Hanua Tutu Sembayangna ¹ Dage dihha wu laddo, Yesus na sembayangna ta dihha wu hadau. Kole Nyi beyo sembayangna, wu ata wali ta anaha kodo-Na linage tabara-Na, "Mori, hanua ki gama nami sembayang ka tujana Yohanes bana hanuadi ana hakodo-Na." ² Bege Yesus linage tabarada yidda, "Kole miyo bamu sembayangna, Sembayang dana katauda danna inna : 'Ama, paha tenguwe ngara-Mu. Dukkewe kalingora pareha-Mu. ³ Yiki gama tabrama nami ha yayo ka tutu nehhe laddo, ⁴ mono ha wali madi jalama oro nami dau dummo hawalidi jalada ata kajala tabarama nami. Mono, ilam kodo ka gama nami lari kama kirraha."' Karayimila, Mayeganala, Mono Kaladinala ⁵ Bege Yesus linage tabarada yidda, "Nyi bana dadi hewe wu ata wali ta miyo kadayo olemi kako ta umma olem nadda ba tillu gaddi hewe balinage tabarami, 'Ole, yiyo tuddu tokida tauda kababamu, ⁶ oro wu olegu katamrana kako liki nage ta ummagu, tabolo nauwa wale lahingmana kadana ta umma kagu yikini tabarana.' ⁷ Na dadi kak we olemu nadda lari ta umma balehawe, 'Ilam regawa nauwa! Binna kuhi bewe mono nauwa mono anagu ta pinya beyi dura. Nauwa wale na dadik mawa kadde bagu yigu aga hinguna tabaramu.' ⁸ Nauwa luguge tabaramu lokko nada olemu aina kadekna mono yigu aga ana tabaramu oro miyo ole ate nagimi, tabolo oro miyo bamu raino hangatage, nyi enga kadena mono yigu gayi hakabu atemu. ⁹ Nyiwe Nauwa luguge tabarami karaila, miyo enga hibami. Mayegala miyo enga jammumi. Kaladinila, binna enga bugera mige tubami. ¹⁰ Oro ba iya hingu kayi karai enga yini. Iya hingu kayi kamayega enga jammuna. Mono iya hingu kayi ka ladi, binna enga bugerage tubana. ¹¹ Dayo wu ha ama ta jongamu kayina nippe ta anana nyi bana karai ka kaboko? ¹² Waleka ka yina halatka, nyi bana karaika tallu manu? ¹³ Nyi miyo ka japata tadawe aga linna dawe bamu yini kadahha tabara anamu, at wik hoge Amamu ta Surga. Nyi enga yinani Waddi bihha tabara ata karaiwe tabara-Na." Yesus Na Waige Bikta Parehanai Allah ¹⁴ Dihha wu laddo, Yesus na wugayi kabalka wali ta wu ata kabani kabanga. Kole kabalka nada huna, ata kabanga nada dadiwe hanewe moono buta ata kaha ngatara. ¹⁵ Ta nyiduwe, kapirana ata lidage, "Nyi na wugayi kabalka wainage kawahai Beelzebul, pa amada kabalka." ¹⁶ Kapirana ata wadeka baige kabani Yesus, yidda da karaiwe Nyi kana hatingona tadka wali ta surga. ¹⁷ Ta nyiduwe, Yesus tadawe agawe yidda paha ngadada mono linage tabarada yidda, "Tangada ha ulla ka hai-haina mono ha gabba wiina enga wetarage. Mono, ta batu umma bada ha muhhu wikini enga hai -haida. ¹⁸ Nyiwe, nyi pajode dummo hai -haikana mono gabage tau dauna, aga linak kawe parehana bana tahhige? Nauwa luguge katauna oro miyo ba limmige inna Nauwa waiguge kawahanai Beelzebul tutu wugayi kabalka. ¹⁹ Nyi nauwa ug wugayi kabalka waini Beelzebul, waina kawaha iya jala hona anamu bada wuggayi yidda? Oroge inna, yidak nage kadadi hakimumu. ²⁰ Ta nyiduwe, nhyi Nauwa waikana kawaha Allah tutu wugayi kabalka, Kalingoranai Allah ammige tabarami. ²¹ Nyi wu ata ka kulha waina bajla ai kadabbo jawawe hadau dauna, nagwuna na ma inyakayi. ²² Tabolo, nyi ata karehi kulha walina na kaduka mono habakkeyi, nyiwe ata karehi kulha nadda na karamadi bajla ha manneda mono baweyi ngawu haramada. ²³ Iya hingu kayi ai kadana tabara-Gu, nyi ka gabaga Nauwa. Mono iya hingu kayi ai kahha ole dangaga Nauwa, nyi kahegaradi." Hagana Waddi Japata ²⁴ "Nadda waddi otora huna wali ta tauna nada ata, waddi nadda enga kilora nage hadau kama rakota bana mayegana hadau ngahuna, tabolo nyi wale na tabokakma. Oroge inna, nyi linage, 'Nauwa ug haga howa ta umma hatana begu.' ²⁵ Kole nyi hagga, nyi na dikkige umma inna bada morhage ba habowe mono mapaha takkawe. ²⁶ Bege, waddi otora nadda kako mono na kamaikadi pittu waddi japata olena kapiku tama mono engana ta umma inna dajalage hada ata nadda rehi ai dahha dalhoge wali puge." Ata Ka Kamaringina ²⁷ Kolei Yesus takkiwe inna, wu lawai kadana ta tillu ata buta naka wula, "Kanyurugela tiyo kadadi begu Yau mono huhu kaha huhu