RAWILENOLA SE KAWENG NE DOMBA NI EMPUNG ¹ Niaku ku ngume’enge’la se penatua witu e nelet miouw, niaku ku tanume si ka’ampit ne penatua wo sairi em peme’itan ni Kristus, o kangkasi ku laa maka’ato weteng witu eng kalo’oran e laa i papaloo’o-loo’ola ee sangali. ² Rawirenola se kawang ne domba ni Empung se wia nikoo, te’a ampit em pupus, ta’an ampit eng kepa’aran em pa’ar minatoroan ampit eng kepa’aran ni Empung, wo te’a karengan em pa’ar mesesero kauntungan, ta’an ampit e neri’an en tou. ³ Te’a mouw kouw masiwo tanu mokan kouw pa’ar mepeperenta nisea se neiy’ i emanla wia nikoo, ta’an satorona kouw mamuali paki’i-ki’itan wia se kawang ne domba i ti’i. ⁴ Takar nikouw, sakawisa si Rumerawir Wangko’ nu meiy, nikouw kouw laa maka’ato e mahkota kalo’oran e reiy’ mete’u maweles. ⁵ Tuana mouw kangkasi nikouw, heiy tou-tou muda, tu’utukouw wia se tou-tou tu’a. Wo nikouw nu waya, i kumengola en toumu siesa wia se walina, karengan: “Empung si mapero sitou tingkeiy, ta’an si meupusla sitou kumeng ate.” ⁶ Kaa ni’itu i kumengola en toumu witu lawas ente’ ni Tuhan, rio kouw i rakek-Nala witu e nedona. ⁷ I sarakanola e reiy’ sa mina’asa kalieiyannu wia-Nisia karengan Nisia si mapiara nikouw. ⁸ Mawena’asouw wo mategha-teghamouw! Kesarumu, si Iblis, si makelang maledong masuat tanu si singa menga’aka-nga’akak wo menero tou si toro ne’enepenna. ⁹ Sarunouw sia ampit e iman te’etep, karengan eng kete’uan niouw, kaa em baya ne patuarimu wia e minapekasa eng kaoatan se minesa’an em peme’itan masuat. ¹⁰ Wo si Empung, kembu’an e reiy’ sa mina’asa nupus karunia, si kimeretola nikouw wia si Kristus witu eng kalo’oran-Na kekal, laa lumekepla, tume’etepla, kumeterla, wo mente-ente’la nikouw, nu reiy’ mouw nikouw nu pineme’itala reiy’ ure eng keurena. ¹¹ Nisia mouw si maka punya eng kuasa i ka’ayo eng keure-urena! Amin. ¹⁴ TABEA ¹² Ampit e nieletan ni Silwanus, si’i papokeiykula tanume siesa patuari si toro emanen, niaku ku minatik ampit em pinemotot i tela wia nikouw kaa laa mengenge’enge’la wo me’emanla nikouw, kaa e nyi’i nyi’a mouw e nupus karunia e nuli-ulit waki si Empung. Rumedeiy mouw ampit en te’etep witu nyi’a! ¹³ Tabea wia nikouw nu waya waki si ka’ampitmu kinapelengan waki Babilon, wo kangkasi waki si Markus, urangku.v14 Mee mouw tabea siesa wia se walina ampit en siong kudus. Dame sejahtera e rumapitla nikouw nu waya witu si Kristus. Amin.