¹ Em baya ne tou se minesa’an em pemesa’anen pabudakan satorona se mapokeiyla si tuang nea si waar maka’ato e reiy’ sa mina’asa kaormatan, rio e ngaran ni Empung wo en tine’u ta te’a ojaten ne tou. ² Sa si tuang nea siesa tou ma’eman, te’a mouw sia reiy’ kasa pasighi’in karengan mapatuarian witu si Kristus, ta’an i te satorona si layanen neala ampit eng kasa makale’o-le’ose’ kasi, karengan si tuang simungkul em berkat pelayanan nea nisia mouw si patuari ma’eman wo si’i koupus. I turu’ mola wo i nge’enge’ mola em baya nyi’a i yi’i. ³ Sa siesa tou si maturu’la en teturu’ walina wo reiy’ maki’it e lelila’an segaya’– nyi’a i ti’i e lelila’an ni Tuhan ta Yesus Kristus – wo reiy’ maki’it en teturu’ minatoroan ampit e raghes ta, ⁴ nisia nyi’a mouw siesa tou ma’asa-asar si mete’u eng kaulitna si reiy’ mete’u en sapa-sapa. Rumarana nyi’a mouw e menero-nero kapoongan wo mewewingkotan, mawua’la e ri’iris, em pali’, en sero’, en tayur, ⁵ em pe’isingan e nelet ne tou-tou reiy’ mouw kasi makaghenang en segaya’ wo se kinaliongan eng kaulitan, se mapokeiyla e raghes i ti’i nyi’a mouw e nesa kembu’an eng kauntungan. ⁶ Memang e raghes i ti’i sa i tu rinapitla em pedaman awes, mee kauntungan wangko’. ⁷ Karengan nikita ta reiy’ minaali sapa-sapa wia eng gorem eng kaoatan wo nikita tu’u kita reiy’ mete’u maali sapa-sapa kumaluar. ⁸ Asal wawean kekaanen wo e labung, e nawesouw. ⁹ Ta’an nisea se pa’ar mekaya se neiy i kawolon witu em pewa’awa’an, witu eng gorem e we’etes wo witu eng gorem e minegheghioan nafsu reiy’ si penoron wo e makacilakan, wo en tumenemla sitou witu eng karewa’an wo eng kapunengan. ¹⁰ Karengan eng kalat e reiy’ sa mina’asa kalewo’an nyi’a mouw meupus e loit. Karengan kaa memi’o e loitouw se pirala tou se sime’epangomi waki e iman wo simiksa en touna ampit e minegheghioan duka. ¹¹ Ta’an nikoo heiy sitou ni Empung, wa’akatenola em baya nyi’a i ti’i, pekeki’itenouw eng ka’adilan, e raghes, eng kelale’an, e nupus, eng kasabaaran wo eng karinda’an. ¹² Melelowa’anouw witu em palowa’an iman e nulit wo ra’akepenouw em patou-touan kekal. I wee e ni’itu mouw koo kineretola wo neiymu mouw i ta’arla en ta’ar ulit witu en sinaru ne kelaker sairi. ¹³ Witu en sinaru ni Empung si mineela em patou-touan wia e reiy’ sa mina’asa wo’o sapa wo witu en sinaru ni Kristus Yesus si tima’arola en ta’ar ulit i ti’i o kangkasi witu en sinaru ni Pontius Pilatus, ni’i aleiykula wia nikoo: ¹⁴ Ki’itanola em perenta i yi’i, ampit e reiy’ si walulang wo reiy’ si sering, i ka’ayo witu e nedo ni Tuhan ta Yesus Kristus nu mapaloo’o-loo’ola en tou-Na, ¹⁵ nyi’a i ti’i e nedo laa i tantula ni Penguasa si maesa-esana wo si wuta e naruiy, si Raja wia se reiy’ sa mina’asa raja wo si Tuang wia se reiy’ sa mina’asa tuang. ¹⁶ Nisia mouw si maesa-esana si reiy’ tu’utuk wia si maut, si rimuber witu en terang reiy’ kaleleran. Siesa tou tu’u reiy’pe’la si limoo’ Nisia wo memang sitou si reiy’ mete’u lumoo’ Nisia. I wee Nisia mouw e normat wo eng kuasa kekal! Amin. ¹⁷ I nge’enge’ mola wia se tou-tou kaya wia eng kaoatan i yi’i rio sea te’a tingkeiy wo te’a maarap witu en sapa e reiy’ tantu tanume eng kakaya’an, ta’an i te wia si Empung witu eng kakaya’an-Na si maweela wia nikita e reiy’ sa mina’asa wo’o sapa kaa laa pekekeipiala. ¹⁸ Nge’enge’anola rio nisea i ti’i se sumiwo le’os, mamuali kaya witu em pasiwo-siwon le’os, pa’ar mawee wo maweteng ¹⁹ wo ampit en tuana maarurla e nesa harta tanume en to’otolan e le’os i wee en touna witu e nedo laa meiy kaa laa ma’ayola em patou-touan eng kaulitna. ²⁰ Heiy Timotius, piaranouw sapa e neiy mouw i emanla wia nikoo. Liseiyenola e lelo’odeghan wo e reiy’ suci wo em pesali’isi’an-pesali’isi’an waki sapa em patotoren tine’u, ²¹ Karengan wawean se pirala tou se maturu’la nyi’a wo ampit en tuana en sime’epangomi waki e iman. E nupus karunia rumapitla nikouw!