Lawai Samaria Ka Tulluni Yesus ¹ Damma hege tana, Yesus kako nage kiloradi nahiyi harona mono deha-deha tutu talarage mono pa dekage Liyo ege ate Kalingoranai Allah. Ka kabulu dudana ana hakodona dadi oleni Nyi, ² tauda dummo nage kapirana lawai paha tagaha benai Yesus wali ta tngage waddi japata mono tanga ngara kalawara. Ta jongada yidda dani Maria paha ngarai Magdalena, paha lohta benai Yesus wali kapiotuna waddi japata. ³ Da dummoni Yohana ole ummanai Khuza kanarrodi ammahanai Herodes, Susana, mono buta jalaho lawai wadeka kawaidi hapoteda yidda dau tutu dullayi Nyi. HATUJJA TUTU KAHABARANA WINNI ⁴ Kole ata buta makahha mono wali ta tanga ngara harona ammidi tabarai Yesus, Nyi naha newe tabarada yidda waina hatujja: ⁵ "Wu ata ka ullana ta ta paba kako habarana winni. Kole nyi habarana, dage wadeka kamonu ta hupu lara mono da dekege, lohho na tutkawe kawurruna ta kawurna. ⁶ Wadeka monuwe ta panu watu, mono kole winni inna bana tummuwe, winni inna marakotawe oro ai dayo weyo. ⁷ Wadeka monuwe ta tillu tara warri mono tummu hamera dangage bana kapihhawe. ⁸ Karehi winni wadeka monuwe ta tana kadauka mono na tummuwe dajalag na dadiwe ngahu malaptage butage." Kole bana beyi hatujja nada Yesus na kawula, "Nyi kamangu katilluna tutu range, nyi kana range dahhaka!" ⁹ Kole innage ana hakodonai Yesus daka kanukka tabara-Na tutu ngihina liha tujja nada. ¹⁰ Nyi linage, "Tabaramu halara guge kabunyi Kalingora parehanai Allah, tabolo tabara ata wadeka halarawe taha tujja dajalage, ' Lokko bana torrokna, yidda wale da etak ma, mono loko bada rangekna yidda wale da yapak mawe."' Yesaya 6 : 9 Halarawe Tutunai Yesus Liha Tujja Winni ¹¹ Inna nyiwe ngihina liha tujja nada : "Winni inna nyiwe linai Allah. ¹² Winni kamonu ta huppu lara nadda yidakna karangwe linai Allah. Bege, ammini kabalka mono ngalawe liyo inna wali ta ateda yidda dajalage yidda ilda hatenawe mono paha mane marayi. ¹³ Winni kamonu ta tana kamngu watuna yidakna ata karangewe linai Allah mono hiba waige ege ate, tabolo walena na kalartak mawe. Yidda hatena hodi hewe, tabolo kole ammige kapitona, yidda geha peli dage wali tai Allah. ¹⁴ Winni kamonu ta jonga tara warri yidakna ata karangwe linai Allah, tabolo tamrana yidda tummu, yidda kapikhayi hada gela gagga, hapote, lohho dahha morha dajalage yidda waleda madukma bada wuyo. ¹⁵ Tabolo winni kamonu ta tana ka dauka inna yidakna ata ka rangewe linai Allah mono ijalawe ta atena kalurha mono dahha, lohho na wu waige manono." Hatingoge Magakahamu ¹⁶ "Wale la hing mana wu ak ata kole bana harewowe latti wena, bege na toni daliwe ana tanga waleka na ijala dalli we ta kabu pinya. Ta nyiduwe, nyi enga na ijalawe latti weyo inna ta puha riyo ta dokage daja lage ata ka tama lari ta umma dadiwe eta magakahage. ¹⁷ Oro, wale ladakma kadadi ka bunyi ai paha dedala, mono wale ladakma kabailana ai paha hudda mono ngidiyi tama gakaha. ¹⁸ Oroge inna, hamataragela aga linna dawe miyo bamu range oro tabarana kamangu dauna enga yini karehi buta wali. Ta nyiduwe, iyayi ai kamanguna, wali tabarana enga ngalayi, loho