Kabani Yesus ¹ Yesus, kabanuna Waddi Bihha hagga wali ta Yordan. Bege, Nyi na kodoni Waddi Bihha aro ta marada gilra ² ka pata kabulu laddona tutu kabani kabalka. Nyi wale na yakma katauna mojana inna. Kole ba nari benage, nyi nakalabba. ³ Nyiwe, Kabalka linage tabara-Na, "Nyi yau Ana Allahwu, halewayi watu radda dadi kababa." ⁴ Yesus na balehawe, "Dage kama tolha, 'Kadadi ata morha walle wali ta kababa kelma."' Ulanga 8:3 ⁵ Bege, Kabalka na ngidiyi Yesus taha dau kama dehta mono naha tingo nage tabara-Na tangage parehage panu tana waige hada ka hodi kina. ⁶ Nyiwe, kabalka linage tabara-Na, "Nauwa ug yiguge kawahamono manadana ta tangadi radda, oro tangadi da yibe gadi tabragu. Mono, nauwa ug yiyi tabara ba iya hingkayi nauwa ha kabu ategu. ⁷ Nyiwe, nyi Yau bamu kangak kaga, tangadi radda enga daumu-Di." ⁸ Nyiwe, Yesus balehawe, "Dage kama tolha, 'Yau um kangak kadahoni Mori Allahmu, mono dukka tabarada hona bamu kawojo."' Ulangan 6:13 ⁹ Bege, Kabalka na ngidiyi Yesus ta Yerusalem lohho natauyi Nyi ta toko Ummanai Allah. Linage kabalka tabarai Yesus, "Nyi yau Ana Allahwu, dolka wiki holamu-Ge wali inne aro inna lari, ¹⁰ oro badage kama tolha, 'Tutum Yau, Allah enga pareha nadi malaikat-Na tutu bana jawa-wu.' Mazmur 91:11 ¹¹ Mono, 'Waidi limmada yidda, yidda enga harema dadi dajalage ledu-Mu ilna yannayi ta watu."' Mazmur 91:12 ¹² Balehanai Yesus tabarai Kabalka, "Dage kama tolha, 'Ilam kabani Mori Allahmu."' Ulangan 6:16 ¹³ Kolei kabalka bana beha kabani Yesus, nyi kako nage tannani-Nyi mono remage mahiggo wadeka. KAPUGE HA ULLANAI YESUS TA GELILEA ¹⁴ Yesus nahagga ta Galilea waige banuni kawaha waddi, mono liyo tutu-Na matalarawe ta kalingora hadau nedda. ¹⁵ Nyiwe Nyi halege nage talarage ta sinagoge mono tangada ata Daika-Nyi. Yeusu Tularani Ta Harona Dau Walina ¹⁶ Bege Yesus kako nage ta Nazaret, harona dau Ny baha matuyi. Katauna ka kalli damma-Nyi, Yesus kako nage ta Sinagoge ta laddo ngahu mono na dede bana bahha. ¹⁷ Jurata Nabi Yesaya da yinage tabara-Na, nyiwe Nyi na bugerage jurata inna mono na tabo kawe kama tolha, ¹⁸ "Waddi nai Mori dani tabara-Gu, oro Nyi naha didara bewa Nauwa tutu talarage Liyo kadahha tabara ata milla. Nyi naha lewawa Nauwa talarage hoila tabarada tangada ata ha lokata, maono tagaha paeta tabarada ata moro, tutu pahoila ta ata hapittada, ¹⁹ mono ngidiwe inna dau kanyurru Mori ba ammi bege." Yesaya 61:1-2 ²⁰ Yesus na toniwe jurata inna nyiwe mana pahaggage tabara kanarroge umma dau kangote, mono Nyi na ngodo. Mata tangana ata lari ta sinagoge inna da engana ta tau-Na. ²¹ Nyiwe, Yesus kapunage hanewe tabarada yidda, "Laddo nehhe, bannu nage agawe hatolha ta Jurata Bihha inna bamu rangewe." ²² Mono, tangada ata dahha tenayi-Nyi hagapege bada hangatara rada hatakkina ka dahhaki ka huna wali ta ba-Na. Yidda lidage, "Nyi nadde wale anai Yusuf kaduyi?" ²³ Bege, Yesus linage tabarada yidda, "Miyi enga takki mini nara newe nadde tabara-Gu, 'Jawa dotera,na hatagaha guge tau dau-Mu! Nami rangeyi hada Yau harayimu ta Kapernaum, rayi jaladi radda ta hadau inne, ta harona ha wali dau-Mu.'" ²⁴ Bege