¹ Ni’itu nu limangkoiy mouw e nendo Sabat, Maria Magdalena wo si Maria ina’ ni Yakobus, ma’an si Salome se timeles e rerampa kaa se me’a waki kubur wo melelanala si Yesus. ² Wo memo’odope’ kasa witu e nendo kasa ketare en duminggu ni’itu, si endo nu rimetikouw, mea mouw sea waki kubur. ³ Nisea se meila’ siesa wia se walina: “Seiy si laa moloni em batu i ti’i i wee nikita waki pepalen eng kubur?” ⁴ Ta’an eng katoroan nisea nu limoo’la witu en tawi, kaloo’anola, em batu memang kasa sela i ti’i e minolonouw. ⁵ Laa o sea ghumorem witu eng gorem eng kubur wo sea lumoo’ siesa taretumou si minake eng karaiy puti’ rimuber witu esa nga weka lele’os, nisea tu’u se kasa neiy i kasenge’, ⁶ ta’an si taretumou i ti’i si limila’ wia nisea: “Te’a meide’! Nikouw kouw mesesero si Yesus tou Nazaret, si neiy i salibla i ti’i. Nisia si timo’orouw. Nisia si reiy’ mouw wia nyi’i. Loo’on! Nyi’i mouw en tampa ghinoleiyan neala Nisia. ⁷ Ta’an en teakan mea mouw, i lila’ mola wia se murid-murid-Na wo wia si Petrus: Nisia si rimeriorola wia nikouw minea waki Galilea; maname kouw laa lumoo’ Nisia, tanu e neiy mouw i lila’-Nala wia nikouw.” ⁸ Laa o sea rumou’mi wo tumingkas tumele’ula eng kubur i ti’i, karengan eng keide’an wo eng kaente’an en timoro nisea. Nisea se reiy’ limila’la sapa-sapa wia si seiy i te tu’u kangkasi karengan e nide’. Ampit em pinemotot i tela nisea se mina’ayola em baya e nower i ti’i wia si Petrus wo se ka’ampit-ka’ampitna. Nu reiy’ mouw i tu si Yesus nuesa ampit nieletan ne murid-murid-Na se minabarla waki Sendangan mea waki Talikuran e nabar kudus wo e reiy’ kapunengala tanume eng kelawiran kekal i ti’i. ⁹ Nu reiy’ mouw si Yesus nu timo’or memo’odope’ witu e nendo kasa ketare duminggu ni’itu, Nisia eng ketare-tare si minapa’atola en tou-Na wia si Maria Magdalena. Wia nisia Yesus si mekasa mouw minure’la se pitu setang. ¹⁰ Laa o mea si wewene i ti’i makite’ula nyi’a wia nisea se reiy’ mena’ mateperla si Yesus, wo witu e nedo ni’itu se kasuatan mengasi’ wo maame’. ¹¹ Ta’an eng katoroan nisea nu limingala, kaa si Yesus si timou wo linoo’ona mouw, nisea se reiy’ ma’eman. ¹² Nu reiy’ mouw i tu Sia mapa’atola en tou witu eng gio walina wia se rua tou witu nisea, katoroan sea nu rua se witu em pakela-kelangan mengea waki luar kota. ¹³ Laa o marengouw sea wo makite’ula nyi’a wia se ka’ampit-ka’ampit walina, ta’an wia nisea tu’u se ka’ampit-ka’ampit i ti’i se reiy’ ma’eman. ¹⁴ Eng kesampetanna Sia mapa’atola en tou wia se mapulu’ o esa tou i ti’i eng katoroan nisea nu mekaan, wo Nisia si masese’la e reiy’ kapa’emanan wo eng kakete watuan e nate nea, karengan nisea se reiy’ ma’eman wia se tou-tou limoo’ mola Nisia nu reiy’ mouw eng kineteto’or-Na. ¹⁵ Laa o Sia lumila’ wia nisea: “Mea mouw waki minapekasa eng kaoatan, i abarola e Injil wia se reiy’ sa mina’asa makhluk. ¹⁶ Seiy si ma’eman wo baptisen si laa lawiren, ta’an seiy si reiy’ ma’eman si laa ukumen. ¹⁷ Eng kowa’-kowa’ i yi’i e laa rumapitla se tou-tou ma’eman: nisea se laa mure’ se setang-setang kaa e ngaran-Ku, nisea se laa mesesusuiy witu e baasa-baasa weru i wee nisea, ¹⁸ nisea se laa tumiboiy leloiy’, wo ma’anouw tu’u sea kumoo’ e racung maut, nisea se reiy’ laa maka’ato cilaka; nisea se laa rumeta’la e lawas nea witu natas ne tou rara’an, wo sitou i ti’i si laa male’os.” ¹⁹ Nu reiy mouw si Tuhan Yesus nu simusuiyla en tuana wia nisea, ka’adetanome Sia mea waki sorga, laa o rumuber witu esa nga weka lele’os ni Empung. ²⁰ Sea tu’u mea mouw maabarla e Injil waki e reiy’ sa mina’asa ruuna, wo si Tuhan si kimi’it mepa’ayang wo time’etepla e nuwu’ i ti’i ampit eng kowa’-kowa’ mateperla nyi’a.