1
Besi penatua tanu inang ê kina sisiran bo bata wata’na ê nuli-ulit ihalêsku. Ahi’i bati siahu ê mahalês i hamotahula, sumata’ kahi pahasa totumu ê mahahilala i kaulitan.
2
Apa’an i kaulitan ê menenet a sakumên i hita bo ê mainjo mawid i hita ahad kaêto -êto’na.
3
Bêlês kohomba’, kamang bo sononoi ênow i Ningumêlêd Amang, bo i Yesus Kristus, Bata’i Namang, mainjo mawid i hita a sakum kaulitan bo bêlês.
4
Siahu mêkahi’io, awahem ahu imaha ihaw, awahêm iwarua a mbata-wata’nu mênonow a sakumên i kaulitan mêtêna’an bo pêreta ê tiniriman i hita be Namang.
5
Bo ia’i talewe’ahu mangelei wehow, iang ahi’i keleitu ahu matihêm i pêreta taleya tanu sihow, sumata’ kumi’it a pêreta ê mbanam be hita a pahamunan sani’aho hita mêbêwêlêsan.
6
Bo êwa’im mbêlês wa’aho, êwa’aho awahêm kita musti menonow mawa ki’it a pêretaNa. Bo êwa’im pereta wa’aho, êwa’ahoo komotahula musti mênonow a sakumên i mbêlês, kelem ê tinanga’ am i homotahula a pahamunana.
7
Apa-apa’an tunaw tapê-wobureng imêlêmbon bo imahanêm a sêrêb i mbaoitoba, ê tahi’i monge’e awahêm si Yesus Kristus imahim keletotumu’. Wa’aho awahêm si tapê-wombureng bo saru i Kristus.
8
Mahiahamange, sani’aho komotahula na’am katala’an asia ê tinawoiêm i hamitahula wa’aho, sumata’ sani’aho homotahula mahaere i têndanu lêkêwio.
9
Pahasa totumu’ ê tahi’i tumo’unoi a sakumên i tuturu’ i Kristus, sumata’ ê nilumakad lumuai wiboho, ahêm Ningumêlêd. Siseiange tumo’unoi a sakumên i tuturu’ wa’aho, sisia bana Namang bohahi Bata’.
10
Sa êsatow mahi wehow bo sia ahi’i me’ang ituturu’wa’i, na’am komotahula tumirima i sia a suang i mbale bo na’am mehe sisiri’in besia.
11
Nde siseiange mehe sisiri’in besia, sia mahaere beteng a tatawoina ê ta’pia.
12
Mandewe’ tado’o ê musti iwatihku behow, siahu ahi’i maibog tumulid i aho teka kartas bo tinta, sumata’ ahu maharaw siahumio’ mahi behow bo mohodait masa’angan tokia’ teka homotahula, sani’aho metolimomod mbeati hita.
13
Sisiri’ tanu homotahula i mbata-wata i pogngu ê kinasisiran.