Nyi linage, "Nauwa luguge tabarami, tau takka nage lakma nabi pahibba taharona dauna. ²⁵ Lari katena, Nauwa luguge tabaramu, buta layi lawai balu ta Israel nutu pona tai Elia, kole langta matoniwe ka tauda dauna mono anni wulla, kole kareba kalla dadiwe taha dau nedda. ²⁶ Ta nyiduwe, Elia wale halewa awak mayi langka iya hinguyi duka hege ta lawai balu ta Sarfat, ta kalingora Sidon. ²⁷ Mono, dadi kabuta kalawara kusta ta Israel ta morihanai Elisa, tabolo wale lahing mana wali ta yidda paha tagaha dukkai Na aman, ata Siria nadda." ²⁸ Kole rangewe hada inna, tangada ata lari ta sinagoge inna naka lubbudi bani. ²⁹ Nyiwe, dede dage yidda mono werakani Yesus huna wali ta harona inna, dajalage da ngidiyi-Nyi ta pannu letena ta haronada yidda paha kadde kapikku doluni Nyi ta lirra. ³⁰ Ta nyiduwe, Yesus na yelana wali ta jongada yidda mono kako nage. Wu Kabani Pajoilani Hawiddi Japata ³¹ Yesus na kako ta Kapernaum, kalingora Galilea, mono naha nuawana ata buta ta laddo Ngahu. ³² Yidda da hangatarage hanuawa-Na oro hanewe-na kabannuna kawaha. ³³ a sinagoge, dani wu ata kabani hatamana waddi japata ka akta. Ata nadda nakawula waige lina kama wangta, ³⁴ "Yamma gama nami kama meha! Agawe ha orha-Mu tabarama, ta Yesus, Ata Nazaret? Appa Yau maimu ba liloko gama nami? Nauwa ug tadawe ba iyawu Yau, Ka tenguna Wali tai Allah!" ³⁵ Ta nyiduwe, Yesus naha gagtayi waddi japata nadda, lina-Ge, "Kadanawu! Kmu hunage wali ta ata nadda!" Kole marapu n adda baktani ata nada ta tana, ta aro tangada ata, nyi na huna wali ta tauna ata nadda mono naha pakhayi. ³⁶ Waige banu bannuge bangara, tangada ata kadana nedda lidage dihha-dihha, "Aga hanewe inna? Oro waige battona mono kawaha, Nyi naha rehayi waddi akta rada mono yidda huna." ³⁷ Mono, liyo tutui Yesus ma habarawe ta tangage hadau kalingora inna. Yera Lawai Nai Petrus Mono Ata Buta Hatagahyi ³⁸ Bege, Yesus na tanage umma kangote inna mono kako ta ummanai Simon. Inna na, yere lawainai Simon tamrana kalikka tetakka, oroge inna yidda da karayiyi Yesus kapiku hatagaha nani. ³⁹ Nyiwe, dede nagei Yesus tabarana yera lawaina Simon mono naha gagtawe kalikka inna, mono kalawara dummona tagahawe. Inna memage, yera lawaina Simon kadde nage mono kapunage hanukkuyi yidda. ⁴⁰ Kole mata laddo manari tama nage, tangada ata da ngdiyi ole baida yidda halina kalawara tanga ngara kalwara tabarai Yesus. Begei Yesus na ijalayi limma-Na ta yidda dihha-dihha mono hatagahayi yidda. ⁴¹ Marapu radda dummo huna wali ta ata buta radda hagapege kawula, "Yau dunage Ana Allah!" Ta nyiduwe, Yesus naha gagtayi yidda, Nyi wale pahai madi yidda hanewe oro yidda tadawe inna Nyi bai Kristus suyi. Yesus Na Hotbah Taharona Wadeka ⁴² Damma hege tana Yesus na kako ta wuha dau ka hika bana mehaki. Ata buta na mayegani-Nyi, mono kole yidda tabo kayi- Nyi, yidda darayigwe padekayi Nyi ilna tanadi yidda. ⁴³ Ta nyiduwe, Nyi linage tabrada yidda, "Nauwa ug talara dahoge liyo ege ate Kalingora parehai Allah ta tangada harona wadeka dummo oro ba nyiduwe gauge Nauwa maha lewawa." ⁴⁴ Nyiwe, Yesus na hotbah ta sinagoge-sinagoge ta Yudea.