¹ E nendo wangko’ Paskah wo e nendo wangko’ Roti Reiy’ Siragi e laa muleiy rua nga endope’ kasi, imam-imam kepala wo se ahli-ahli Taurat se masero lalan kaa laa mesesikop wo mewewunu’ si Yesus ampit em biles kawilesan , ² karengan nisea se limila’: “Te’a witu e nendo pewangko’an, rio te’a tu lumentut eng karungkea’an witu nelet ne rakyat.” ³ Katoroan si Yesus nu waki Betania, witu em bale ni Simon si kusta, wo rimuber mekaan, meiy mouw siesa wewene maali-ali e nesa buli-buli pualam pinumpunan e lana narwastu murni eng kemaal e nargana. Ni’itu nu pinete’na mola e lee’na em buli-buli i ti’i, o i toa’nala e lana i ti’i witu natas eng kokong ni Yesus. ⁴ Wawean se tou mineupi’ wo lumila’ siesa wia se walina: “Edon sapa peghio-ghion e lana narwastu i yi’i? ⁵ Karengan e lana i yi’i en toro i wangker lumantouwla en telu ngaatus dinar wo e loitna en toro i weela wia se tou-tou miskin.” Laa o koupi’an nea si wewene i ti’i. ⁶ Ta’an si Yesus si limila’: “I waya mola sia. Ka’a ku’a kouw mesesusa nisia? Nisia si simiwo mola e nesa pasiwo-siwon le’os wia-Niaku. ⁷ Karengan se tou-tou miskin se re’eregh wia nikoo, wo nikoo koo toro tumulung nisea, sakawisa koo mepa’arla nyi’a, ta’an Niaku ku reiy’ re’eregh laa mewali-wali nikouw. ⁸ Nisia si timuana mola sapa en toro tinuananala. E nouwak-Ku e linanana mola tanukan en tetiro’an kaa em pekekuburan-Niaku. ⁹ Niaku ku lumila’me wia nikoo: Eng kaulitna waki wisa i te e Injil ni’i abarla wia e minapekasa eng kaoatan, sapa en siniwonala i yi’i e laa totoren kangkasi kaa laa ghumenang nisia.” ¹⁰ Laa o mea mouw si Yudas Iskariot, si meta’asa’an wia se mapulu’ o rua murid i ti’i, wia se imam-imam kepala ampit e maksud kaa laa mesesarakanla si Yesus wia nisea. ¹¹ Nisea se kasa mepa’a-pa’ar witu e nedo liminga nyi’a wo nisea se tima’ar kaa laa meweweela loit wia nisia. Kamurian nisia si masero kalempotan e le’os kaa laa mesesarakan si Yesus. ¹² Witu e nendo kasa ketarean waki nendo wangko Roti Reiy’ Siragi, witu e nedo se tou nu rumeret domba Paskah, murid-murid ni Yesus se limila’ wia-Nisia: “Waki tampa wisa eng kepa’aran-Nu keiy mea kaa mea metetiro’la en sesakeiyan Paskah i wee-Nikoo?” ¹³ Laa o Sia rumeo se rua murid-Na ampit e nower: “Mea mouw waki kota; maname koo laa maatoan ampit siesa tou maali-ali eng kure’ pinumpunan rano. Todeiyanola sia ¹⁴ wo i lila’ mola wia si mekewale ghinoremanna: E nower ni Guru: wisa ku’a re’en e woang sinadiala i wee-Niaku kaa mekekaan Paskah mewali-wali ampit se murid-murid-Ku? ¹⁵ O laa sitou i ti’i si laa tumudu’la wia nikoo e nesa woang kasela witu natas, e lekepouw wo en sadia mouw. Witu mouw kouw lewo’ sar eiy’ tumiro’la en sesakeiyan Paskah i wee nikita!” ¹⁶ Takar mea mouw se rua murid i ti’i wo i kekeka’ayome waki kota, loo’on neala em baya nyi’a en tanu neiy i lila’la ni Yesus wia nisea. Laa o sea tumiro’la em Paskah. ¹⁷ E nendo nu