Morha oroi Wad Allah ¹ Oro batauda dage, batauge walle hil la'kma hoku tabarada ata kadana inne lari tabarai Yesus Kristus. ² Oroge, hok Wad kabihha ka morha ta barai Yesus Kristus kaha tolka begim miyo walita ta hoku doku monno mate. ³ Oroge, agawe aiha rayige uk pareha Taurat oroge bana lojawe oroge kana'na, harayi bedagei Allah waige pahada bana halewaiyi ana-Na kameha tannam kana hatuja taka da'di ata kadoku jala monno kahha ngabbe ta doku, Nyio na hokudi doku jala ta ka nayo, ⁴ tannam tutge uk pareha Taurat kana bannuge tajongada yitta aika morha dokuge kanayo, tabollo dokuni Wad Bihha. ⁵ Oroge yidda kamorha dokuge kanayo, daha ngadda'di hada kanogo kanayo, tabollo yidda kamorha kadokuge Waddi Bihha ha ngadage hada Wad Bihha. ⁶ Oroge paha nga'da pa ha aro ta ka nayo nyiduwe mate, tabollo paha ngada paha aro tabarana Wad Bihha na morha monno kama ringna. ⁷ Oroge pahangada kanaya namagabe tabarai Allah; oroge nyiyo walena kangakama taparehai Allah, mo lopo walena kole mage rayige. ⁸ Monno, yidda ka morha inne lari ta kanayo waleda ingtama haegei Allah. ⁹ Ta nyiduwe, yauwu walle hil morha mawu ta kanogo tuba tauwumu, tabollo larta Wad Bihha ba dado Wadnai Allah ba enga kana tabarami. Oroge, nada wu ata ai dakani Wad nai Kristus, nyiyo wale daumana-Ni. ¹⁰ Tabollo, nyi Kristus ba dakani tabarami, langka tawumu namatekawe oro doku, tabolo wad na morha oroge katena. ¹¹ Nyiduwe, Wad-Na kahha kadebei Yesus wal ta mate engana tabaramu, Nyiyo kahha kaddebei Yesus Kristus wal ta mate dumo engana yigumi morha ta bara tuba tawumu ka pallaka ledege Wad-Na ka engana ta tabaramu. ¹² Begge, baggu olebaigimmi, yitta ata'da kaman wutta'na, tabollo walle tau ka'dadi ata, ka morha dokuge ka'dadi ata. ¹³ Oroge, nyi morham ba da'di kada'd ata kawe, enga mate da'muge, tabollo ba oro Wad Bihha kaiyi nyi kahha matewe harayi tauwum'mu, nyiwe bami morhami. ¹⁴ Oroge, tangngada ata ha kodona Wadnai Allah yidda'na ananai Allah. ¹⁵ Oroge, wallem hil hibba mawe wad kaha atawikna kahha oroge hama dauta danga, tabollo miyo um'hibba beyi Wad Kabihha nat kadeketauwu kamu da'di ana-Nai Allah, leden Wad Bihha bada kawula, "Ama, oh Ama!" ¹⁶ Wad Bihha dauwu yi katalara olege wadda yitta nyi bayitta ananai Allah, ¹⁷ monno yitta ba ana nada, yitta dummo pewaris, pewaris Allah, monno ba ole pewaris dangnga-Ni Kristus; nyi yitta bana tena takkawe dokuge mayilla-Na, yitta na da'di dummo ma nada ole dangnga-Ni Nyio. ¹⁸ Oroge, nauwag hawowuge mayilla bataugewalle naha tuja'mawe inne kama nada'na pahadedala tabarada yitta. ¹⁹ Oroge, tangngadi harayi kamak takage remage waige manawara tamrada ana Allah baha tingngodi. ²⁰ Oroge, tangngad harayi ha wojobedi tabara aika mannu gauna, walle doku dak'mage hakabbu atena, tabollo dokuge hakabbu atena Nyio nattu kahha hugla bedi, ta pannu ha manne, ²¹ tannam tangngad ratu harayi yidda jala kahha halla beiyi walta ha ata'da kaliloko ka aroge hoila anai Allah kabanna kama nadana. ²² Oroge yitta datadawe tangngage harayi merage kabukta monno mayilla pahha ha ana kahha batauge. ²³ Monno wale nyi dakelma inne, tabollo yitta jala kahibbawe wu ulluge Wad Bihha kabukta na lar ta tauda yitta, tangrage ba remage madeketada bana ha lii ana'da, nuttu ka kahka dage tauda yitta. ²⁴ Oroge, yitta baha tolka da inne lari hamanneda. Tanyiduwe, hamanne nuttu ha etada walle hil hamane, oroge iyai nattu kaha manne ta pannu agabeiyi ha etana? ²⁵ Tanyiduwe, nyi yitta bada mannege nedo wuyo aiha kal eta hoda, yitta daha rema waige mikku. ²⁶ Tauda jalage, Wad Bihha bana tulda tatillu lojada; oronage yitta walleda tada'mawe agana dahowe hada sembayang, tabolloi Wad Bihha nyi ka syafaat tutge yitta waige kangurka aika hudda waina hanewe. ²⁷ Monno, Nyio kaha matarage ate natadawe agaiyi habaina naddo Wad Bihha, oronage Nyio ka syafaat yidda ata murra ha dokuge hakabbu atane-Nai Allah. ²⁸ Monno, yitta datadawe tangngad ha ulla oledi tutge kadahha ata rattu hama nawaranai Allah, rattu yidda hamaika waige hamak'nai Allah. ²⁹ Oroge, yidda hatada-Na wal ka ulluge, yidda jala ha tuttu walka ullu kanna kaha tu'ja hada Ana-Na, ka Nyi ka ullu walta kabuta olebai. ³⁰ Yidda ba'ha nuk-Na wal ulluge, naka maika jala-Ni; monno yidda ha maika'Na, naha tena-Di; monno yidda kahatena-Na, naha dedola-Di. ³¹ Nyi, ba agai hatakda tut tangngad rade? Allah ba ta barakadi, iyal hoi ka gabbada yitta? ³² Nyi aika manawaradi Ana dauna, tabollo Naha aroda ni tabarad yitta tang kahhada, aga na'dawe Nyi bana ole-Ni walle na yii madage tangngage ta yitta ? ³³ ia dahoyi ka gabbadi ata hapedenai Allah? Allah kayidi katena yidda. ³⁴ Ia dahoyi ka yiwe hoku? Yesuu Kristus be kamatebe, loppo paha kadde hagga walita ata mate, ngodo taka wanai Allah tutge syafaatda yitta. ³⁵ Ia dahoyi kahewada yitta walita tamanawaranai Kristus? Nyi kama pijja, mona kadabbo, mona hama yilla, mona kareba, kalolu, mona mayilla, mona kito kaleka? ³⁶ Katadana dage kama tolha, "Oro Yau, dagama inne lari tama yilla mate kahha taha dukka rahi; Nami daha balgama bebbe haropo. "Lawitti 44:22 ³⁷ Tabollo, inne lari tangngage, yitta darehi walita tabara katailo orona Nyi kama nawarada yitta. ³⁸ Oroge, nauwa bayigage katena oroge walle mate'ma loppo morha, walle malaika-malaikat da'ma loppo kareha-kareha, walle dumoma inne kada'di batauge loppo dummo inne nim ka amna, bikta pareha, ³⁹ walle dummo ma kadana dete loppo kadana bawa, loppo dumu wali harayi heka, lohho jala kamahewada yitta walta manawaranai Allah, nattu kadana tai Yesus Kristus, Allahda yitta.