiboho. ⁵⁴ Ihaho'amatoho a ndo'ong-A, si Yesus mêsani i mangatotumu' biboho a mbale pawaibadatan i latahula. Yana maerang silatahula bo humua: "Bisana kinaeran-A i sononoi wa'aho bo imbahut tanu tumulid i mangamujisat wa'aho? ⁵⁵ Awahi'i Sia êwa'i bata' i tapatawoi i kayu? Ahi'i ninang-Nga mahangalan si Maria bo mangawog-Nga: si Yakobus, si Yusuf, si Simon bo si Yudas? ⁵⁶ Bo awahi'i mangawog-Nga wene pahasa karuru i hita? Yana bisana kinaerean-Na i pahasa wa'aho? ⁵⁷ Osa silatahula mahiding nate bo mêtulud iu Sia. Yana si Yesus kumua we silatahula: "Êsa nabi pasiri'in bisa-wisanamange sata' hi'i a ndo'ongamio bo a mbalena." ⁵⁸ Bo apa'an tahi'i emanên i latahula, ahi'i tado'o mujisat tinulid-Na wiboho