Tutu Hatagaha Ata Ta Laddo Ngahu ¹ Ta dihha wu laddo Ngahu, Yesus ammini ta ummana wu pa ama ata Farisi yayo ole dangani kababa mono tangada yidda daha matarani Yesus. ² Innana, dani wu ata ka lawara ai enu weyo ta aro-Na. ³ Yesus linage ta ata Farisi mono ahli-ahli Taurat, "Appa na dadi kakwe hatagaha ata ta laddo Ngahu?" ⁴ Ta nyiduwe, yidda wale da bale hakmayi-Nyi. Bewalge Yesus dummo na narroni ata kalawara nadda mono naha tagahayi, lohho naha lewayi ata nadda kako. ⁵ Yesus linage tabarada yidda, "Iyayi wali tajongami nyi anana waleka hapi manena monu lari ta kagobakana ta laddo Ngahu, ai ka geha tingiyi pahuni ta balu haddu?" ⁶ Nyiwe, yidda dummo wale na dadik mawe gabage hanewe-Na. Hadau Paha Aka ⁷ Bege, Yesus na tak waliyi wu hatujja tabara kulla ha lehu kole Nyi bana etayi aga lina dawe bada pedena hadau ngodo ata paha aka ta kalingora meja hadau yayo, lna-Ge tabarada yidda, ⁸ "Nyi mi bada kalehu ka gimi ata ta wuyo haulla ha ummana, ilam ngodomi taha hadau ata paha aka oro mori umma nada enga kalehu benadi ata karehi liyo dete wali ta baramu. ⁹ Lohho, mori umma nada enga diki nagu mono linage, 'Hadau ngodok nage ata nadde!' Mono, yau dummo um dikki dahowu taha dau kahada li bawa bamu makke danga dalige. ¹⁰ Tabolo, inna mi baka lehu kagimi, ngodo dami taha dau kata lirana dajalage kole ba ammini kalehugu, nyi enga linna tabaramu,' Ole ate, dikki dawu taha dau kahadda paha aka.' Waige katauda dana, yau um kolege ha aka ta aroda ata ka ngodo yayo ole danga gimi. ¹¹ Oro, tangada ata kaha madehta wikina enga ha bawayi,tabolo nyi kaha liyo bawa wikina enga hama dehtani." Kalehu Yayo Mono Gabage ¹² Lohho, Yesus linage ta ata ka lehuni Nyi nadda, "Nyi miyo bamu rayi kage yayo tanga laddo waleka yayo gaddi, ilam kalehu kadi olem, angu wumu, tangada ole baimu, waleka ole bara ummamu ka pote oro yidda enga hagaba daguge tabramu waige bada kalehugu yayo ole dangadi yidda. ¹³ Ta nyiduwe, nyi mi bamu rayi kage ha ulla, kalehu dadi ata milla, ata ai tidana, ata kalikku, mono ata moro. ¹⁴ Mono, mi enga maringina oro ata radda walena dadik mawe hagaba hagga guge; mi enga kole mige gabage ba dikkige kadde haggana ata katena." Hatujja Tutu Kalehuna Ba Yayo ¹⁵ Kole wu ata ka yayo ole dangani-Nyi rangewe hatakki inna, ata nadda linage tabara-Na, "Maringi kanala ata kayayo kababa neda lari ta Kalingora nai Allah." ¹⁶ Ta nyiduwe, linagei Yesus tabarana ata nadda, "Dani wu ata karayige kalibo yayo gaddi kama dakkala mono nyi naka lehuna ata buta, ¹⁷ mono kole ba rahi yayo gaddiwe, ata nadda naha lewayi atana kapiku takkiwe ta kulla paha lehuna, ' Maim ge, oro tangage ha iya beyi.' ¹⁸ Tabolo, tangada kulla pa halehu rada kapudage rayige kappege. Ata paha dihha wai linage,' Nauwa abbu higuge tana mono nauwa ug kako dahowa elowe. Hiba gage maraino bani kaga.' ¹⁹ Nad wadeka linage,' Abu hi kigudi limma hapi mono nauwa ug kako dahowa eloyi hapi rada. Hiba gage maraino bani kaga.' ²⁰ Wadeka jala lidage,' Nauwa abu ha umma kigu. Oroge inna, nauwa wale na dadik mawe mai.' ²¹ Nyiwe, ata paha lewa dummo nadda hagga mono takiwe tangage inna ta morida. Nyiwe, morida nada na bani, lohho linage tabara ata paha lewana, ' Gehawuge! kaowu ta lara mono tangadi lara kalokana taha rona inna. Ngidi gadi tabaragu ata milla, ata kalikku, ata kabeko, mono ata moro,' ²² Bege, ata nada linage tabrana, 'Mori, nauwa ug rayi bege agawe yau paha lewamu, tabolo da jala hodi hadau ai kadayo atana.' ²³ Ha ama nadda linage tabra ata paha lewana, ' Kakowuge ta kangali tana mono tangadi lara kalokana. Lekoyi ata neda bali kapiku maida nimmi dajalage ummagu kana bannuge. ²⁴ Nauwa luguge tabramu, wale wau hingmana wali ta yidda paha lehugu ullugu rada ka padage yayo paha inya kagu."' Tutu Dokuni Yesus ²⁵ Buta ata ka kako ole dangani Yesus. Bege Yesus na gilakadi yidda mono linage, ²⁶ "nyi wu ata ba ammini tabara-Gu tabolo bana buttu kani ate amana mono inyana, ole ummana mono anana, angu wuna mono wattona, lohho dummo morha dauna, nyi wale dadi mawe bagi ana hakodo-ni. ²⁷ Ba iya duyi ai kaditayi kadailona mono dokuga Nauwa, nyi wale na dadik mawe dadi ana hakodo-Gu. ²⁸ Iya ka duyi ta jongami kabaige hadedewe wuyo toko umma, aika kangodo ulluho mono yapudi amaha kapiku tadawe appa na tutuyi amaha kahha ba bewe? ²⁹ Nyi ai tauda dage, kole nyi bana rayige hadau lija kage mono aina tutu kawe kahha bana bewe, tangada ata ka etayi enga malha dani nyi. ³⁰ Ata rada enga lidage,' Ata nadde kapuge rayige, tabolo nyi aina mukkage bewe." ³¹ Waleka, iya rajayi ka kako hatau gabana raja heka tabolo aina ngodo ulluka mono pijjawe appa nyi bana oledi ka kabulu ratana tentarana dadi kakwe gabadi muhhuna ka duda kabulu ratana tentarana? ³² Nyi nyiyo aina dadi kawe habakkeyi raja wadeka nadda, nyi enga halewa nani wuyo ata mono kanukkawe nautage ba moli kole ata hagabana rada bada marauho. ³³ Tauda dummo nage miyo dihha-dihha, wale wu hingmana ta jongami kadadi ana hakodo-Gu nyi nyiyo aina yikayi tangadi hadauna." Mahhi Ka Kabba Wale Lakma Gaudi ³⁴ "Mahhi inna kadahha, tabolo nyi mahhi inna bana bungawe mahhige, aga linawe ba rayige kana mahhi hagage? ³⁵ Mahhi inna wale hilu na dadik mawe ba waige tutu oma waleka hadauka dangadi dajalage ata dukage bana baitage. Iyayi kamangu katilluna kana range, yammani nyi kana range!"