Israel mokan ¹ Takar niaku ku mawueiy: Sapa ku’a re’en si Empung si wo’o wona’ simede’ mola se umat-Na? Ma’an mekasa reiy’! Karengan niaku nuesa tu’u ku tou Israel, witu en see’ ni Abraham, waki suku ni Benyamin. ² Empung si reiy’ masede’ se umat-Na pineleng-Na. Ka’apa ku’a re’en nikouw kouw reiy’ mete’u, sapa neiy i lila’la eng Kaol Suci en tanume si Elia, e nedo nisia nu sima’alila si Israel wia si Empung: ³ “Tuhan, se nabi-nabi-Mu se winunu’ nea mouw, e mezbah-mezbah-Mu neiy mouw i rewa neala; niaku mokan nu maesa-esa si matou-toupe’ wo nisea se pa’ar mesesawut e imukurku.” ⁴ Ta’an kumura ku’a re’en e nuwu’ ni Empung wia nisia? “Niaku ku timele’upe’la pitu nga riwu tou i wee-Niaku, se reiy’ ma’an mekasa maongkot masempe si Baal.” ⁵ Tuanakan kangkasi witu e nedo i yi’i wawean timele’u e nesa tele’u, i ki’it em pineleng e nupus karunia. ⁶ Ta’an sa eng kapualitan i ti’i mamuali karengan e nupus karunia, takar reiy’ mouw kasi kaa em pasiwo-siwon, kaa sa reiy’ tuana, takar e nupus karunia i ti’i e reiy’ mouw kasi upus karunia. ⁷ Jadi kumura? Israel si reiy’ minaka’ato sapa em pinekeki’itna, ta’an se tou-tou kinapelengan se minaka’ato mouw nyi’a. Wo se tou-tou walina se ente’ mouw e natena, ⁸ tanu wawean neiy i kepatik: “Empung si simiwo nisea re’erep en tekel, mineela em beren kaa laa reiy’ lumoo’ wo en talinga kaa laa reiy’ luminga, i ka’ayo witu nendo en teakan i yi’i.” ⁹ Wo si Daud si limila’: “Ma’anouw en sesakeiyan nea mamuali we’etes wo en torak, paseipan wo em pasuli’an i wee nisea. ¹⁰ Wo i waya mola em beren nea mareiydem, i ka’ayo sea reiy’ lumoo’, wo siwonouw e ru’ur nea reiy’ maena-ena’ mawengkur.” Israel neiy i kasu’usu’, bangsa-bangsa walina minelawir ¹¹ Takar niaku ku minueiy: Sapa ku’a re’en nisea se neiy i kasu’usu’ wo lewo’ sa reiy’ i ka’anu? Ma’an mekasa reiy’! Ta’an kaa eng kaselokan nea, eng kelawiran mina’ayo mouw wia se bangsa-bangsa walina, rio sumiwo nisea tumayur. ¹² Karengan sa eng kaselokan nea makapenoron kakaya’an i wee eng kaoatan, wo eng kareiy’awesan nea eng kakaya’an i wee se bangsa-bangsa walina, eng kasa lebe-lebepe’ kasi eng kalekepan nea. ¹³ Niaku ku lumila’me wia nikoo, hei bangsa-bangsa reiy’ Yahudi. Awes tare karengan niaku nyi’a mouw ku rasul i wee se bangsa-bangsa reiy’ Yahudi, niaku ku maloo’ola eng kapualitan i ti’i eng kalo’oran em pelayananku, ¹⁴ nyi’a i ti’i e wo’o wona’ niaku ku toro tumo’orla en tetayuren witu eng gorem e nate ne kaum kaa esa nge bangsaku i ki’it e le’ona wo toro lumawirla pirala tou wia nisea. ¹⁵ Karengan sa em pasede’an nea makapenoron padamean i wee eng kaoatan, toro ku’a re’en en sinungkulan nea makapenoronla walina waki patou-touan witu e nelet ne tou minate? ¹⁶ Sa wo’o wona’ e roti polon nyi’a mouw eng kudus, takar e minapekasa kinayo’an kangkasi eng kudus, wo sa wona’ eng kalat nyi’a mouw eng kudus, takar em pangana-pangana kangkasi eng kudus. ¹⁷ Kaa ni’itu sakawisa em pirala panga rinepu’ mola wo nikouw kouw tanume en suru siru neiy mouw i cangkokla witu e neletna wo i ki’it minaka’ato weteng witu eng kalat e nakana en zaitun minawuta en sering, ¹⁸ Te’a