Kelale’an wia se pemerenta ¹ Susur tou si lewo’ sa reiy’ tu’utuk wia si pemerenta witu natasna, karengan reiy’la si pemerenta, si reiy’ asal waki si Empung; wo se pemerenta-pemerenta wia, se neiy i tantula ni Empung. ² Kaa ni’itu seiy i te si masu’usuk se pemerenta, nisia si masu’usuk eng katantuan ni Empung wo seiy si matuanala nyi’a, nisia si laa mapa eiy e nukuman witu en touna. ³ Karengan sa siesa tou simiwo e le’os, nisia si reiy’ mouw toro meide’ wia si pemerenta, ta’an sa sia masiwo lewo’, Pa’ar ku’a re’en koo tumou reiy’la si ide’na wia si pemerenta? Siwonola sapa e le’os wo kouw laa maka’ato e lo’or witu nyi’a. ⁴ Karengan si pemerenta nyi’a mouw si hamba ni Empung i wee eng kale’osannu. Ta’an sa koo masiwo lewo’, meide’ mola nisia karengan reiy’ percuma si pemerenta minaweiy en santi. Pemerenta nyi’a mouw si hamba ni Empung kaa laa mesesuli’la e nupi’ ni Empung wia nisea se masiwo lewo’. ⁵ Kaa ni’itu mepadung ki ta tumu’utukla en tou, reiy’kan i te kaa e nupi’an ni Empung, ta’an kangkasi karengan en suara nate ta. ⁶ Ni’itu mouw kangkasi eng karenganna takar kouw mawear em pajak. Karengan nisea se meurus eng kapualitan i ti’i nyi’a mouw se pelayan-pelayan ni Empung. ⁷ Wearenouw wia em baya ne tou sapa e lewo’ sa reiy’ wearen niouw: em pajak wia sitou mekehak maka’ato em pajak, cukai wia sitou mekehak maka’ato en cukai; em pedaman meide’ wia sitou mekehak maka’ato em pedaman meide’ wo e normat wia sitou mekehak maka’ato e normat. ⁸ Te’a mouw kouw me’utang sapa-sapa wia si seiy i te tu’u kangkasi, ta’an satorona kouw mengengupusan. Karengan seiy i te si meupusla si kasuatna en tou, nisia si kimelangola e nukum Taurat. ⁹ Karengan e nuwu’: te’a masiwo en zinah, te’a mawunu’, te’a marongkit, te’a mepepa’arla wo e nuwu walina sapa tu’u kangkasi, neiy mouw i kakokulu witu e nuwu’ i yi’i, nyi’a i ti’i: I koupusola si kasuat en toumu tanukan en toumu nuesa! ¹⁰ Nupus e reiy’ masiwo lewo’ wia si kasuat en tou, kaa ni’itu e nupus nyi’a mouw eng kalekepan e nukum Taurat. ¹¹ Eng kapualitan i yi’i e lewo’ sa reiy’ tuanannula, karengan nikouw kouw mete’u eng ka’ada’an e nedo en teakan, nyi’a i ti’i kaa e nedona mina’ayo mouw i wee nikouw kaa laa mawongke witu en tekel. Karengan en teakan eng kelawiran lebe mouw tawi i wee nikita ta’an i te witu e nedo nikita nu mina’eman. ¹² E nendo eng kasa mouw wengi, tawi mouw maoat. Kaa ni’itu meiy mouw kita lumengatla em pasiwo-siwon kareiydeman wo pakenola eng kalekepan en senjata terang! ¹³ Meiy mouw kita tumou ampit en sopan, tanu witu e nendo oat, te’a witu em pelesir wo en tetoekan, te’a witu em pesa’amekan wo eng hawa nafsu, te’a witu em pesali’isi’an wo iri ate. ¹⁴ Ta’an pakenola si Tuhan Yesus Kristus tanume eng kalekepan en senjata terang wo te’a mouw me’urus en toumu kaa laa makiteu-teula eng kepa’aranna.