¹ Ta rahi inna, Kaisar Agustus na pahuge hareha kapiku tolhayia ngarada tangada ata ta panu tana. ² Inne nyiwe tolha ngara ata kawungana pa rayi kolei Kirenius bana dadi Gubernur ta Siria. ³ Nyiwe, tangada ata da hagga dahho dau walida dihha-dihha kapiku tolha dage tauda. ⁴ Yusuf dummo tannage Nazaret, harona ta Galilea, mono aro ta Yudea, ta ha ronai Daud paha ngarada Betlehem, oro nyi ba walina dalara ana huhui Daud, ⁵ dajalage nyi ka tolha nage ngarana gauni Maria, lakawa winne na, katamrana hatiyo. ⁶ Kolei Yusuf monoi Maria dikki ta Betlehem, dikki nage rahige maria bana ha ana. ⁷ Maria dummo naha anani wuyo lakawa kabani ana bodina. Nyi na ublayi Nyi waini kaba karakta mono naha baikani Nyi neda lari ta karaba oro ai dayo koro tubada yidda dau dau. Tangada Kajawa Ranga Etayi Yesus ⁸ Taha dau nedda dummo, dadi kapirana kajawa ranga ka engana ta maradda jawayi bebbeda yidda bana gaddige. ⁹ Kadada ngidiyi, malaikat nai Mori na dede ta aroda yidda mono manadanai Mori magakahage ka kiloradi yidda dajalage yidda hadda madautayi. ¹⁰ Ta nyiduwe, malaikat naddalinage tabarada yidda, "Ilam madauta mi oro rangewela, Nauwa mai takki guge tabarami liyo ka dahha tutu ege ate kama dakka paha yanna tubada tangada ata. ¹¹ Ta laddi inna, na dadi be tubami wu ata Hadda hoila, halinawe Kristus, Mori, ta haronai Daud. ¹² Inne nyiwe tadagwe tubami: Miyo diki mini lakawa ha boro wai kaba karakta mono paha baika lari ta karaba." ¹³ Ha yaddawe, dalidi kalibbo malaikat rada katau kalina butana tentara ta surga ka daikayi Allah mono lidage, ¹⁴ "Manadana tubanai Allah taha dau hada madehta mono moli kama ringina ta panu tana, ta jonga ata ka tuba ta arona tabaraNa.' ¹⁵ Kole tangada malaikat ijakadi tangada kajawa ranga rada mono hagga ta surga, tangada kajawa ranga radda lidage dihha-dihha,' Mai da yitta ta Betlehem kapiku eta dage agawe kadadi inna, ha takki benadai Mori tabarada yitta." ¹⁶ Lohho, yidda da geha kako mono da tabokayi Maria monoi Yusuf lohho lakawa kabaika taka karaba ranga. ¹⁷ Kole tangada kajawa ranga etayi Nyi, yidda da takkiwe hanwe hatakki beda tabarada yidda tutu Lakawa nadda. ¹⁸ Mono, tangada ata karangewe kama hada inna hangatara wali tangage hatakkida ata kajawa ranga tabarada yidda. ¹⁹ Ta nyiduwe, Maria ijalawe tangage inna mono daha ha gukkuwe lari ta ateda. ²⁰ Loho, ata jawa bebbe hagga ta bebbeda yidda hagapege hamanadayi mono daikayi Allah oro tangage inna yidda ha etada mono ha rangeda tujawe hatakki tabarada yidda. ²¹ Mono, kole podo pata laddona tutu ba kabunyini Lakawa nadda, ngaraNa Yesus lidani, tujawe ngara ha yina malaikat Nyi ai hatihoni. Yesus Da Ngidiyi Ta Umma Allah ²² Kole laddo ba hamurahana dokuge ukkui Musa ba bewe, Maria monoi Yusuf ngidiyi Yesus ta Yerusalem kapiku ba yiyi Nyi tabarai Mori, ²³ tujawe kama tolha lari ta ukku nai Mori, "Tangadi lakawa kabani ana bodi paha tengu dahoyi tubanai Mori ²⁴ mono tutu yiyo manuta dokuge agawe hatakki lari ta ukku parehanai Mori, rada duda rawa waleka duda ta gukku maupa bodi," Simeon Monoi Hana Etayi Yesus ²⁵ Dani wuyo ata katuna kabani ka ngaranai Simeon engana ta Yerusalem. Nyi ata katenayi mono hatena, karemage agu ate Allah Israel, mono Waddi