wengi mouw, meiy mouw si Yesus mewali-wali ampit se mapulu’ o rua murid i ti’i. ¹⁸ Katoroan sea nu rimuber witu wo mekaan, Yesus si limila’: “Niaku ku lumila’me wia nikoo, eng kaulitna siesa wia e nelet miouw si laa sumarakan Niaku, nisia i ti’i si kimaan ampit Niaku.” ¹⁹ Takar en tekurouw e nate nea wo siesa o siesa lumila’ wia-Nisia: “Reiy’ niaku, ee Tuhan?” ²⁰ Sia mingkot: “Sitou i ti’i nyi’a mouw si meta’asa’an wia nikouw nu mapulu’ o rua i yi’i, nisia si simosouwla e roti witu eng gorem em baki ampit Niaku. ²¹ Si Oki’ ni Tou si memang laa mea minatoroan ampit e wawean neiy i kepatik en tanume Nisia, ta’an cilaka mouw sitou karengan nisia si Oki’ ni Tou i ti’i si neiy i sarakan. Eng kasa mouw le’os wia sitou i ti’i sa wona’ sia reiy’ neiy i patoula.” ²² Wo eng katoroan si Yesus wo se murid-murid-Na se mekaan, Yesus si minedo e roti, tumotorla em berkat, mengebi-ngebi’la nyi’a laa o meela nyi’a wia nisea wo lumila: “Edonouw, nyi’i mouw e nouwak-Ku.” ²³ Nu reiy’ mouw i tu Sia medo en cawan, tumotor en syukur laa o meela nyi’a wia nisea, wo nisea nu waya se kimoo witu en cawan i ti’i. ²⁴ Wo Nisia si limila’ wia nisea: “Nyi’i mouw e raa’-Ku, e raa teta’aran, neiy i toa’la i wee se laker tou. ²⁵ Niaku ku lumila’me wia nikoo: Eng kaulitna Niaku ku reiy’ mouw laa kumoo’ kasi e wua’na nakana anggor i ka’ayo witu e nendo Niaku nu kumoo’ nyi’a, nyi’a i ti’i em beru, witu eng Keraja’an ni Empung.” ²⁶ Nisea nu kimantarola eng kekantaren pujian, o mea mouw sea waki Kakenturan Zaitun. ²⁷ Laa o lumila’ mouw si Yesus wia nisea: “Nikouw nu waya kouw laa’ i kaoghe e imanmu. Karengan wawean neiy i kepatik: Niaku ku laa mewe si rumerawir wo se domba-domba i ti’i se laa i kasera. ²⁸ Ta’an nu reiy’ mouw Niaku nu tumo’ori, Niaku ku laa rumeriorla nikouw lumaa waki Galilea.” ²⁹ Pokeiy ni Petrus wia-Nisia: “Ma’anouw tu’u nisea nu waya ni’i kaoghe e iman nea, niaku e reiy’.” ³⁰ Laa o pokeiy ni Yesus wia nisia: “Niaku ku lumila’me wia nikoo, eng kaulitna wia e nendo i yi’i, wengi i yi’i te kangkasi, nu reiy’pe’ se ko’oko’ nu kumukuk makarua, nikoo koo kimelongouw Niaku makatelu.” ³¹ Ta’an ampit eng kasa uli-ulit Petrus si limila’: “Ma’anouw tu’u niaku ku lewo’ sa reiy’ mate mewali-wali Nikoo, niaku ku reiy’ laa kumelong Nikoo.” Em baya ne walina tu’u se limila’ en tuana kangkasi. ³² Laa o i ka’ayo mola si Yesus wo se murid-murid-Na waki e nesa tampa mekengaran Getsemani. Pokeiy ni Yesus wia se murid-murid-Na: “Rumuberouw wia nyi’i, kasuatan Niaku nu masombayang.” ³³ Wo Sia mali si Petrus, Yakobus wo si Yohanes ma’an-Nisia. Nisia si kasa meide’ wo kineide’an, ³⁴ laa o pokeiy-Na wia nisea: “Nate-Ku eng kasa tekur, tanu mepepate papedamen. Mena’ mouw wia nyi’i wo mategha-teghamouw.” ³⁵ Sia majula oki’, mapakolo’la en tou witu en tana’ wo sumombayang rio, satorona wona’, e nedo i ti’i lumease wia-Nisia. ³⁶ Pokeiy-Na: “Oh