agawe paha ngadana padauna." Ole Baianai Yesus Kaha Tetakkana ¹⁹ Nyiwe, inyana mono angu wuna Yesus ammidi dikini-Nyi, tabolo yidda wale na dadik mawe dahhekayi-Nyi oro ata buta. ²⁰ Nyiwe, ma takki nage tabara-Na, "Inyamu mono ole bai-Mu dede dage tabali haddu, yidda kabu ate dage tabokawu Yau." ²¹ Ta nyiduwe, Yesus balehayi yidda, "Inya-Gu mono ole bai-Gu yidda karangewe linai Allah mono ka dokuge." Yesus Naha Ngahuyi Warata ²² Ta dihha wu laddo, Yesus na panne lari ta tena oledi ana hakodo-Na mono Nyi linage tabarada yidda, "Mai kada pala ta hupuna inna bali hoba inne." Nyiwe, kako dage yidda inna bali. ²³ Ta nyiduwe, kole yidda bada kako, Yesus dura nage. Lodoge, harere hanage ta hoba inna mono tenada yidda tamani weyo dajalage yidda ta tillu mayillayi. ²⁴ Bege, tangada ana ha kodona ammidi tabarai Yesus mono haradduyi-Nyi ha gapege ba lidda, "Guru! Guru! Yitta enga mayillada!" Nyiwe, Yesus dummo kadde mono na kayakani rereha lohho ngalung kama dehta inna. Warata nada dummo naka nawa mono hoba inna naka kadannawe. ²⁵ Mono, Nyi linage tabarada yidda, "Gikakge hatenami?" Yidda da madauta mono hangatara hagapege balidda dihha-dihha, "Iyayi ata nadde? Nyi na harehayi rereha mono weyo, mono yidda da dokuni-Nyi." Wuyo Ata Gerasa Pahoilayi Wali Ta Waddi Japata ²⁶ Lohho diki dage Yesus mono ana hakodo-Na ta kalingora ata Gerasa, ta gabalage Galilea. ²⁷ Bana burrui Yesus ta tana yara, nyi mai ha tabo nage wu ata kabani wali ta harona inna ha tamana waddi japata. Ata nada moja bena aina waina kalabbe mono wale na engak mana ta umma, tabolo ta rateyi. ²⁸ Kole ata nada etayi Yesus, nyi dummo kawula nage mono naka wojo ta aro-Na. Waige lina ka ballo nyi linage, "Aga dawe ha orhamu ta jongam Yau mono nauwa, ta Yesus, Ana Allah ka Hadda madehta? Nauwa ug rainoge tabara-Mu, ilam hama yillawa nauwa!" ²⁹ Hada inna na dadiwe oroi Yesus naha rehayi waddi japata nada huna wali ta ata nada. Kabalka nada na kali wera kani ata nadda dajalage nyi kattini kalarri bahhi, koga nadi limmana, mono da jawayi, tabolo nyi dadiwe pohtawe kalarri bahhina mono na ngidiyi kabalka taha dau kahika. ³⁰ Bege, Yesus naka nukakayi ata nada, "Iyawu ngaramu?" Baleha nage ata nadda, "Legion" oro buta layi waddi japata katamani. ³¹ Waddi japata radda da rainoge tabara-Na inna Nyi ilna harehayi yidda leju ta lirra mate. ³² Ta hadau nedda, dadi kalibbo wayi buta katamrana mayegana ha yayo ta letena. Waddi japata radda rainoge tabarai Yesus kana yammadi yidda tama lari ta jalibbo wayi radda, mono Yesus na pahidi yidda. ³³ Nyiwe, waddi radda dummo huna wali ta ata nadda mono tama neda lari ta wayi, lohho kalibbo way rada malai dage burru ta karapeha letena ka kiddi aro ta hoba mono bullo. ³⁴ Kole ka angudi wayi eatayi, yidda da malai mono takkiwe kadadi inna ta harona mono ta kalingorage. ³⁵ Nyiwe, ata buta ammidi kapiku etawe agawe kadadi. Yidda ammidi tabarai Yesus mono dikini ata paha hoilabe wali ta waddi japata nadda tamrana ngodo ta koko ledunai Yesus, na taube kalabbe, mono na pibewe hangadana. Hada inna da madauta danga