¹ Wo’o wona’ witu en toro ni’itu si raja Herodes si muleiy mawinta’ ampit eng kete wia se pirala tou waki jema’at. ² Nisia si rimeo wunu’un si Yakobus, patuari ni Yohanes, ampit en santi. ³ Katoroan sia nu limoo’, kaa eng kapualiten i ti’i e minaruiyla e nate ne tou Yahudi, sia si minapawee-weela em pasiwo-siwonna i ti’i wo rumeo tumaang si Petrus. En toro ni’itu e nendo wangko’ Roti Reiy’ Siragi. ⁴ Nu reiy’ mouw si Petrus nu sinikop, Herodes si rimeo menjarala nisia witu en tinayuran ne epat regu, e nesa o nesa se epat preajurit. E maksudna nyi’a mouw, rio tu reiy’ mouw em Paskah sia si sumarula nisia witu en sinaru ne tou kelaker. ⁵ Tuana mouw si Petrus nu tinaang witu eng gorem em penjara. Ta’an se jema’at se tentem masombayangla nisia wia si Empung. ⁶ Witu em bengi nu reiy’pe’ si Herodes nu mesesarula nisia wia se tou kelaker, Petrus si timekel witu e nelet ne rua perajurit, tinorongku ampit e rua rante. Awes tare se perajurit-perajurit pengawal se kasuatan mekawal witu en sinaru em pepalen. ⁷ i kasenge’mi rimedeiy mouw siesa malaikat ni Tuhan witu en tawi ni Petrus wo en terang en simena’ witu eng gorem e woang i ti’i. Malaikat i ti’i si mina’apal si Ptrus kaa mewewongkela nisia, pokeiyna: “Makarenganouw tumo’or!” Takar i kera’araghouw e rante i ti’i witu e lawas ni Petrus. ⁸ Laa o pokeiy ni malaikat i ti’i wia nisia: “wa’akesenouw e rerereenannu wo todonganouw en sapatumu!” Sia tu’u sumiwo en tuana. Laa o lumila’ mouw si malaikat i ti’i wia nisia: “Todonganouw eng karaiymu wo kumi’itouw niaku!” ⁹ Laa o sia kumi’iti si malaikat i ti’i witu e luar wo nisia si reiy’ mete’u, kaa sapa en tinuanala ni malaikat i ti’i e nuli-ulit minamuali, pokeiyna sia si limoo’ e nesa pineleloo’. ¹⁰ Nu reiy’ mouw sea nu timorola en tampa kawal ketarean wo en tampa kawal karua, i ka’ayo mouw sea witu e lengko’an wesi e matorome eng kota. E lengko’an i ti’i e minawuka’ sandirina i wee nisea. Nu reiy’ mouw e ney i ka’ayola witu e luar, sea kumelang i ka’ayo waki tempok e lalan, wo i kasenge’mi si malaikat i ti’i si timele’u mola nisia. ¹¹ Wo sia nu wena’asouw witu en touna, Petrus si limila’: “Teakan mete’u mouw uli-ulit niaku kaa si Tuhan si rimeo mouw si malaikat-Na wo lumawirla niaku witu e lawas ni Herodes wo witu e reiy’ sa mina’asa wo’o sapa em paarapela ne tou Yahudi.” ¹² Wo sia nu minikirola reiy’ ure, o mea mouw sia waki wale ni Maria, ina’ ni Yohanes si patotoren kangkasi Markus, Witu kelaker se tou minerur wo masombayang. ¹³ Wo katoroan sia nu tumengkorla em pepalen, o meiy mouw siesa hamba wewene mekengaran Rode kaa laa metete’ula seiy si matengkor em pepalen i ti’i. ¹⁴ Sia si makarengan simine’u en suara ni Petrus, ta’an karengan eng kepa’a-pa’aranna sia si reiy’ minuka’ em pepalen i ti’i wo makarengan ghimorem witu eng gorem kaa laa makite’ula, kaa si Petrus si witu en sinaru em pepalen. ¹⁵ Pokeiy nea wia si wewene i ti’i: “Nikoo koo marawit.” Ta’an nisia si reiy’ mena’ meila’la, kaa e nuli-ulit en tuana. Pokeiy nea: “Ni’itu si malaikatna.” ¹⁶ Ta’an si Petrus si reiy’ siena’na matengkor wo katoroan sea nu muka’ em pepalen wo lumoo’ nisia, nisea se neiy i kenganga-nganga. ¹⁷ Ta’an si Petrus si mineela tanda ampit e lawasna, rio sea makapenes, laa o i susuiynala eng kumura si Tuhan rimawir nisia rumou’mi waki penjara, pokeiyna: “I pakite’u mola eng kapualitan i yi’i wia si Yakobus wo se patuari-patuari ta.” Laa o sia rumou’la wo mea waki tampa walina. ¹⁸ Witu e nendo kawo’odoanna se ringka’ mouw se perajurit-perajurit i ti’i. Nisea se memue-mueiy sa sapa mouw e minamuali ampit si Petrus. ¹⁹ Herodes si rimeo seron si Petrus, ta’an nisia si reiy’ niatola. O laa si Herodes si rimeo kumisin se pengawal-pengawal i ti’i wo wunu’un sea. Kamurian sia rumou’mi waki Yudea o mae waki Kaisarea wo mena’ witu. ²⁰ Herodes si kasa meupi’ wia se tou Tirus wo Sidon witu em pinaesa’an nea mewali minea sumaru nisia. Nisea se minua’la minelur si Blastus, si pegawai istana raja, si mineiy witu em beteng nea, laa o sea makiweela en dame, karengan em banua nea e maka’ato em bahan kekaanen waki e wilayah ni raja. ²¹ Wo witu e nendo mekasa e neiy i tantula, Herodes si minake e labung keraja’an, laa o rumuber witu natas en takhta wo mapidato wia nisea. ²² Wo se rakyatna se Mario masingkom nyi’a: “E nyi’i en suara ni empung wo e reiy’ suara ni tou!” ²³ Wo katoroan i te ni’itu kangkasi sia sepe’en ni malaikat ni Tuhan karngan nisia si reiy’ minee ormat wia si Empung; sia mate kinaan ne witek-witek. ²⁴ Takar e nuwu’ ni Empung e maka sera mouw wo e meke-lakerla lininga ne tou. ²⁵ Barnabas wo si Saulus se waki Yerusalem o marengi, nu reiy’ mouw sea nu simampetla e lukar pelayanan nea. Nisea se minali si Yohanes, si patotoren kangkasi Markus.