Abba, oh Ama’, reiy’la e mustahil i wee-Nikoo, edonouw en kower i yi’i wia-Niaku, ta’an te’a mouw en sapa e neiy-Ku i kepa’arla, ta’an i te sapa neiy-Mu i kepa’arla.” ³⁷ Nu reiy’ mouw i tu Sia meiy sumeup, wo matola nisea nu telu se timekel. Wo Sia lumila’ wia si Petrus: “Simon, timekel ku’a re’en koo? Reiy’ ku’a re’en makawoo koo mategha-teghamla esa jam? ³⁸ Mategha-teghamouw wo sumombayangouw, rio kouw te’a i kawolon witu eng gorem em pewa’awa’an; e roh memang maki’i-ki’it, ta’an e le’ona e lewea’.” ³⁹ Laa o Sia mea kasi wo tumotorla en sesombayangen e ni’itukan kasi. ⁴⁰ Wo katoroan Sia nu marengi kasi, Sia matola nisea se timekel, karengan em beren nea em buterouw wo nisea se reiy’ mete’u e wewingkot sapa e lewo’ sa reiy’ i wee neala wia-Nisia. ⁴¹ Kamurian Sia marengi eng kateluna wo lumila’ wia nisea: “Tumekelouw en teakan wo masengouw. Toro mouw. Nedona neiy mouw i ka’ayo, loo’on, si Oki’ ni Tou si’i sarakanouw witu e lawas ne tou-tou berdosa. ⁴² Tumo’orouw, meiy mouw ta mea. Nisia si mesesarakan Niaku si tawi mouw.” ⁴³ E nedo si Yesus nu masusuiye’, modolomi si Yudas, si meta’asa’an wia se mapulu’ o rua murid i ti’i, wo mewali-wali nisia se esa nga reokan tou maali-ali en santi wo em bewewe, neiy i reo ne imam-imam kepala, ahli-ahli Taurat wo ne tu’a-tu’a. ⁴⁴ Sitou mesesarakan Nisia si minakite’u mola eng kowa i yi’i wia nisea: “Sitou laa sionganku, ni’itu mouw Sia, sikopenouw Sia wo alinouw Sia ampit e lawir.” ⁴⁵ Wo eng katoroan sia i ka’ayola witu wo nisia si makarengan limaa matola si Yesus wo lumila’: “Rabi,” laa o sumiong Nisia. ⁴⁶ Takar sea tumiboiy si Yesus wo sumikop-Nisia. ⁴⁷ Si meta’asa’an wia nisea nu witu si simawut en santina, laa o i ta’ataknala wia si hamba Imam Wangko’ i ka’ayo minategol en talingana. ⁴⁸ Pokeiy ni Yesus wia nisea: “Pokeiymu Niaku i yi’i ku penyamun, takar kouw mineiy lekep ampit en santi wo em bewewe kaa mesesikop Niaku? ⁴⁹ Eng kaulitna susur e nendo Niaku ku wia nuner miouw mawee teturu witu em Bait ni Empung, wo nikouw kouw reiy’ sumikop Niaku. Ta’an e lewo’ sa reiy’ mouw linekepla neiy i kepatik witu eng Kaol Suci.” ⁵⁰ O laa em baya ne murid i ti’i se tumele’ula Nisia wo tumingkas. ⁵¹ Wawean siesa taretumou, witu e nedo i ti’i si minake i te esa nga ketor roko’ lenan kaa laa kumelungla e nouwakna, mengi’itla Nisia. Nisea se mesesikop nisia, ⁵² ta’an nisia si rimeta’la e roko’na wo tumingkas poteiy. ⁵³ Kamurian Yesus si niali simaru se Imam Wangko’. O laa em baya ne imam kepala, tu’a-tu’a wo se ahli Taurat se minerur witu. ⁵⁴ Wo si Petrus si mengi’itla Nisia wia em ba’akat, i ka’ayo witu eng gorem eng kalasan ne Imam Wangko’, wo maname sia rumuber witu e nelet ne pengawal-pengawal kasuatan merarang witu reten e napi. ⁵⁵ Imam-imam kepala, awes tare em baya ne Mahkamah Agama se masero eng kasairian wia si Yesus rio Sia toro ukumen paten, ta’an nisea se