Wua’na em peulitan ¹ Kaa ni’itu, nikita si neiy i ulitla karengan e iman, kita matou-tou witu en dame sejahtera ampit si Empung eng karengan si Tuhan ta, Yesus Kristus. ² Kaa Nisia nikita kangkasi ta minaka’ato lalan ghumorem kaa e iman wia e nupus karunia i yi’i. Witu e nupus karunia i yi’i kita rumedeiy wo kita sumawa’ witu em paarapen laa sumungkul eng kalo’oran ni Empung. ³ Wo reiy’ kaa ni’itu i te. Nikita ta awes tare sumawa’ kangkasi witu em peme’itan ta, karengan nikita ta mete’u, kaa em peme’itan i ti’i malentutla katenteman, ⁴ wo eng katenteman malentutla ketaangan wo eng ketaangan malentutla em paarapen. ⁵ Wo em paarapen e reiy’ makasenso’on, karengan e nupus ni Empung neiy mouw i wu’uwusla witu eng gorem e nate ta kaa e Roh Kudus neiy mouw i karuniala wia nikita. ⁶ Karengan e nedo nikita nu lewea’pe’, Kristus si minate mouw i wee nikita nu tou-tou durhaka witu e nedo neiy mouw i tantula ni Empung. ⁷ Karengan reiy’ gampang siesa tou pa’ar mate i wee se tou ulit – ta’an wona’ i wee se tou le’os wawean tou se berani mate - . ⁸ Ta’an laa si Empung si minapa’atola e nupus-Na wia nikita, eng karengan si Kristus si minate mouw i wee nikita, katoroan nikita nu maka dosape’. ⁹ Lebe-lebe, karengan nikita en teakan ta neiy mouw i ulitla karengan e raa’-Na, nikita ta tantu laa lawiren witu e nupi’ ni Empung. ¹⁰ Karengan sa wona’ kita, katoroan ta makasu’usuke’, ta pinedamela ampit si Empung kaa em pinatean ni Oki’-Na, awes tare nikita, en teakan ta pinedame mola, tantu ta laa lawiren kaa em patou-touan-Na! ¹¹ Wo reiy’kan e ni’itu i te! Nikita ta awes tare sumawa’ witu si Empung kaa si Yesus Kristus, Tuhan ta, karengan kaa Nisia o kita simungkulouw em pinedamean i ti’i. ¹² Kaa ni’itu, masuat tanu en dosa gimoremouw wia eng gorem eng kaoatan kaa niesa tou, wo kaa en dosa i ti’i kangkasi e maut, tuana mouw e maut i ti’i minanapouw wia em baya ne tou, karengan em baya ne tou se simiwo mouw en dosa. ¹³ Karengan nu reiy’pe’ e nukum Taurat wia, waweanouw dosa wia eng kaoatan. Ta’an en dosa i ti’i reiy’ neiy i parekenla sa reiy’la e nukum Taurat. ¹⁴ Ma’anouw tu’u tuana e maut eng kimuasa mouw waki zaman ni Adam i ka’ayomi en zaman ni Musa o kangkasi witu nisea, se reiy’ masiwo en dosa ampit eng kenaramen masuat tanu en siniwo mola ni Adam, nyi’a mouw eng gambaran Nisia si laa meiy. ¹⁵ Ta’an eng karunia ni Empung reiy’ masuat ampit eng kaselokan ni Adam. Kaa, sa karengan eng kaselokan niesa tou em baya ne tou se neiy mouw i kawolon witu eng gorem eng kuasa maut, wa’akat lumantouwla eng kasela kasi e nupus karunia ni Empung wo eng karunia-Na, neiy i wura’arak-Nala wia em baya ne tou karengan siesa tou, nyi’a i ti’i si Yesus Kristus. ¹⁶ Wo e nupus karunia reiy’ minaimbangan ampit en dosa niesa tou. Karengan em paakiman witu e nesa kaselokan i ti’i minua’ mola peukuman, ta’an em pa’anugerahan eng karunia witu e laker kaselokan i ti’i minua’la paulitan. ¹⁷ Kaa, sa karengan en dosa niesa tou, maut eng kimuasa mouw kaa siesa tou i ti’i, takar lebe ulite’ kasi nisea, se simungkulouw eng kalokonan e nupus karunia wo e anugerah kaulitan, si laa tumou wo kumuasa karengan siesa tou i ti’i, nyi’a i ti’i si Yesus Kristus. ¹⁸ Kaa ni’itu, masuat tanu kaa e nesa kaselokan em baya ne tou se maka’ato em peukuman, tuanakan kangkasi kaa e nesa pasiwo-siwon kaulitan em baya ne tou se maka’ato em paulitan kaa laa tumou. ¹⁹ Jadi masuat tanu kaa e reiy’ kelale’an niesa tou em baya ne tou se minamuali mouw tou makadosa, tuanakan kangkasi kaa eng kelale’an niesa tou em baya ne tou se minamuali tou ulit. ²⁰ Ta’an e nukum Taurat neiy i awesla, rio eng kaselokan mekelakerla; wo witu wisa en dosa maawes eng kelaker, maname e nupus karunia minakaloko-lokonla, ²¹ rio, masuat tanu en dosa makuasa witu alam maut, tuana mouw e nupus karunia laa kumuasa kaa eng kaulitan kaa laa tumou kekal, kaa ni Yesus Kristus, Tuhan ta.