¹ Pahasa i hita mahailah asia niaho pasil. Kita i pahasa daket binean uteh. Kawahuteh iboho tumulid i tow mamoali matombag, sumata beles momangun. ² Sa wana tow mapakua sia wandei, awahêm sia alawe beutêhan, kelembisa o’on ni’aho tanu sisia. ³ Sumata’ tow mahalês i Ningumêlêd, kahilala’an i Ningumêlêd sia. ⁴ Asakum kakanên benjo pasil kailahan nio i hita; alahêmoho ni’aho allah balina i walina Allah Ningumêlêd, Empung Ba’ilan. ⁵ Apa’an tado’o mange tow mapakua awahêm tado’o kiong a sorga suma ambaoi toba. ⁶ Sumata kailahanio i hita awahêm bati’esa Ningumelêd awo boho Bapa itumulid i pahasa. Kita menonow tanu si Sia. Bo Ningumêlêd bati’êsa hahi, awa’aho Yesus Kristus. Sisia i tumulid i pahasa, bo si Sia nimehe kaênowan be hita. ⁷ Sumata’ mande apa’an keleabo’ho, ahi’i pahasa tow mahailah iboho. Bana niaho tow atalewe ahadai wa’i mawa pasil a tahi’i wêlilahën. Kawalian asakum niholo ahadai i’ai talewe silatahula mangutêh awahêm kakanên be wasil, awahêm kakanên i tahi’i wêlilahên. ⁸ Awahêm kakanên ahi’i me’ang ihita lebe hasusut a Ningumêlê. Alahemoho dugima, sa hita ahi’i human bo alahêm lebena sa hita ahi’i human niaho pasil. ⁹ Kawalian ate-aten noho, sa niboho ahi’i maindo ureng besilatahula itow hawel. ¹⁰ Apa’an sa wana tow melidah i how bana koitauan osa dumatuh bo kuman i a’ho bewasil, awahêm tow hawel kawahutê’nga ihahi’it sia kuman i aho be wasil. ¹¹ Keleaboho hahi tow hawel, awa’aho pog’ngu awahêm Kristus i mate tanu sisia. Sa kawahemanu kawel pakiitan i tow walina mainjo hahi sia ihaureng. ¹² Sewogngu tumulid sea a kahele wog sarani, awahêm sihow hahi dumusah i kawaheman i latahula i kawel. ¹³ Kawalian i boho sa kakanên mawamoali itow a kaoroan, awahêm ahu tia’am kuman i keted iboho. Saniboho e pogku ahi’i kaoroan apa’an tatawoihu.