Kamaikana Kapiku Jarra ¹ Nedda, dadi kata takkiwe tai Yesus tutu ata Galilea inna rada paha kahha nai Pilatus ha oledi maraka da yidda. ² Balehawei Yesus tabarada yidda, "Appa mi taha ngadamu ata Galilea rada rehi hoda jala wali ta ata Galilea wadeka oro yidda bada mayilla tau dana? ³ Nauwa luguge tabarami, walekma. Ta nyiduwe, nyi mi aim jarrami, mi dummo enga mate jalami. ⁴ Waleka ka bulu podo patana ata kamate, kole toko umma kadahekawe dau hariha Siloam tabuhtawe mono biraka kadi yidda, appa inna paha ngadamu yidda he kajala karehi mayarha wali ta tan gadi ata ka engana ta Yerusalem? ⁵ Nauwa luguge tabarami, walekma. Ta nyiduwe, nyi mi aim jarrami, mi tangam enga matemi!" PU YAYU AI KA WUYO ⁶ Yesus dummo na takkiyi liha tujja nada: "Dani wu ata kamangu pu kapulotana pa taddona ta oma anggurna. Ta nyiduwe, nyi bana mai mayegana wuna yayu nadda, nyi walena kolek mana. ⁷ Nyiwe, nyi linage tabarana ka nguna omana, 'Tallu dau begu bagu maiwa mayegana wuna yayu kapulota nadda, tabolo nauwa walegu jammuk mawa langka wuka. Pogok kayo yayu nadda! Ahha ma wala waige tana inna ta pu yayu nadda?' ⁸ Ta nyiduwe, mori oma nadda na balehawe, 'mori, yi pitoni mahiggo nadda pu yayu dau nadde ragga wu kakna. Pahaiga kagu kojawa tana ta kalingorana mono kagu tauni hadauka dangana, ⁹ ragga pu yayu nadda bana dadi kak we wuyo nimmi dau ta aro. Nyiwe aina wuka, mori um pogok mukiyi lagge."' Yesus Nahatagaha Ta Laddo Ngahu ¹⁰ Diha wu hadakka, Yesus naha nuadi ta Sinagoge ta laddo Ngahu. ¹¹ Neda bali damni wu lawai hatamana waddi japata dajalage na rayini nyi halawara dangana kabulu podo pata dauna. Balena lawai nadda naka bukku dajalage wale na didarakma dede. ¹² Kolei Yesus etayi, Nyi naka maikan lawai nadda mono linage, "Ta lawai, yau pahoila bewu wali ta kalawaramu." ¹³ Bege, Yesus naha jolano limma-Na ta lawai nadda mono innna mema dummo, nyi na didara dede mono daikayi Allah. ¹⁴ Ta nyiduwe, pa ama sima goge radda butudi ateda oroi Yesus bana hatagahayi ta laddo Ngahu. Nyi linage tabarada ata buta, "Anni laddoge ullana. Oroge inna, maimi ge kapiku hatagahami ta laddo inna, walle ta laddo Ngahukam." ¹⁵ Tabolo, Mori na balehayi ata nadda, "Mi ata dahha detemi! Inna mi tangami walem pahala dumi hapi waleka keledai daumi kama katti ta gallu mono tuddayi huna kapiku enuna we ta laddo rahi Ngahu? ¹⁶ Oroge inna, walem tadak mayi lawai nadde, ba wuyi anai Abraham ha katti bena kabulu podo pata dau Kabalka, ba pahala hoyi wali ka raddini radda ta laddo Ngahu?" ¹⁷ Kolei Yesus bana hanewe taudana, tangada gaba-Na naha makkeyi, mono ata buta da lagahara oro tangage harayina habangara danga bana rayi-Na. Hatujja Wiha Watti Mono Ragi ¹⁸ Bege, Yesus linage, "Aga lina dahowe tujjage Kalingora harehai Allah inna? Aga lugu dahowa Nauwa bagu ha tujjage? ¹⁹ Kalingora parehai Allah inna natujjawe wiha watti ha nagalana ata mono hataddo ta omana; wihana nadda na tummmu dadi pu yayu, mono kawurruna ta langta da haddu ta kahangana." ²⁰ Mono wali Nyi li nage, "Waina aga dahona nauwa bagu hatujjage Kalingora pareha nai Allah? ²¹ Kalingora pareha nai Allah inna na tujjawe ragi ha ngalana wu ata lawai mono naha kilage lari katauda sukatna kababbu kahha tangage paha kila inna wudduwe." Hodi Heki Paha Mane Mara ²² Yesus na lida kahhadi harona mono deha, nyi naha nuadi mono naha kitana kako aro ta Yerusalem. ²³ Nyiwe, wu ata naka nukka tabara-Na, " Mori, appa hodi he ata paha mane mara?" Yesus linage tabarada tangada yidda, ²⁴ "Runnigela kam piku tama lida ta binna kapingota; oro Nauwa luguge tabaramu, buta ata kabaige tama neda bali tabolo yidda wale na dadik mawe tama. ²⁵ Nyi mori umma bana dede mono toniwe binna ummana, ta nyiduwe miyo dedemi ta bali haddu mono kaladige binna hagapege ba limmi, 'Mori, tollu kigama bugera gama tubama nami.' Nyi enga balehana, 'Nauwa walegu tadak mami ba giyo dau walimi.' ²⁶ Nyiwe, enga balehami, ' Nami ba yayo mono enu ole danga begu Yau. Yau um hanua bena talara harona ma nami.' ²⁷ Tabolo, Nyi enga balehana, 'Nauwa waleg tadak mami mono waleg tadak mami ba giyo dau walimi miyo. Kakomge wali ta arogu, mi tangami karayige kajapata!' ²⁸ Miyo enga homi mono ha ngaktadi ngudumi kole bami etayi Abraham, Ishak, monoi Yakub, lohho tangadui nabi kadana lari ta Kalingora pareha nai Allah tamrage mi ba baita gimi ta bali haddu. ²⁹ Bege, ata enga ammidi wali ta laddo koka mono laddo mali, monno dummo wali ta utara mono ta bannu. Yidda enga ngododa mono yayo lari ta Kalingora nai Allah. ³⁰ Tau takka nage, ata kamurri enga na dadiwe bana ullu mono ata ka ulliu enga dadige bana murri." Yesus Na Kako Dahho Ta Yerusalem ³¹ Ta nedda mema inna, kapirrana ata Farisi ammidi tabarai Yesus mono liadage, "Kakomige, tanage hadau inne oroi Herodes bainage hamate-Wu." ³² Yesus balehayi yidda, "Kakomge mono takki dage tabarana ranga nadda, 'Laddo inne mobo koka, Nauwa enga wugga gudi waddi japata m ono hatagaha ata, mono ta laddo hatauda wai, Nauwa enga beguge ha ulla-Gu.' ³³ Ta nyiduwe, Nauwa ug hakita dahoge kako-Gu laddo nehh, koka, mono do gaddi oro walena dadik mawe wu nabi mate tabali Yerusalem. ³⁴ Yerusalem, Yerusalem! Yau um hamateyi tangada nabi monom um paluyi ata paha lewa tabarami! Ug hadu wuddage Nauwa baige kahhayi anami, katujana bai manu bana kahhayi anana ta kabu kapana. Ta nyiduwe, mi walem au mawu. ³⁵ Batauge ummamu enga karingige mono na dadi kanawawe. Nauwa luguge tabramu, mi walem hilum etak mawa lagge Nauwa kahha bana dikkiwe rahige miyo enga limmige, 'Kanyurru hona Nyi kamai lari ta ngarai Mori!"'