¹ Ihamoho si Yesus nisumani a sangawulu' bo rua muri'na, matang sia wiboho tanu sumani wo manahai kukua a mangakota i latahula. ² A suang i penjara si Yohanes mahatanga' i sakum tinawoi i Kristus, ³ osa masiu i mangamuri'na tuma'an be sia: "Awa si How ni aho ê mahi suma hamitahula sumodo'pe'mai i tow walina?" ⁴ Si Yesus sumowat silatahula: "Mohonêm osa ihuamange we si Yohanes asia ê tinanga' bo pinilah i homotahula: ⁵ totumu' buta imahawilah, totumu'dupened behalapang,totumu' kustan imêbayo, totumu' bêngêl imahatanga', totumu' imatem bewawatow bo a mangatow lêngei kinua'an i Sahai Maulêng. ⁶ Maênowange totumu' ê tahi'i mawatape bo tumulud i Ahu." ⁷ Ahadêm mangamurid i Yohanes imalengêm, tumo'tol si Yesus mohodait biboho a tow tado'o a sakum si Yohanes: "Asia ê nohon i homotahula a padang gurun? Milah i tambelang maliso-lisoi ni worosêput i kakab? ⁸ Suma asia ê nohon i homotahula? Milah i totumu' malatang alus? Wa'aho totumu' malatang alus tampana a nggonggulang i kolano'. ⁹ Yana asia ê nohon i homotahula? Milah i nabi? Totu'u, bo si Ahu kumua wehow, me'e lebe a nabi. ¹⁰ Apa'an sakum sisia bana mbewatih: Serenai, si Ahu sumiu i sosiu-Hu mamuna we How, sisia mamirang i tutulênU a ndior-U ¹¹ SI Ahu kumua wehow: kaulitana a tutud i latahula ê mbehawata'ai i mbene ahêm mahasa lumêmbo êsa totumu' ê lebe wako be si Yohanes Pembabtis, sumata' ê ni'it i kisit a Kaholano'an i Sorga lebe wako' besia. ¹² A kato'tol belêmboan i Yohanes Pembabtis ahadai wa'i, Kaholano'an i Sorga bewetow bo totumu' i mawawetow mêpe' sumonggulit i sia. ¹³ Apa'an pahasa nabi bo kitab Torat imanobuat mahad lêmboan i Yohanes ¹⁴ bo - sa homotahula maibog tumirima i sia - sisiam ê Elia ê wa'aho mahi. ¹⁵ Sisei mahatalinga, tumanga'ai sia! ¹⁶ Bo asia ê pêkeleay-Ku i mêkarêngan wa'i? Wa'aho silatahula kelemio' mangahedong mêdatu-ratuh a pasar bo tumerewa' a mangaambena: ¹⁷ Kamitahula masêput i poloit tanu sihow, sata' komutahula hi'i luma'sih, kamitahula makatar katar i tape sata' komotahula hi'i matape. ¹⁸ Apa'an si Yohanes imahi, hi'i sia makan, bo hi'i sia sinolongan i setang. ¹⁹ Lumalas Bata' i Totumu' mahi, si Sia makan bo maluku', bo silatahula kumua: Seren, si Sia êsatow sulamoh bo taluku', ambe i tapasa'aw i cukai bo totumu' mosea'. sata' imbahut i Ningumêlêd beulitan i tatawoina." ²⁰ Osa si Yesus tumo'tol sumero' i mangakota ê tahi'i mawêdis, mande wibohon Sia ni'it tado'o itumulid i mangamujisa'-Na: ²¹ "Masilaka how Khorazim! Masilaka how Betsaida! Apa'an sa a Tirus bo Sidon behamoali mangamujisat behamoalim a tutud i homotahula, êto'om silatahula imawêdis bo imakabung. ²² Sumata' kumua Ahu wehow: A nêndo pagola'tungan i Tirus bo Sidon maindo ihawolahai nde tanggonganu. ²³ Bo sihow Kapernaum, awa how iwawahapet ahad a langit? Ahi'i, sihow iwawalolos mahad a lesad i toimatem! Apa'an sa a Sidon behamoali mangamujisat ê mbehamoali a tutud i homotahula, wa'aho kota tantu tumotoype' ahad êndo inia. ²⁴ Sumata' kumua Ahu wehow: a nêndo pagola'tungan, tanggongan i Sodom maindo lebe wolahai nde tanggonganu." ²⁵ A tepo i aho kumua si Yesus: "Dumayow Ahu i How, Amang, Tuhan i langit bo toba, apa'an pahasa i aho beruruNu a tosêrit bo towandei, sumata' bewawatara-Nu a tohisit. ²⁶ O Amang, êwa'ahom niwêtêna'an be How. ²⁷ Pahasa betarom be Ahu i nAmay-Ku bo alahêm mande êsatowange mahahilala i mBata' songad i Namang, bo alahêm mande êsatowange mahahilala i nAmang songad i mBata' bo totumu' i sia ê ni wêtêna'an iwawatarana. ²⁸ Moaiêm be Ahu, pahasa totumu' palo' kawel bo malihud tanêd, si Ahu mehe kasononoian behow. ²⁹ Lihudên pasangan ê mbewasay-Ku bo mulud be Ahu, apa'an si Ahu moêmeng bo polah nate bo kanalunu maindo mahaere kasononoian. ³⁰ Apa'an wa'aho pasangan bawesay-Ku êna' bo pape'angey-Ku hahi polah."