Matou-tou karengan e Roh
1
Tuana mouw en teakan reiy’la peukuman wia nisea se witu eng gorem ni Kristus Yesus.
2
Roh, e minee patou-touan minerdeka mola nikouw witu si Kristus waki e nukum dosa wo e nukum maut.
3
Karengan sapa e reiy’ wona’ tinuanala e nukum Taurat karengan e reiy’ mete’u kumura kaa e le’ona, en tinuana mola ni Empung. Ampit e lalan timoke si Oki-Na nuesa witu e le’ona, si mange’an ampit le’ona si kinuasa’an en dosa karengan en dosa. Nisia si minee mola ukuman witu en dosa witu eng gorem e le’ona,
4
rio em pengiween e nukum Taurat linekepla witu nikita, si reiy’ matou-tou i ki’it e le’ona, ta’an i ki’it e Roh.
5
Karengan nisea se matou-tou i ki’it e le’ona, se maghenangla eng kapualitan-kapualitan waki le’ona; nisea se matou-tou i ki’it e Roh, se maghenangla eng kapualitan-kapualitan waki Roh.
6
Karengan eng kepa’aran e le’ona nyi’a mouw e maut, ta’an eng kepa’aran e Roh nyi’a mouw em patou-touan wo en dame sejahtera.
7
Karengan eng kepa’aran e le’ona nyi’a mouw em pe’isingan witu si Empung, karengan nisia si reiy’ tu’utuk witu e nukum ni Empung; eng kapualitan i yi’i memang wo’o wona’ reiy’ i wee nisia.
8
Nisea se matou-tou witu e le’ona, se reiy’ wona’ mekepa’aren wia si Empung.
9
Ta’an nikouw kouw reiy’ matou-tou witu e le’ona, ta’an i te witu e Roh, sa memang e Roh ni Empung minena’ witu eng gorem miouw. Ta’an sa sitou reiy’ makapunyala e Roh ni Kristus, nisia si reiy’ kapunya’an ni Kristus.
10
Ta’an sa si Kristus si witu eng gorem miouw, takar e nouwak memang mate karengan en dosa, ta’an e Roh nyi’a mouw em patou-touan karengan eng kaulitan.
11
Wo sa e Roh Nisia, si timo’orola si Yesus witu nelet ne tou minate, minena’ witu eng gorem miouw, takar Nisia, si timo’orola si Kristus Yesus witu nelet ne tou minate, si laa tumoula kangkasi e nouwakmu fana i ti’i kaa e Roh-Na, minena’ witu eng gorem miouw.
12
Jadi, patuari waya, nikita nyi’a mouw ta tou minutang, ta’an reiy’ witu e le’ona, rio matou-tou i ki’it e le’ona.
13
Karengan, sa kouw matou-tou i ki’it e le’ona, nikouw kouw laa mate; ta’an sa karengan e Roh kouw mepatela em pasiwo-siwon – pasiwo-siwon e nouwakmu, nikouw kouw laa tumou.
14
Em baya ne tou, si pa’aka-aka’an e Roh ni Empung, nyi’a mouw sioki’ ni Empung.
15
Karengan nikouw kouw reiy’ simungkul e roh pabudakan en simiwo nikouw meide’la kasi, ta’an nikouw kouw simungkulola e Roh simiwola nikouw oki’ ni Empung. Kaa e Roh i ti’i o kita maaleiy: “Ya Abba, ya Ama’!”
16
E Roh i ti’i en simairi mewali-wali ampit e roh ta, kaa nikita nyi’a mouw kita oki-oki’ ni Empung.
17
Wo sa nikita nyi’a mouw sioki’, takar nikita kangkasi nyi’a mouw kita ahli waris, e maksudna se tou-tou mekehak sumungkul en ta’ar-ta’ar ni Empung, si laa sumungkul nyi’a mewali-wali ampit si Kristus, nyi’a i ti’i sa kita peme’itan mewali-wali ampit Nisia, rio nikita kangkasi kita lino’orla mewali-wali ampit Nisia.
18
Karengan niaku ku ma’eman, kaa em peme’itan zaman en teakan i yi’i reiy’ mete’u pasuaten ampit eng kalo’oran e laa i papaloo’o-loo’ola wia nikita.
19
Karengan ampit eng kasa lumelo se minapekasa makhluk se ma’ena’la e nedo se oki-oki’ ni Empung se i papaloo’o-loo’ola.
20
Karengan se minapekasa makhluk se neiy mouw i tu’utukla witu e reiy’ si penoron, reiy’ kaa eng kepa’aranna nuesa, ta’an kaa eng kepa’aran-Na, si timu’utukola nyi’a,
21
ta’an witu em paarapen, karengan se makhluk i ti’i nuesa kangkasi se laa i merdekala witu em pabudakan kapunengan wo ghumorem witu eng gorem kamerdeka’an eng kalo’oran ne oki-oki’ ni Empung.
