Sesempe e nulit ¹ Kaa ni’itu, patuari waya, demi eng kamura’an ni Empung niaku ku ngume’enge’la nikouw, rio kouw sumempela e nouwakmu tanume en sesempe matou-tou, eng kudus wo mekepa’aren wia si Empung: ni’itu mouw e raghesmu sejati. ² Te’a mouw koo mamuali mange’an ampit eng kaoatan i yi’i, ta’an maroba mouw kaa em peweweruan em budimu, i ka’ayo kouw mete’u mememange’anla wisa ku’a re’en eng kepa’aran ni Empung: sapa e le’os, mekepa’aren wia si Empung wo reiy’ siperoan. ³ Timo’otolela witu e nupus karunia neiy i anugerahla wia niaku, niaku ku lumila’me wia se susur tou witu nelet miouw: Te’a mouw kouw maghenangla eng kapualitan-kapualitan lebe rakek ta’an witu e waar ghenangen niouwla, ta’an satorona kouw ghumenangla en tuana rupa, i ka’ayo kouw kumuasala en tou i ki’it e nukuran iman, neiy i karuniala ni Empung wia nikouw siesa o siesa. ⁴ Karengan masuat tanu witu e nesa nouwak ta makapunyala kelaker weteng, ta’an reiy’ waya em beteng i ti’i makapunya lukar masuat, ⁵ tuanakan kangkasi nikita, ma’anouw tu’u kelaker, nyi’a mouw ta esa nouwak witu si Kristus; ta’an nikita siesa o siesa nyi’a mouw ta weteng niesa wia se walina. ⁶ Tuana mouw nikita ta makapunya karunia minegheghioan i ki’it e nupus karunia neiy i anugerahla wia nikita: Sa eng karunia i ti’i nyi’a mouw kaa laa mewewenti’ le’osouw kita tumuanala nyi’a minatoroan ampit e iman ta. ⁷ Sa eng karunia kaa laa melelayanla, le’osouw kita lumayanla; sa eng karunia kaa laa mewewee teturu’, le’osouw kita mee teturu’; ⁸ sa eng karunia kaa laa mengenge’enge’la, le’osouw kita ngume’enge’la. Seiy si memete-metengla wo’o sapa, satorona sia si matuanala nyi’a ampit e nate ikhlas; seiy si minee pa’aka-aka’an, satorona nisia si matuanala nyi’a ampit e rajing; seiy si mapa’atola eng kamura’an, satorona nisia si matuanala nyi’a ampit e mepa’a-pa’ar. ⁹ Satorona e nupus i ti’i te’a towo-towo! Wa’akaten e lewo’ wo tuananola e le’os. ¹⁰ Satorona kouw me’upusan tanume si patuari wo mererioran witu mawee ormat. ¹¹ Te’a mouw satorona eng kerajingannu eng kumo’okos, ma’anouw e rohmu melaya-layas wo layanenouw si Tuhan. ¹² Mepa’a-pa’arola witu em paarapen, sumabaarouw witu eng kase’esekan, wo tumentemouw witu en sesombayangen! ¹³ Sawangenouw witu eng kakurangan ne tou-tou kudus wo pe’inakutenola en toumu laa reiy’ maena-ena’ maweela tete’upan! ¹⁴ Berkatenola seiy si simiasa nikoo, berkatenola wo te’a makutok! ¹⁵ Mepa’a-pa’arola ampit se tou mepa’a-pa’ar, wo mame’ mouw ampit se tou maame’! ¹⁶ Satorona kouw esa nga ate esa nga ghenang witu em patou-touannu mewali-wali; te’a mouw kouw maghenangla em perkara-perkara rakek, ta’an i pakatoro mola en toumu witu em perkara-perkara rinda. Te’a mouw mapokeiyla en toumu pande! ¹⁷ Te’a mouw masuli’la eng kalewo’an ampit eng kalewo’an; tuananola sapa e le’os i wee em baya se tou! ¹⁸ Satoro-torona, sa eng kapualitan i ti’i kimayong wia nikoo, tumou mouw witu em pedamean ampit em baya ne tou! ¹⁹ Patuariku waya i koupus, te’a mouw kouw nuesa kouw makiwee em pasuli’an, ta’an weeanola tampa e nupi’ ni Empung, karengan wawean neiy i kepatik: Sesuli’an i ti’i eng hak-Ku. Niaku mouw si laa kumiwee en sesuli’an, e nuwu’ ni Empung. ²⁰ Ta’an sa si kesarumu si arem, weeanouw sia kumaan; sa sia re’o, weeanouw sia kumoo’! Ampit simiwo en tuana nikouw kouw rimurukla em baana napi witu natas eng kokongna. ²¹ Te’a mouw kouw kalah witu eng kalewo’an, ta’an kalanola eng kalewo’an ampit eng kale’osan!