Katenguna oleni. ²⁶ Waddi Katenguna na takki nage inna nyi wale na matekma aina eta dahoyi Kristus ha dede nai Mori. ²⁷ Nyiwe Simeon ammini ta Umma Allah oro Waddi Katenguna, kolei Yusuf monoi Maria ngidiyi Yesus ta Umma Allah tutu pahadawe tangage tabaraNa agawe paha yanna be ta Ukku Pareha taurat . ²⁸ Bege, Simeon lairuyi lakawa nadda mono daikayi Allah, linage, ²⁹ "Batauge, o Mori, bana dadik kawe Yau bamu pahaini ataMu nadde kako waina moli, dokuge liMu; ³⁰ oro matagu eta bewe mane mara wali tabaramu, ³¹ paha ganna bemu Yau ta arona tangana ata; ³² inna magakaha enga kama gakahani tangana ata ai ka tadayi Mori, mono manadana tuba ana huhuMu, Israel." ³³ Yusuf mono inyana Lakawa nadda da hangatara agawe hatakki nai Simeon tutuna Nyi. ³⁴ Bege, Simeon naha maringiyi Maria, inyanai Yesus, "Rangewe, Lakawa nadde paha inyaka benani tutu ha monudi mono ha kaddeyi ata buta Israel, lohho dadi tadka nani ata buta. ³⁵ (Mono, gayu katopo enga duhka nani urramu) dajalage ngihi atena ata buta enga dedoge." ³⁶ Neda bali dumo dani wu ata nabiah ka ngaranai Hana, anai Fanuel wali ta kabihu Asyer. Nyi naka tu hingna. Nyi dukka morha dangani laina kapitu dauna kole bada nikah, ³⁷ mono be inna lawai balu nage kahha ba podo pata kabulu dauna. Nyi wale kali tanak mage Ummanai Allah, tabolo kangote laddo mono gaddi wai kabukta mono sembayang. ³⁸ Ta mahiggo inna, ammini Hana mono nyi wai linage tabarai allah lohho na takkiwe tutui Yesus tabara tangada ata ka remage kah kawe Yerusalem. Yusuf Monoi Maria Hagga Ta Nazaret ³⁹ Kolei Yusuf monoi Maria rayige tangage dokuge Ukku nai Mori, yidda hagga ta Galilea, ta harona dau walida yidda, ta Nazaret. ⁴⁰ Lakawa nadda dummo kiki matunage, kulha, mono na tada, monoi Allah naha maraingiyi-nyi. Yesus Ta Ummai Allah ⁴¹ Nahiyi dau, ata katunai Yesus kako ta Yerusalem ta Laddo Madakka Paskah. ⁴² Kole Yesus ba kabulu duda dauna, yidda da kako neda bali dokuge ka damma ta lado madakka nada. ⁴³ Kole ba beyo raya rameni, yidda hagga dage. Tabolo, Yesus engana ta Yerusalem wale da tadak mayi ata katuna-Nyi. ⁴⁴ Oro ata katuna Yesus paha ngadada Nyi enga dani ta jonga ta buta, yidda dummo ha kita dage kako kahha mamali pannuyi dihha laddo. Nyiwe, yidda halege dage mayegani-Nyi ta jonga ole baida mono ata ha tadada. ⁴⁵ Kole yidda aida tabaokayi Yesus, yidda hagga dage ta Yerusalem bada mayegani-Nyi. ⁴⁶ Kole tauda laddoda, yidda da tabo kayi ta Ummanai Allah tamra ngodo nage ta jonga guru-guru agama, ha gapege bana rangeyi mono kanukayi tabarada yidda. ⁴⁷ Tangada ata ka rangeyi-Nyi da hangatara oro tadana mono gtangadi baleha-Na, ⁴⁸ Kole ata ka tuNa etayi Nyi, yidda dummo hangatara. Nyiwe, inyana nakanukayi, "Ana,ahha Yau mamu rayige inna tabarama nami? Ama-Mu mono nauwa paratama mayega-Gu." ⁴⁹ Balehawei Yesus tabarada yidda, "Ahha miyo mami mayegaga Nauwa? Walem tadak mawe yau inna Nauwa bagu enga dahona ta umma Ama-gu?" ⁵⁰ Ta nyiduwe, yidda wale da yapak mawe agawe inna hatakki-Na tabarada yidda. ⁵¹ Nyuwe, Yesus hagga oledi yidda ta Nazaret mono dokudi yidda. Tabolo, inya-Na na ijalawe hanewe inna lari ta atena. ⁵² Yesus dummo kiki matunage mono kiki maniwola. Nyi dummo kiki na baini Allah mono ata.