¹ Siahu, Paulus, êsatow ê tahi'i waraney sa matotongan bo homotahula, sumata' baraney be homotahula sa mêdekangan, siahu mawaimun be homotahula tanu si Kristus ê moêmang bo luboi. ² Pangeleiênku be homotahula: Na'am komotahula mêlêse i ahu tanu mawaturu i kawaraneyanku a susut kelembisa ahu mata'ar kumêteh a mangatow tinatum ê matatam awahêm kamitahula mênonow kele i mbao i toba. ³ Totu'u kamitahula menonow we a mbao i toba, sumata' hamitahula ahi'i mangambut kele i mbao i toba. ⁴ Apa'an kelid i hamitahula a pangamdutan ahi'i kelid a mbao i toba. Sumata kelid be wawalêkêw karêngan imbahut i Ningumêlêd ê mahaeley mawawêru i mangakota' ⁵ Kamitahula mawasukud i pahasa tuli-tulidên i tow bo mawawê i pahasa kota' tinod i kasukagan i totumu' tanu sumaru pekahila'an i Ningumêlêd kamitahula itumorunggu i pahasa utêh bo mawasese a sakumên i Kristus. ⁶ Bo hamitahula i sumadia hahi tanu mahu'hum i pahasa kasêliba'an, sa kohi'itan i homotahula imamoalim tolimomod. ⁷ Totongan ê tara a sa'angên i mbêlên i homotahula! Sa bana êsatow muliulit-ulit maheman, awahêm sia sawa'i Kristus, mêrotange sia mahutêh a sakum i natena, awahêm hamitahula hahi sawa'i Kristus kele si Sia. ⁸ Lebe-lebe sahele ahu ê malebe-lebe i mobeat a mbao i nimbahut, ê mbehomba i Ngêlêdtow be hamitahula tanu mawatod bo ahi'i mawawêru i homotahula yanasa a sakum ia'ho ahu ahi'i mainjo mawasokia. ⁹ Sumata' ahu ahi'i maibog kawilahan kelemio ahu mawatalo-talo i homotahula a mangasuratku. ¹⁰ Ende, kua i tow, mangasuratna totu'u tepu bo kêtêh sumata sa mêtotongan giona kawes bo mangakawakodaitna alahêm toro. ¹¹ Sumata' merotange mangatow ê mokodait kelewa'aho manêsêl, awahêm tatawoi i hamitahula, osa mêrotange, kele i kodait i hamitahula a mangasurat i hamitahula sa ahi'i mêrotange. ¹² Totu'u hamitahula ahi'i waraney dumoro i mbatangan be si suma mawaotow i mbatangan bo mangatotumu tinatum ê marayow i mbatanganamio. Silatahula sumokad i mbatangan teka i sokad i latahulamio; bo mawaotow i mbatangan teka i mbatangan i latahula mio ! I me'en kawodohan i latahula. ¹³ Salikuna hamitahula ahi'i maibog mobeat lumeot a suwuah. Sumata menet a sakum a manga suwuan i patawoiên ê tinatum Ningumêlêd tani hamitahula, ê nihasêrêb mahad be homotahula hah. ¹⁴ Nde a sakum mawasahai i ninjil i Kristus, kamitahula behoamatêm be homotahula, ahadiaho hamitahula ahi'i lumoet i suwuan i patawoiên hamitahula, kelemio hamitahula awe' behoamad be homotahula. ¹⁵ Ahi'i hamitahula mobeat a patawoiên ê tinulid i tow balina a sakum patawoiên i tahi'i tinatu tanu hamitahula. Sumata' paharawên i hamitahula, awahêm osa kawahemanu ni'itên i hatow, hamitahula mahaere pasiri'in bako'io' kahi a tutud i homotahula, sa imêkele bo sakuêm pawatawoian ê tinatum tanu hamitahula. ¹⁶ Ei, kamitahula mênonow, saniboho hamitahula do'na mawasahai i ninjil a manga sakumên ê lebe rekang a sakumen i homotahula bo ahi'i mobeat a pahasa mangabua' i kinaerean tow balina â sakumên i patawion ê tinatum tanu silatahula. ¹⁷ "sumata siseiange mobeat, mêrotange Sia mobeat a sakum i Ngêlêdtow" ¹⁸ Nde ahi'i totumu i marayow i mbatangana ê moêtê, sumata' tow ê ndinayou i Ngêlêdtow.