bewu Yau." ²⁸ Ta nyiduwe, Yesus linage, "Maringi kana ata karangewe linai Allah mono ka dokuge." Tadakai Yunus ²⁹ Kole ata kama kahha kiki buta, Yesus linage, "Dalara radde yidakna dalara ka japata; yidda da karaiwe wu tadka, tabolo wale wu hing mana tada dummo kapaha tingoyi tabarada yidda dukka tadkai Yunus. ³⁰ Katauna Yunus ka dadi tadka tubada ata ninewe, tauda dummo nage Anana Kadadi ata enga dadi tadka tubada dalara radde ³¹ "Ta laddo dukkage, Ratu wali ta bannu enga kadde ole danga nadi ata wali ta dalara radde mono nyi enga hoku nadi yidda oro nyi ammini weali ta hupu tana kapiku rangewe tadanai Salomo, tabolo taha dau inne dani wu ata karehi madakka wali tai Salomo. ³² Ta laddo dukkage, ata ninewe enga kadde ole dangadi dalara radde mono hokudi, oro ata Ninewe jarra kolei Yunus bana hotbah ta aroda yidda, tabolo taha dau inne dadni wu ata karehi madaka ho wali tai Yunus." Mata Yikna Latti We Tauda ³³ "Wali wu hingmana ata kole bana harewo latti weyo inna taha dau kabunyi waleka ta kabu ana tanga. Ta nyiduwe, yidda da ijalawe latti weyo inna ta doka latti we dajalage ata katama kada etawe magakaha. ³⁴ Mata yidakna latti we taumi. Nyi matami bana dahhayi, tangage taumi enga bannuge magakaha. Ta nyiduwe, nyi matamu bana japatayi, tangage taumi enga banuge kapagtana. ³⁵ Oroge inna, hamataragela inna magakaha lari ta tumu ilna dadi kapagta dalige. ³⁶ Nyi taumu bana banu kage magakaha mono swale lakma wadeka kapagtana, taumu inna enga magakahage tangage katauna wuyo latti we kaha magakahami waige magakahge." Yesus Naha Apedi Ata Farisi Mono Ahli Taurat ³⁷ Kolei Yesus bana beyo hanewe, wu ata Farisi naka kamika-Ni yayo, Nyi dummo ammini, nyi na ngodo mono yayo. ³⁸ Ta nyiduwe, ata Farisi rada hangatara kole etayi Yesus aina baha ulluyi limma-Na bana yayo. ³⁹ Tabolo, Mori linage, tabarana, "Ata Farisi tujamu na murahawe ta bali haddu koba mono tabbo, tabolo lari ata taumu banuge dadara mono japata. ⁴⁰ Ta ata kabanga! Wale Nyi kakna karaige tabali haddu lohho tau jala nage tabara lari? ⁴¹ Oroge inna, bayila agayi kadana neda lari ba wuyi manutamu. Waige katauna, miyo enga murha takkami. ⁴² ta nyiduwe li lokomi miyo, ata Farisi! Oro, miyo um yimi maraka ta ngihi ha ullam romadawa, mono tangasi hatadomi ta omami, tabolo mi tau taipawe tijana mono manawarai Allah. Doku dage, miyo um rayi dahoge tangage hada inna wale tau taipak mawe hada wadeka. ⁴³ Li lokowe mi, ata Farisi oro miyo baige ngodo taha dau kadahha ta sinagoge mono dummo baige hibawe ha akana ta haragana. ⁴⁴ Li lokowe mi oro miyo tujai rate ai kadayo tadana, padekena ata waleda tada wai mage." ⁴⁵ Bege, wu ata wali ta ahli Taurat linage tabrai Yesus, Guru, kole Yau takkiwe hada inna, Yau dummo habawa nami." ⁴⁶ Tabolo, Yesus balehawe, "Li lokowe miyo, ta ahli-ahli Taurat! Oro, miyo um tauwe ngidimi ka bikta kapiku dita nage ata wadeka, tabolo tau daumu walena jojak mawe ngiddi inna langka gayu ka karaku limmamu. ⁴⁷ Li lokowe mi oro bamu rayina rate tutuda nabi-nabi paha mateda waikamu. ⁴⁸ Lohho, mi padedalage ta tangana ata inna mi bamu mangakuge harayida werda waikamu; yidaknala kaha mateyi nabi-nabi rada, tabolo mi karayidi rateda. ⁴⁹ Inna nyiwe oroge, Allah lari ta angta-na linage, 'Nauwa enga halewa gudi nab-nabi mono lede liyo tabarada yidda, tabolo kapirana ata paha lewaGu radda enga daha mateyi mono hama yillayi,' ⁵⁰ dajalage rada tangada nabi, kama joku wali panu tana ba rayige, dadiwe bada dauge wali ta dalara ata radde, ⁵¹ wali ta ranai Habel kahha ranai Zakharia, paha mate ta jonga natara mono Ummai Allah. Ngo, Nauwa luguge tabaramu rada dalara ata da taguge balehawr tabara hada inna. ⁵² Li lokowe miyo, ta ahli-ahli Taurat! Oro miyo um ngalabeyi kuhi angta, tabaolo mi dau walem auma tama mono mi um dabaokadi ata wadeka tama." ⁵³ Kolei Yesus tanage hadau inna, ahli-ahli Taurat mono ata Farisi halege dage muhhuni-Nyi mono nakkoni-Nyi waige tanga ngara kanukka. ⁵⁴ Yidda da haibbona yappayi Yesus waige hanewe patakki-Na.