reiy’ minatola nyi’a. ⁵⁶ Laker kangkasi se tou matotorla eng kasairian towo wia Nisia, ta’an eng kasairian-kasairian i ti’i e reiy’ minatoroan e nesa ampit em balina. ⁵⁷ O laa se pirala tou se simairi simaru Nisia ampit en teturean towo i yi’i: ⁵⁸ “Nikeiy keiy liminga mouw sitou i yi’i si limila’: Niaku ku laa rumonga’la em Bait Suci siniwo e lawas ne tou i yi’i wo witu eng katelu nga endo e laa Ku i redeiyla walina, e reiy’ siniwo e lawas ni tou.” ⁵⁹ Witu eng kapualitan i yi’i tu’u eng kasairian nea e reiy’ minatoroan e nesa ampit em balina. ⁶⁰ Takar si Imam Wangko’ si timo’or o rumedeiy witu eng keuneran en sidang wo mueiy wia si Yesus, pokeiyna: “Sapa ku’a re’en Nikoo koo reiy’ meela wewingkot witu en teturean-teturean ne mesairi i yi’i wia Nikoo?” ⁶¹ Ta’an Nisia si minena-ena’ minekapenes wo reiy’ miningkot sapa-sapa. Si Imam Wangko’ i ti’i si minueiy wia-Nisia mekasape’ kasi, pokeiyna: “Sapa ku’a re’en Nikoo koo Mesias. Oki’ waki Si Kasapalo’oren?” ⁶² Wingkot ni Yesus: “Niaku mouw Sia, wo nikouw kouw laa lumoo’ si Oki ni Tou si rumuber witu esa nga weka lele’os ni Si Kasakuasa wo meiy witu eng keuneran e linaak-linaak waki langit.” ⁶³ Takar si Imam Wangko’ i ti’i si kimurensangla e labungna wo lumila’: “I wee sapape’ kasi ta mepadungla en sairi? ⁶⁴ Nikouw kouw liminga mouw e nojat-Na wia si Empung. Kumura e lininga’an niouw?” Laa o sea maesa’an tumantula, kaa Nisia si lewo’ sa reiy’ ukumen paten. ⁶⁵ Laa o muleiy mouw se pirala tou rumura’la Nisia wo tumawunla eng gio-Na wo kumunteiy-Nisia kasuatan meila’ wia-Nisia: “Heiy nabi, wa’awa’anouw petetoron!” Awes tare se pakasa’an ne pengawal tu’u se mawewe Nisia. ^{66 67 68} 66 Witu e nedo ni’itu Petrus si witupe’ em bawa’, witu eng kalasan. Laa o meiy mouw siesa hamba wewene ni Imam Wangko’, 67 wo eng katoroan si wewene i ti’i nu limoo’ si Petrus merarang, sia tumu’us eng giona wo lumila’: “Nikoo kangkasi koo reiy’ mena’ mewali-wali ampit si Yesus, tou Nazaret i ti’i.” 68 Ta’an nisia si simangkal nyi’a wo lumila’: “Niaku ku reiy’ mete’u wo reiy’ mangarti sapa e maksudmu.” Laa o sia mea waki podol muka [wo kumukukouw se ko’oko’]. ⁶⁹ Katoroan si hamba wewene i ti’i nu limoo’ si Petrus kasi, o lumila’ mouw sia kasi wia se tou-tou witu: “Sitou i yi’i nisia mouw si meta’asa’an wia nisea.” ⁷⁰ Ta’an si Petrus si simangkal e nyi’a kangkasi. Reiy’ ure kamurian se tou-tou witu se limila’ kangkasi wia si Petrus: “Nikoo i yi’i tantu mouw koo meta’asa’an wia nisea, sapape’ kasi nikoo koo tou Galilea!” ⁷¹ Takar muleiy mouw si Petrus makutok wo matiwa’: “Niaku ku reiy’ sumine’u sitou penoto-notoren niouw i yi’i !” ⁷² Wo witu e nedo ni’itu kumukukouw se ko’oko’ eng karuana. Takar i kaghenangouw si Petrus, kaa si Yesus si limila’ mouw wia nisia: “Nu reiy’pe’ se ko’oko’ nu kumukuk eng karuana, nikoo koo simangkalouw Niaku maka telu.” Laa o mame’ mouw sia seseghu’un.