¹ I’ai talewe awahêm Komba Tutuh. IhabogKu, mangapong, saniboho kamotahula mahailah i kabenaranna. ² Kailahan ihamotahula, awahêm tepo hamotahula awe mahailah i Ningumêlêd, kamotahula ahi’i mapikir kinasem a manga berhala wowo’. ³ Kawalian iboho iwawaemaiku behamotahulu, awahêm alahêmoho êsa tow mawapohodait asakum tutuh i Ningumeled, bo alahemoho esa tow mangaku: Yesus awahêm sulo, iwalina monggongguot. ⁴ Bana komba’morowalina sumata êsa tutuh. ⁵ Manga morowalina pêsalian, sumata Tuhan bati’êsa. ⁶ Bo tado’o ni’aho patuli’dên ilatahula mahaunggangan, sumata’pahasa i boho Ningumêlêd i tumulid a pahasa tow. ⁷ Sumata’awahêm manga totumu binean komba bo tutuh tanu kasêritan i pahasa. ⁸ Apa’an tanu a nêsa tow tutuh iboho mehe komba’tanu mohoda-hodait teka kaêna’an, bo siseiange tutuh i boho mehe komba’mohoda-hodait i pangartian. ⁹ Tanu tow ê tow êsa tutuh i boho mehe saniboho maheman, bo a tow balina beabNa komba’ tanu mawawemauleng. ¹⁰ Keleaboho hahi ê tow êsa beana hahi imbahut tanu matulid kohomba, bo tow balina hahi beana komba’tanu manobuat, balina hahi beanNa komba tanu mawa udui moro walina tutuh. A nêsa tow beanNa komba’ tanu mawasilih i mbahasa tutu iboho. ¹¹ Sumata pahasa i’ai tinawoi tutuh iboho a nêsa bo mekele, osa mehe komba’ a manga tow awasia ni’aho kahabongen Na. ¹² Nde kelei kua bulingan iboho êsa sumata tado’o nanggota, bo pahasa anggota iboho manse apa-apa’an tado’o sumata êsa wuligan, keleaho hahi Kristus. ¹³ Apa’an asuang i nêsa tutuh kita i pahasa, molai mio tow i Yahudi, suma tow Yunani, maulêng ata, suma tow mobuhai, binaptisem anêsa wulingan bo kita i pahasa i luku ‘um a nêsa tutuh. ¹⁴ Apa’an bulingan iboho ahi’i wati’esa nanggota, sumata tado’o nanggota. ¹⁵ Sa wo i ande-ande a’e ahi’i esa wulingan, awasia ahi’i sumua-suang a nesa wulingan. ¹⁶ Kele aho hahi talinga kumua, awahêm ahu ahi’i wêlên, ahu hi’i sumua-suang a mbulingan, awa sia ahi’i sumua a mbulingan? ¹⁷ Sa wo i ande-ande bulingan pahasa bêlên, bisana e patanga’an? Sa wo i ande-ande pahasa talinga, bisana pakawowan? ¹⁸ Sumata Ningumêlêd i mehem a pahasa anggota, esa-esa beator Nam tampana kelembisa kahabogen Na. ¹⁹ Sa pahasa bati êsa nanggota bisana bulingan? ²⁰ Awahêm tado’o nanggota , bati esa bulingan. ²¹ Awahêm belen ahi’i humua a kam: Ahi’i ahu manguani i how. Suma kohong ahi’i humua a na’e. Ahi’i ahu manguani i how. ²² Walengai pahasa anggota imbuligan kawel awahem silatahula niitio papêrêlun. ²³ Yanasa pahasa anggota imbuligan asaa. Saangen nihita ahii panasiriin, beanihita sisiri silatahula. ²⁴ Pahasa anggota imbuligan pilahem ihita maulengen alahemoho wêrêlu beansiri. Awahem Ningumeled isumusunem imbuligan ihita mauleng ahad i manga anggota-anggota ahii pawasiriin bean silatahula sirilebe wako. ²⁵ Keleaboho hahi bulingan iboho ahi wobetetengan, sumata pahasa anggota mepeweilahan inesa bo walina. ²⁶ Sa esa anggota mahaere dai, pahasa anggota walina mahaere dai hahi, sa esa anggota pedayowen pahasa anggota hahi mahahelam iboho ndayow. ²⁷ Morowog pahasa ihita awehem buligan i Kristus osa kamatahula hahi anggota imbuligan niboho. ²⁸ Ningumeled itumatum iwetahula tow a jamaat : totolan kele rasul, karuana kele Nabi, kateluna kele tapasusui. Kalawusana silatahula mahaere komba tanu mapahe kohomba, tanu mapawawemauleng, mapesali, makolano bo mohoda-hodait a mbahasa tutuh. ²⁹ Awa silatahula i pahasa rasul, suma nabi, suma tapasusui? Awa silatahula i mahaere komba tanu mapahe kohomba? ³⁰ Suma mapawawemauleng, suma mohoda-hodait a mbahasa tutuh, suma mawasilih imbahasa tutuh? ³¹ Kawalian dumameji sarona mahaere komba waaho niaho niitio i penting. Osa beaiku how dalan lebe wenting kahi.