Li Kaddenai Yesus ¹ Ta laddo kawungana miggu inna, ba koko kahokkiwe, lawai radda kako ta ratenai Yesus hagapege ngidi ka bau mumra paha inya kabeda. ² Mono yidda da dikini watu madakka makogola labe wali ta rate. ³ Ta nyiduwe, kole yidda bada tama, yidda wale da etak mayi karogo na Mori Yesus. ⁴ Kole yidda ba tamrada hangatara oro hada inna, kadadaka ngidyi duda ata kawaina kalabbe magilata dede ta tibbida yidda. ⁵ Lawai radda da madauta mono da kabunyige matada yidda, tabolo kadudana ata radda liddage, "Ahha miyi mamu mayegani ata kamoriha ta jonga ata kamate? ⁶ Yesus wale lak mani inne, Nyi na kaddebe. Apewela agawe ha takki benagimi Nyi tabarami kole Nyi bata ta Galilea hoyi. ⁷ Nyi linage nada anana kdadi Ata yida hoyi ta limmada ata jala, ha dailo hoyi, mono enga kadde hagga hona ta laddo hatauda wai." ⁸ Nyiwe, lawai radda da apewe tangage hatakkinai Yesus. ⁹ Kole yidda hagga wali ta rate nai Yesus, yidda daha larawe tangage kadadi tabara kabulu dudana rasul lohho tangada kadokuni Yesus wadeka. ¹⁰ Lawai kaha larawe hada inna tabarada rasul wale iyak mayi Maria Magdalena, Yohana, Maria inyai Yakobus, mono kapirana lawai wadeka. ¹¹ Ta nyiduwe, ha dukada lawai radda da yappawe kahoko dage lidage rasul mono yidda waleda dahatenak mayi tabarada lawai radda. ¹² Ta nyiduwe, Petrus na dede mono na malai ta rate nai Yesus, Nyi na nyoko mono na torrowe lari, tabolo nyi na eta hewe kaba ta lujjana haboro wai karogona. Kole innage,Petrus hagga nage naha hangatara ta tangage agawe inna kadadi. Yesus Naha Dedala Wikina Ta Ata Kadokuni-Nyi ¹³ Ta laddo inna dummo, duda ata kadokun i Yesus kako ta dihha wu deha ka ngaranai Emaus marauge ba katutu kawe anni kabulu stadiage wali ta Harona Yerusalem. ¹⁴ Kadudana ata radda da dulkawe tutu tangage kadadi inna. ¹⁵ Kole yidda tamrada hanewe mono hanone kana hangada, Yesus dede nage mai dahekayi lohho kako ole dangadi yidda. ¹⁶ Ta nyiduwe, matada yidda na matoniyi dajalage yidda wale da tadak mayi Nyi. ¹⁷ Yesus linage tabarada yidda, "Aga kiwe hadul kami tamrami kako?" Kadudana ata radda da ngahu mon matada yidda na ropowe. ¹⁸ Wu ata wali ta yidda ka ngaranai Kleopas linage tabara-Na, "Appa Yau ata li pala kawu ta Yerusalem ma walem tadawe agawe ka abbu kadadi inna?" ¹⁹ Yesus linage, "Tutu agawe?" Yidda dummo lidage tabrana Nyi," Tutu nai Yesus wali ta Nazaret, Nyi wuyi Nabi kabanuna bikta pareha bana hanewe lohho harayi-Na ta aronai Allah mono ta raoda tangada olema nami. ²⁰ Ta nyiduwe, rato-rato kapala mono pa amama nami na yiyi Nyi ba hoku mateni, mono yidda da kadailoni-Nyi. ²¹ Doku dage ma manne ge nami Nyila ka pa hoilawe Israel. Ta nyiduwe, laddo nehhe laddo hatauda wai wali tangage inna bana dadiwe. ²² Ta nyiduwe, kapirana lawai wali ta jongam nami dahha kadada kama nami. Kole yidda bada kako ta rate ko kokaki, ²³ yidda waleda dikkik mage karogonai Yesus. Lohho, yidda hagga mono da takkiwe inna yidda bada eta beyi malaikat bada hadedala wikina, katakkiwe Nyi bana morhabe. ²⁴ Bege, kapirana wali ta nami kako ta rate mono dikige katauna pa takkida lawai radda. Ta nyiduwe, yidda wale da etak mayi Yesus." ²⁵ Bege, Yesus linage tabarada yidda, "Oh, hadda kabangami miyo mono naka babawe atemi tutu aim hatenawe tangage hatakki beda tangada Nabi. ²⁶ Nai Kristus walena na padak hoge mayilla inna mono tama lari ta manada-Na." ²⁷ Lohho, Yesus nahalarawe tangage kama tolha lari ta tangada Jurat Bihha tutu tauna-Nyi, wali ta Juratai Musa kahha ta juratada tangada Nabi. ²⁸ Kole yidda bada dahekawe deha Emaus, Yesus na kako hangatana mera lurrha nage kako-Nyi. ²⁹ Ta nyiduwe, yidda da pattuyi Nyi waige balidda, "Ole ha kita gama nami oro ma nari gak nage mono mata laddo hodi mowe tama nage." Nyiwe, Yesus na tama oledi yidda. ³⁰ Kole Nyi hadabbola dangadi yidda ta meja bada yayo, Yesus na ngalayi kababa mono naha maringiyi. Nyi na hibiyi, lohho na yidi yidda . ³¹ Inna mema, matada yidda na ma bugerayi mono yidda da tadayi Yesus. Tabolo, na bunga ha yadda wali ta aroda yidda. ³² Kole innage, liddage dihha-dihha, "Ateda yitta walena kadada ka hingkawe kole Nyi bana hanewe dangada yitta inna talara mono kole Nyi bana halara dage Jurat Bihha tabrada yitta?" ³³ Inna mema dummo, yidda da kadde mono da kako hagga ta Yerusalem. Yidda da tabo kayi kabulu dudana ana hakodo-Na mono ata ka oledi yidda tamrada ma kahha tangada. ³⁴ Ana hakodo radda lidage tabarada yidda kadudana, "I Mori tau takkage na kadde haggabe mono naha dedala wikina tabarai Simon!" ³⁵ Kadudana kadokuni radda da halarawe tangage kadadi ta lara. Yidda daha larawe aga linna dawe bada tadayi Yesus kole Nyi bana hibiyi kababa. Yesus Naha Dedala Wikina Tabarada Ka Dokuni-Nyi ³⁶ Kole kadudana ata radda halarawe kadadi inna, Yesus na dede ta jongada yidda mono linage tabarada yidda, "Moli na ole gimi." ³⁷ Ta nyiduwe, yidda daka dadaka mono madauta. Yidda da hangadage inna yidda eta dage hala hatau. ³⁸ Bege, Yesus linage tabarada yidda, "Ahha miyo mami madautami mono mana hudawe gela gagga ta atemi? ³⁹ Torro gadi limma-Gu mono ledu-Gu. Inna Nauwa wiki dau. Jojawa Nauwa mono torrowa, hala hatau lakma kanana mono rina katauna mi ha etami tabara-Gu." ⁴⁰ Kole Yesus bana takkiwe inna, Nyi naha tingodi limmana mono ledu-Na tabarada yidda. ⁴¹ Ba tamrada yidda aida hatena howe oro ege ateda mono hangatarada, Yesus naka nukayi yidda, "Appa inna batauge dakakna kadana ha dadi hayayo?" ⁴² Lohho, yidda da yini kadibka kaboko ha dara tabara-Na. ⁴³ Yesus na ngalayi kaboko nadda mono na yani ta aroda yidda. ⁴⁴ Bege, Yesus linage tabarada yidda, "Inna yidayi hatakki-Gu tabarami bagu ole ho gimi miyo. Tangage kama tolha tutugu Nauwa lari ta ukku Tauratnai Musa, jurata tangada Nabi, mono lawiti ha panu dahoyi." ⁴⁵ Bege. Yesus na bugera dadi paha ngadada yidda dajalage yidda dadiwe yappawe Jurata Bihha. ⁴⁶ Yesus linna walige tabarada yidda, "Dage kama tolha nai Kristus na matilla dahho mono na kadde wali ta ata mate ha tauda laddo wai. ⁴⁷ Mono, jarra tutu hawalina jala enga ha dedoge lari tangara-Na tabara tangada kabihhu ata, kapuge wali ta Yerusalem. ⁴⁸ Miyo katakki gage tangage inna. ⁴⁹ Kam tadawe, Nauwa ug hangidege jajina Ama-Gu tabaramu. Ta nyiduwe, kam engana ta Harona Yerusalem kahha mi bana bannuge ba ha inya kami waige bikta pareha wali taha dau madehta." Yesus Na Panne Ta Surga ⁵⁰ Bege, Yesus na lekoyi tangada kadokuni-Nyi huna wali ta harona kahha ta Betania. Neda bali, Nyi na keke tayi limma-Na mono naha maringiyi yidda. ⁵¹ Kolei Yesus hama ringiyi yidda, Nyi napa hewa dangadi yidda mono na makeketa ta Surga. ⁵² Lohho, yidda da kawojoni-Nyi mono da hagga ta Yerusalem waige lagahara. ⁵³ Yidda dayo hangatadi lari ta Umma Allah mono da dai kayi Allah.