¹ Awa ahi’hi ahu Rasul? Awa ahu ahi’i tow pêrei? Awa ahu alawe i melilah si Yesus, Tuhan i hita? Awa hamatahula ahi i bua’i pesaliaiku a suang i Tuhan? ² Mande apa’apa’an pakua’an itow ahi’i Rasul, sumata kamotahulu mahailah io i ahu awahem ahu awahem ahu sosiu i Ningumelêd. Awahem menonow how a suang i Tuhan pahasa i boho bua’i sasalihu behamotahula. ³ Wa’i niaho niwawawila’ku be silatahula asia niaho tutul i latahula ahi’i wu’tul. ⁴ Awa hamitahulah ahi’i mata’u tumirima kakanen bo leku’un asakum ahu metawo-tawoi? ⁵ Awa ahu ahi’i mata’u me’ang i tow asebuhu sarani iwalalaiku asakum patutuleyku, kele tinulid i mange pogkukarua imbeles i Yesus Kristus bo manga sisiu-sisiu balina, kele si Petrus. ⁶ Suma bati Barnabas bo siahu niaho tahi toro satahi’i mangilah kakaneiku. ⁷ Alahemoho sururaho musti mo’kos imbatangana mio asakum sia asuang i mbowirang. Alahemoho tow mamayu anggor a mbedenga satahi’i sisia kuman imbuana? Suma sisei mahiaha sangawalas domba osa ahi’i luku i’susui domba i boho? ⁸ Awasia nihuahu ya’i ahi’i osa uteh i totumu. Awa Hukum Torat ahi’i humua kelewaboho? ⁹ Awahem asuang i Hukum i Musa bewatih: Na’de how sumeben i mbaba i sapi karengan sia manando-nando i gandum bo lumepot imbua’i gandum. Awa sapi e pilahen i Ninggumelêd? ¹⁰ Suma kita panutu’un i Tuhan? Eyem tanu hita ni’aho mbewatih, awahem tapawitad ahi’i toro satahi’i mitad osa maharaw mero-merotange tumirima sia i lokona. ¹¹ Kawalian sa hamitahula i marut’em i mbibit rohani tanu hamotahula, pantas sa hamitahula manguwe i mbua’i mbaoi toba ihamotahula. ¹² Sa tow balina bana hak tanu mongea asia mange behamotahula, awa ahi hamitahula bana hak lebe wako? Sumata’ kamitahula ahi’i manuntut i hak iboho. Iwalengai kamitahula lumihud i pahasa, saniboho hamitahula ahi’i maindo kohapil asakum sumahai i ninjil Kristus. ¹³ Awa ahi’i hailahan i hamotahula, awahem silatahula e masali andalem i lesad lenas mahaere penonowana a lesad lenas i boho bo awehem silatahula e masali i mezbah, mahaere beteng ilatahula a mezbah i boho. ¹⁴ Keleaboho hahi si Tuhan i tumatum, awahem silatahula masahai i ninjil ahi’i toro sa tahi’i menonow a sakumen mapasahai i kukua i boho. ¹⁵ Sumata’ ahi’i ahu mahasa manuntut mande esa a hak iboho. Ahi’i ahu imatihi pahasa i’ai saniboho ahu tuliden keleaboho apa’an ahu lebe mabog mate ende katala’an kobeatan ulit, kobeataiku alahem do’na mawasondo mande siseiange. ¹⁶ Kawalian asakum ahu sumahai i ninjil, alahemoho podalehan ahu motombag. Apa-apaan pahasa i boho ahi toro satahi’i tulideiku. Mawasilaka i’ahu, satahi’i ahu sumahai i ninjil. ¹⁷ Sawo i ande-ande ahu tumulid ihi’itku beahu mio, awahem mahasa ahu tumirima i mbaer i lokohu.Sumata apa’an ahu tumawoi ahi’i ihi’itku beahu, sumahai i boho awahem niaho tawoyen bewawa-waluha beahu. ¹⁸ Sahelewa’aho awasia mbaer i lokohu? Awahem baer i lokohu? Awahem baer i lokohu kelewa’i awehem ahu do’na i sumahai i ninjil ahi’i teka i mbaer iloko, bo awahem ahu ahi’i manuntut i boho nbaer i loko sateng i sumahai i ninjil. ¹⁹ Mande apa-apaan ahu pêrei a pahasa tow, sumata’ tulideiku mbatangaiku babu a pahasa tow, saniboho ahu doro’na mutung mahaere tow tado’o. ²⁰ Keleaboho hahi silahatahula i tow Yahudi siahu mamoali kele tow i Yahudi, saniboho utungeiku ni’ange mangatow i Yahudi.Tanu manga tow menonow ambawa’i Torat ahu mamoali kele tow menonow ambawa ‘i Hukum Taurat, mande apa-apa’an ahu hi’i menonow ambawa,i Hukum Torat. ²¹ Tanu manga tou ahi’i menonow ambawa’i Hukum torat siahu mamoali kele manga tow ahi’i menonow a hukum torat, mande apa-apa’an ahu hi’i menonow a luar i hukum Allah, apa-apa’an ahu menonow ambawa hukum Kristus , saniboho ahu do’na mutung besilatahula a tahi’i menonow ambawa hukum torat. ²² Tanu silatahula i mangatow kawel siahu mamoali hahi kele silatahula i tow kawel, saniboho ahu do’na mawalowid si latahula i kawel. Tanu pahasa tow ahu imamoalim lo lowna, saniboho ahu do’na mahaere utung besilatahula mande tahulamange. ²³ Pahasa i boho tulideiku apa’an i ninjil saniboho ahu mahaere baer i loko. ²⁴ Awa ahi’i halahan i hamotahula, awahem a suang i lesad papesimna’an pahasa tow mahi wekalas malolah, sumata bati’esa tow mahaere pereseng? Kawalian malolah mahawe’e saniboho hamotahula mahaere têtêh. ²⁵ Pahasa tow ilumas apesimba’an iboho, mawa ete imbatangan apahasa pawasian. Tumulid silatahula keleaboho saniboho silatahula mahaere balalugi poho, sumata kita tanu mahaere balalugi telas. ²⁶ Kawalian iboho ahi’i ahu malolah sa alahem panutu’un bo siahu ahi’i osa tapedihu sabarangan dumihu. ²⁷ Sumata ‘ahu lumatih imbatangaiku bo kumuasa i pahasa, saniboho i haworus aho sumahai i ninjil a towalina ahi’i ahu itulud i latahula.