dalige yidda. ³⁶ Yidda ka etawe kadadi inna da takkiwe ta ata wadeka aga lina dawe ata hatamana waddi japata nada baha tagahayi. ³⁷ Lohho, tanggada ta ka engana taha dau nedda kalingora Gerasa karaiyiyi Yesus kana tanadi yidda oro yidda bana lubbudi madauta ai ka anana. Oroge inna, Yesus panne nage ta tena mono hagga ta Galilea. ³⁸ Ta nyiduwe, ata paha hoilabe wali ta waddi japata nadda rainoge tabarai Yesus dajalage nyi kana ole hangatani Yesus. Tabolo, Yesus naha lewayi kako, linna-Ge, ³⁹ "Hagga wu ta ummamu mono takkiwe hada ai ka anana inna harayi benai Allah ta tutumu." Ata nadda dummo kako ta tangage huppu harona mono takkiwe agawe harayi benai Yesus tabarana. Anai Yairus Hakaddeyi Mono Wu Lawai Hataga Hayi ⁴⁰ Kolei Yesus hagga ta Galilea, ata buta tabbo kayi-Nyi oro yidda bada rema beduni-Nyi. ⁴¹ Taha hadau nedda dani wuyo ata ka ngaranai Yairus kamai tabara-Na, nyi wuyi kapala Sinagoge. Hagapege kawojo kataba ta koko ledunai Yesus, Yairus na rainoge dajalage Nyi mai ta ummana ⁴² oro nyi dakini ana lawai kanahha kina baka katutu kayi kabulu duda dauna, mono lakawa nadda hodi mowe matena. Mono, kolei Yesus aro neda bali, ata buta ha kahhi hinguna ka kilorani-Nyi. ⁴³ Nedda dani wuyo lawai kamoja bena kalawara rayo aika anana ka bullu dudda dauna, mono wale wu hingmana ata kaha tagahayi. ⁴⁴ Lawai nadda dahekayi Yesus wali ta lirana mono joja nage huppu kalabbe-Na, nyiwe inna mema dummo kalawara rana na ngahuwe. ⁴⁵ Nyiwe, Yesus linage, "Iyayi ka joja-Wa?" Oro tangada ata kaballu, Petrus linage, "Guru, ata buta kama kahha ka kilora-Gu da ha kahhi danga hingu-Gu!" ⁴⁶ Ta nyiduwe, Yesus linage, "Dani wu ata ka joja-Wa oro Nauwa ug padage bikta-Gu huge wali tabara-Gu." ⁴⁷ Kole lawai nadda bana tadawe ai dadiwe bana labailagege tauna, nyi na mai tabarai Yesus waige madauta mono naka wojo ta arona-Nyi. Ta roda tangada ata, nyi naha larawe ahha nyi mana jojayi Yesus, mono aga lina dawe nyi bana tagaha mema. ⁴⁸ Bege, Yesus linage tabarana, "Ana-Gu, ha tenamu naha tagahawu. Kakowu lari ta moli kama ringina." ⁴⁹ Kolei Yesus batamra hona hanewe, wu ata wali ta umma kapala sinagoge nadda ammini mono linage tabarai Yairus, "Ana lawaimu na matebe. Ilam ha joli kayi Guru." ⁵⁰ Ta nyiduwe, rangewe kadadi inna Yesus linage tabarai Yairus, "Ilam madautawu. Hatena dakwe anamu na hoila." ⁵¹ Kolei Yesus dikki ta umma nai Yairus, Nyi walena pahai madi langka iya hingu kayi tama ole dangani dukkai Petrus, Yohanes, yakobus, lohho amana mono inyana lakawa nadda. ⁵² Tangada ata hoyo mono bada honi lakawa lawai nadda, taboloi Yesus linage, "Ilam hokami, nyi walena matekma tabolo dura nage.'' ⁵³ Ata buta radda dummo malhani-Nyi oro yidda bada tadayi lakawa lawai nadda bana matebe. ⁵⁴ Ta nyiduwe, Yesus na narro nani limmana lakawa nadda mono na haradduyi, "Kaddewuge, lakawa!" ⁵⁵ Nyiwe, hagawege ngahuna lakawa nadda mono inna mema dummo na dede. Nyiwe Yesus naha lewayi lakawa nadda kadda yini hayana. ⁵⁶ Ka dudana ata katuna radda bangara, taboloi Yesus na heridi yidda takkiwe ta iya hingu kana tutu agawe inna kadadi be.