¹ Besi penatua tanu si Gayus ê nihalês, ê nihalêsku a sakum kaulitan. ² Pogku ê nihalês, si ahu sumombayang, merotange how mau-maulêng bo nyama-nyaman ange a pahasa asiamange, mêkele kele kanaluna mau-maulêng ange. ³ Nde ahu ni’tio’ imêkahi’, anoras tatahula pog imahi bo imehe sasairian sakum kawênonownu asakum kaulitan, nde totu’u how menonow asakum kaulitan. ⁴ Tanusiahu alahêm kobeatan ê bako’ a mahatanga’, awahêm bata wata’ku mênonow a sakumên i kaulitan. ⁵ Pogku ê nihalês, sihow itumawoi kele totumu’ maheman, bisana how itumulid i masiamange tanu manga-wog, mandehahi silatahula awahêm mangatow talib. ⁶ Silatahula imehem sasairian a sa’angên i njama’at sakum bêlêsnu. Maulêngio’ tatawoinu, sa how motung silatahula a pangebean i latahula, karêngan i nêsa tutulên ê niwêtêna’an be Ningumêlêd. ⁷ Nde napa’an i ngalanNa silatahula imatangêm karêngan ahi’i itumirima awasia mange a manga totumu’ ê tahi’i mahahilala i Ningumêlêd. ⁸ Kita ahi’i toro satahi’i tumirima i manga totumu’ ê kelewa’aho, sani’aho hita do’na mindo weteng a pawatawoiên i latahula tanu kaulitan. ⁹ Siahu imamatihêm keleawa tanu jama’at, sumata’ si Diotrepes ê maibog mamoali totumu’ ihamuna a tutud i latahula, ahi’i maibog monge’e i hamitahula. ¹⁰ Tatawoi i’aho sa ahu mahi, siahu mangelei iate-ate a pahasa tatawoi ê tinulidnam, nde sia mawolabag mapasot kota-hodait ê kasar be hamitahula ; bo alawe’ imawêde’ i’aho, sisia mio’ ahi’i wati’ ahi’i maibog tumirima i manga-wog ê mangahi, sumata’ kahi mapar i manga-totumu’, ê maibog tumirima silatahula bo mawa-anei i manga-totumu’ wa’aho a njama’at. ¹¹ Pogku ê nihalês, na’am mogulud i ta’pia, sumata’ ê maulêng. Siseiange tumawoi maulêng, sisia a Ningumêlêd sa mahi, sumata’ siseiange tumawoi i ta’pia, sisia ahi’i mahasa mêlilah i Ningumêlêd. ¹² Sakum si Demetrius pahasa totumu’ imehe sasairian ê maulêng, do’naihua kaulitanio’ nimehe sasairian ê kelewa’aho. Bo kamitahula hahi mehe sasairian ê maulêng sakum sisia, bo sihow mahailah, awahêm sasairian i hamitahula awahêm ulit. ¹³ Tado’omio’ ê musti iwamatihku wehow, sumata’ ahu hi’i maibog mamatih tanu sihow teka tinta bo pena. ¹⁴ Siahu maharaw tilaho mêtauw bo sihow bo mohodait masa’angan tokia? ¹⁵ Sononoi ênow mahawid i how ! Sisiri’ i manga ambenu. Ihuamange sisiri’ku tanu manga ambe êsa wo êsa.