¹ Patuari waya, sa wona’ tu’u siesa tou si kina’atoala timuanala e nesa kaselokan, takar kouw si rohani, lewo’ sa reiy’ ma’aka-akala sitou i ti’i witu e lalan ulit witu e roh rinda, eng kasuatan metayurla en toumu nuesa, rio nikouw kangkasi te’a tena’an e wewa’awa’. ² Matulu-tulunganola mapesa’an em pemesa’anennu! En tuana mouw nikouw nu malekepla e nukum ni Kristus. ³ Karengan sa siesa tou si mapokeiyla, kaa nisia si makapenoron, eng kaulitna nisia si kasa reiy’ makapenoron, nisia si male’ekok en touna nuesa. ⁴ E le’osouw susur tou si muji em pepa’ayangenna nuesa; takar nisia si toro sumawa’ lumoo’ eng ka’ada’anna nuesa wo e reiy’ lumoo’ eng ka’ada’an ne tou walina. ⁵ Karengan susur tou si laa mesa’an em pemesa’anen-na nuesa. ⁶ Wo e le’osouw nisia, si simungkul en teturu’ witu e nuwu’, mawetengla e reiy’ sa mina’asa wo’o sapa e wia nisia ampit sitou si mineela en teturu’ i ti’i. ⁷ Te’a seip! Empung si reiy’ minayala en tou-Na pema’aya-ma’ayangela. Karengan sapa e neiy i keror ni tou, e ni’itu kangkasi e laa upu’unna. ⁸ Karengan seiy i te si makeror witu e le’ona, nisia si laa mupu’ eng kapunengan witu e le’ona, ta’an seiy i te si makeror witu e Roh, nisia si laa mupu’ em patou-touan kekal witu e Roh i ti’i. ⁹ Te’a mouw kita masenso-senso’ masiwo e le’os, karengan sakawisa nu meiy mouw e nedona, nikita ta laa mupu’, sa kita reiy’ malewea’. ¹⁰ Kaa e ni’itu, eng kaurean waweane’ eng kalempota i wee nikita, meiy mouw kita sumiwo e le’os wia em baya ne tou, ta’an se i paketa-ketare se ka’ampit-ka’ampit ta esa nga iman. ¹¹ Loo’onouw, kumura eng kaselana se uru-urup neiy i patikkula wia nikoo ampit e lawasku nuesa. ¹² Nisea se mekenaramen lahiriah se pa’ar menu-nu’la en tou, nisea mouw se me’inakut malupu nikouw kaa laa makasunat, ampit i te e maksud, rio sea reiy’ siasan karengan en salib ni Kristus. ¹³ Karengan nisea se minakisunatla en touna tu’u, se reiy’ miniara e nukum Taurat. Ta’an nisea se mepepa’arla, rio kouw makisunatla en tou, rio sea toro sumawa’ witu eng ka’ada’annu e lahiriah. ¹⁴ Ta’an niaku ma’an mekasa ku reiy’ pa’ar mesesawa’, reiy’ siwalina e witu en salib ni Tuhan ta Yesus Kristus, karengan kaa e nyi’a eng kaoatan e neiy mouw i salibla i wee niaku wo e niaku i wee eng kaoatan. ¹⁵ Karengan makasunat ka’apa reiy’ makasunat e reiy’la sipenoronna, ta’an e mamuali cipta’an weru, ni’itu mouw e wawean em penoron-na. ¹⁶ Wo em baya ne tou, se mineela en touna pa’aka-aka’la ni pa’aka’an i yi’i, en tumumpa mouw satorona en dame sejahtera wo e rahmat witu nisea wo witu si Israel kapunya’an ni Empung. ¹⁷ Tumodongla e nyi’a te’a mouw e wawean tou si sumusala niaku, karengan witu e nouwakku e wawean eng kowa’-kowa’ eng kapunya’an ni Yesus. ¹⁸ E nupus karunia ni Tuhan ta Yesus Kristus e rumapitla e roh miouw, patuari waya! Amin.