Penoron e nukum Taurat ¹ Sapa ku’a re’en kouw reiy’ mete’u, patuari waya, - karengan niaku ku simusuiyla wia nisea se mete’ula e nukum – kaa e nukum makakuasa wia siesa nga touan eng keurean sitou i ti’i nu matou-tou? ² Karengan siesa tu’awewene si neiy i kewa’akes witu e nukum wia si tu’atuamana eng keurean si tu’atuamana nu matou-tou. Ta’an laa sakawisa si tu’atuamana i ti’i mate, nisia si neiy mouw i kewaya witu e nukum mina’akes nisia witu si tu’atuamana i ti’i. ³ Jadi eng keurean si tu’atuamana i ti’i nu matou-tou nisia si’i papokeiyla masiwo en zinah, sa sia mamuali tu’awewene ne tuama walina; ta’an sa si tu’atuamana si minate mouw, nisia si neiy i kewayami witu e nukum, i ka’ayo sia si reiy’ mouw makazinah, sa sia mamuali tu’awewene ne tuama walina. ⁴ Kaa ni’itu, patuariku waya, nikouw kangkasi kouw minate mouw i wee e nukum Taurat kaa e nouwak ni Kristus, rio kouw mamuali kapunya’an ne tou walina, nyi’a i ti’i kapunya’an-Na, si tino’orla witu nelet ne tou minate, rio kita mua’ i wee si Empung. ⁵ Karengan e nedo nikita nu matou-toupe’ witu le’ona, serit en dosa, rineinseng e nukum Taurat, mepa’ayang witu e weteng-weteng e nouwak ta, rio kita mawu’ala i wee e maut. ⁶ Ta’an en teakan nikita ta neiy mouw i wayala witu e nukum Taurat, karengan nikita ta minate mouw i wee nisia, si kimurung nikita, i ka’ayo kita en teakan ta melayanla witu eng ka’ada’an weru i ki’it e Roh wo reiy’ witu eng ka’ada’an ure i ki’it e nurup ukum Taurat. ⁷ Sa tuana, sapa ku’a re’en e laa i pelelila’tala? Sapa ku’a re’en e nukum Taurat i ti’i en dosa? Ma’an mekasa reiy’! Eng kapurikitna, awes tare kaa e nukum Taurat niaku ku simine’u mouw en dosa. Karengan niaku kangkasi ku reiy’ mete’u sapa i tu eng kepa’aran, sa e nukum Taurat reiy’ limila’la: “Te’a mepepa’arla!” ⁸ Ta’an witu em perenta i ti’i en dosa minaka’ato kalempotan kaa laa meteto’orla witu en touku e reiy’ sa mina’asa kepa’aran; karengan reiy’ ampit e nukum Taurat en dosa minate. ⁹ Ketareanna niaku ku matou-tou reiy’ ampit e nukum Taurat. Ta’an laa ni’itu nu mineiy mouw em perenta i ti’i, en dosa muleiy tumou, ¹⁰ Eng kapurikitna niaku ku minate. Wo em perenta e lewo’ sa reiy’na mali witu em patou-touan, neiy pakaloo’o-loo’ongkula awes tare e mali witu em patean. ¹¹ Karengan witu em perenta i ti’i, en dosa minaka’ato kalempotan kaa mewewiles niaku wo kaa em perenta i ti’i nisia si munu’ niaku. ¹² Jadi e nukum Taurat nyi’a mouw eng kudus, wo em perenta i ti’i kangkasi nyi’a mouw eng kudus, ulit wo le’os. ¹³ Sa tuana, wawean ku’a re’en e le’os i ti’i mamuali patean i wee niaku? Ma’an mekasa reiy’! Ta’an rio pakaloo’o-loo’ola, kaa nisia nyi’a mouw en dosa, takar en dosa minakipakela e le’os kaa laa mapa eiy em patean i wee niaku, rio kaa em perenta i ti’i en dosa e lebepe’ pakaloo’o-loo’ola kasi eng ka’ada’anna tanume en dosa. ¹⁴ Karengan nikita ta mete’u, kaa e nukum Taurat nyi’a mouw e rohani, ta’an niaku ku makasifat le’ona neiy i kewangker witu wawa’ eng kuasa dosa. ¹⁵ Karengan sapa em pasiwongku, reiy’ kete’uangku. Karengan reiy’ sapa eng kepa’arangkula em pasiwongku, ta’an en sapa ni’i kari’irisku, ni’itu mouw em pasiwongku. ¹⁶ Jadi sa aku masiwola sapa e reiy’ kepa’arangkula, niaku ku miyonla, kaa e nukum Taurat i ti’i e le’os. ¹⁷ Sa tuana reiy’ mouw niaku kasi si mesesiwo nyi’a, ta’an en dosa witu eng goremku. ¹⁸ Karengan niaku ku mete’u, kaa witu niaku, nyi’a i ti’i witu niaku ku tanume sitou, reiy’la wo’o sapa e le’os. Karengan eng kepa’aran memang wawean witu niaku, ta’an reiy’ eng kapualitan mesesiwo sapa e le’os. ¹⁹ Karengan reiy’ sapa eng kepa’arangkula, nyi’a i ti’i e le’os, en siniwokula, ta’an i te en sapa e reiy’ i kepa’arkula, nyi’a i ti’i e lewo’, pasiwongku. ²⁰ Jadi sa aku masiwola sapa e reiy’ kepa’arangkula, takar reiy’ kasi niaku si masiwola nyi’a, ta’an en dosa minena’ witu eng goremku. ²¹ Tuana mouw niaku minatola e nukum i yi’i: sa aku mepa’arla sumiwo sapa e le’os, e lewo’ i ti’i em bia niaku. ²² Karengan witu eng gorem em batinku niaku ku pa’ar e nukum ni Empung, ²³ ta’an witu eng gorem e weteng-weteng nouwakku niaku ku limoo’ e nukum walina mame’inakut masu’usuk e nukum akal budiku wo en simiwo niaku minamuali tawanan e nukum dosa witu eng gorem e weteng-weteng nouwakku. ²⁴ Niaku, ku tou cilaka! Seiy ku’a si laa rumeta’la niaku witu e nouwak maut i yi’i? ²⁵ Syukur wia si Empung! Kaa si Yesus Kristus, Tuhan ta. ²⁶ Jadi ampit e akal budiku niaku ku melayanla e nukum ni Empung, ta’an ampit e nouwak en touku niaku ku melayanla e nukum dosa.