mouw koo sumawa’ witu em pangana-pangana i ti’i! Sa wo’o wona’ koo sumawa’, ghenangenouw, kaa reiy’ nikouw kouw matobol eng kalat i ti’i, ta’an i te eng kalat i ti’i matobol nikouw. ¹⁹ Wo’o wona’ kouw laa lumila’: wawean em pangana-pangana rinepu’la, rio ku i cangkokla witu e neletna tanume en suru. ²⁰ Le’osouw! Nisea se rinepu’la karengan e reiy’ kapa’emanan nea, wo nikouw kouw taga’ neiy i kepa’asek karengan e iman. Te’a mouw kouw tingkeiy, ta’an meide’ mola! ²¹ Karengan sa si Empung si reiy’ mineupusla em pangana-pangana tulen, Nisia kangkasi si reiy’ laa meupusla nikouw. ²² Kaa ni’itu weeanola ghenang eng kamura’an ni Empung wo kangkasi eng kaketean-Na, nyi’a i ti’i eng kaketean wia se tou-tou neiy mouw i ka’anu, ta’an wia nikouw eng kamura’an-Na, nyi’a i ti’i sa kouw minena-ena’ witu eng kamura’an-Na; sa reiy’, nikouw tu’u kouw laa ketoren kangkasi. ²³ Ta’an nisea tu’u se laa i cangkokla sumeup, sa sea reiy’ minena-ena’ witu e reiy’ kapa’emanan nea, karengan si Empung si makakuasa laa mececangkokla nisea sumeup. ²⁴ Karengan sa koo kinetoromi tanume em pangana waki akana en zaitun siru, wo minasu’usukan ampit eng ka’ada’annu i ti’i nikoo koo neiy mouw i cangkokla witu e nakana en zaitun sejati, sapape’ kasi nisea i yi’i, i ki’it e nasal nea se laa i cangkokla witu e nakana en zaitun nea nuesa. ²⁵ Karengan, patuari waya, rio kouw te’a mapokeiyla en toumu pande, niaku ku pa’ar rio kouw mamete’ula em pengiro-ngirong i yi’i: Esa nga weteng wia se Israel se mina kete ate mouw i ka’ayo eng kelakerna se wuta waki se bangsa-bangsa walina se ghimoremouw. ²⁶ Ampit e lalan tuana se minapekasa Israel se laa lawiren, tanu wawean neiy’ i kepatik: “Waki Sion laa meiy si Menenubuus, Nisia si laa sumingkirla e reiy’ sa mina’asa eng kalewo’an waki si Yakub. ²⁷ Wo nyi’i mouw en teta’aran-Ku ampit nisea, sakawisa Niaku nu rume’ila en dosa nea.” ²⁸ Tanume e Injil nea nyi’a mouw eng kesaru ni Empung kaa ni kouw, ta’an tanume em pineleng nea nyi’a mouw e nupus ni Empung kaa se nene moyang. ²⁹ Karengan si Empung si reiy’ simeselela e nupus karunia wo eng kineretan-Nisia. ³⁰ Karengan masuat tanu nikouw eng ketarean kouw reiy’ lale’ wia si Empung, ta’an en teakan minaka’ato kamura’an kaa eng kareiy’lale’an nea, ³¹ tuanakan kangkasi nisea en teakan se reiy’ lale’, rio kaa eng kamura’an kina’atoan niouw mola, nisea kangkasi se laa maka’ato kamura’an. ³² Karengan si Empung si kimurungouw em baya se tou witu e reiy’ kelale’an, rio Sia toro tumudu’la eng kamura’an-Na wia nisea nu waya. ³³ O, kumura ku’a re’en ee pasil eng keraremna eng kakaya’an, hikmat wo en tine’u ni Empung! E nuli-ulit reiy’ kaselidikan eng kaputusan-kaputusan-Na wo e nuli-ulit reiy’ keuntepan e lalan-lalan-Na! ³⁴ Karengan, seiy ku’a re’en si mete’ula eng genang ni Tuhan? Ka’apa seiy ku’a re’en si mekasa mouw Minamualila penasehat-Na? ³⁵ Ka’apa seiy mouw si mekasa mouw mineela wo’o sapa wia-Nisia, i ka’ayo Sia lewo’ sa reiy’ sumawelela nyi’a? ³⁶ Karengan e reiy’ sa mina’asa wo’o sapa e waki Nisia, wo kaa Nisia, wo wia Nisia: I wee Nisia mouw eng kamulia’an i ka’ayo eng keure-urena!