22
Kaa nikita ta mete’u, karengan i ka’ayomi en teakan se reiy’ sa mina’asa makhluk mewali-wali menga’angal wo mewali-wali mape’an rumara matimea’.
23
Wo reiy’kan nisea i te, ta’an nikita si simungkulola eng karunia polon e Roh, nikita kangkasi ta menga’angal witu e nate ta kasuatan ma’ena’la em pepepopoan tanume sioki’, nyi’a i ti’i em pewewaya’an e nouwak ta.
24
Karengan nikita ta linawirla witu em paarapen. Ta’an em paarapen e linoo’,reiy’ mouw em paarapen kasi; karengan kumura sitou maarape’la kasi sapa e linoo’na?
25
Ta’an sa kita maarapla sapa e linoo’ ta, nikita ta ma’ena’la nyi’a ampit en tentem.
26
Tuanakan kangkasi e Roh en sumawang nikita witu eng kalewea’an ta; karengan nikita ta reiy’ mete’u, kumura e nulitna ta lewo’ sa reiy’ sumombayang; ta’an e Roh nuesa masombayang i wee nikita wia si Empung ampit e nga’angal-nga’angal reiy’ katotoran.
27
Wo si Empung si kimumisila e nate nurani, si mete’ula maksud e Roh i ti’i, nyi’a i ti’i kaa Nisia, si minatoroan ampit eng kepa’aran ni Empung, si masombayang i wee se tou-tou kudus.
28
Nikita ta mete’u en teakan, kaa si Empung si kimi’it mepa’ayang witu e reiy’ sa mina’asa wo’o sapa kaa laa mapa eiyla eng kale’osan i wee nisea se meupusla Nisia, nyi’a i ti’i wia nisea se kinakeretan minatoroan ampit e rencana ni Empung.
29
Karengan em baya ne tou se pineleng-Na wakipe’ ketareanna, nisea kangkasi se neiy i tantu-Nala wakipe’ ketareanna kaa se laa mamuali mange’an ampit eng gambaran ni Oki’-Na, rio Sia, si Oki’-Na i ti’i si mamuali polon witu e nelet ne laker patuari.
30
Wo nisea se neiy i tantu-Nala wakipe’ ketareanna, nisea i ti’i kangkasi se kineret-Na. Wo nisea se kineret-Na, nisea i ti’i kangkasi se neiy i ulit-Nala. Wo se neiy i ulit-Nala, nisea i ti’i kangkasi se lino’or-Nala.
31
Kaa ni’itu, sapa ku’a re’en e laa i pelelila’ tala tanume em baya nyi’a i ti’i? Sa si Empung si witu e weteng ta, seiy ku’a re’en si laa sumaru nikita?
32
Nisia, si reiy’ mineupusla si Oki’-Na nuesa, ta’an si simarakan Nisia i wee nikita nu waya, kumura mouw wona’ o Sia reiy’ kumaruniala e reiy’ sa mina’asa wo’o sapa wia nikita nu mewali-wali ampit Nisia?
33
Seiy ku’a re’en si laa kumulitik se tou-tou pineleng ni Empung? Empung, si minulitla nisea? Seiy ku’a re’en si laa mukum nisea?
34
Kristus Yesus, si minate mouw? Awes tare e lebepe’ kasi: si timo’orouw, o kangkasi si rimuber witu esa nga weka lele’os ni Empung, awes tare si minamuali Rumerapit i wee nikita?
35
Seiy ku’a re’en si laa tuma’atasla nikita witu e nupus ni Kristus? Em palotoiyan ka’apa eng kase’esekan ka’apa em pasiasa’an, ka’apa eng kelalenan ka’apa eng kalengatan, ka’apa em bahaya, ka’apa en santi?
36
Tanu wawean neiy i kepatik:
“Kaa eng karengan Nikoo nikeiy keiy witu em bahaya maut eng kelabotan ni endo, nikeiy keiy linoo’ mouw tanume se domba-domba pareretan.”
37
Ta’an witu em baya nyi’a i ti’i nikita ta lumantouwla wia se tou-tou minuntung, kaa Nisia si mineupusola nikita.
38
Karengan niaku ku ma’eman, kaa le’os e maut, ka’apa tu’u em patou-touan , le’os se malaikat-malaikat, ka’apa tu’u se pemerenta-pemerenta, le’os se wia en teakan, ka’apa tu’u se laa meiy,
39
ka’apa eng kuasa-kuasa, le’os waki atas, ka’apa tu’u wia em bawa’, ka’pa tu’u siesa makhluk walina, se reiy’ laa mete’u tuma’atasla nikita waki upus ni Empung, witu eng gorem ni Kristus Yesus, Tuhan ta.