Liyo Tutu Kadenai Yesus ¹ Talado kadihana minggu neda, Maria Magdalena kako ta ratenai Yesus kokokakki, abbu jewa puda kige, mono ba etayi watu hatoni waiyi rate bana gehara bena wali tarate inna. ² Nyiwe, nyi na malai mono dikini Simon Petrus mono ana hakodoNa wadeka loho hama nawaranai Yesus, mono linage tabarada yida, "Yida dangala beyi Mori wali ta rate, mono nami walema tadak mayi bagiyo dau ijala dani Nyi." ³ Nyiwe, Petrus mono ana hakodoNa nada kako ta rate. ⁴ Ka dudana malai kaha, tabolo ana hakodo wadeka rada rehi gehaho malai wali tai Petrus dajalage nyi na diki ullu ta rate. ⁵ Nyi naeloyi mono torro lari, mono kaba talujja ha wukha wai karogona Yesus nyi hewe kadana, tabolo nyi walena tamakma nedo lari. ⁶ Bege, Simon Petrus ammini, doku lirani nyi, mono tama lari tarate mono nyi naetawe kaba talujana hawuk hawai kadana neda bali. ⁷ Mono, kaba hatoni wai mata kaboroge kataknai Yesus la olek mage kaba talujana inna, tabolo na malunu heka bewe taha dau heka. ⁸ Bege, ana hakodo wadeka inna na, ka ullu diki tarate, tama dumo. Nyi naetawe mono naha tenawe. ⁹ Oro, aina dadi howe inna, yida wale da yapak mawe Jurata Biha, nadai Yesus bana kade hagga wali ta mate. (Yesus Naha Dedala Wikina Tabarai Maria Magdalena) ¹⁰ Nyiwe, kadudana ana hakodo rada haga dage taumma. ¹¹ Tanyidawe, Maria nadede tabali rate mono nahoyo. Hagapege hoyo, nyi naelowe neda lar ta rate inna, ¹² mono nyi na etayi duda malaikat kawaina kalbe kaka ngodo taha dau karogonai Yesus bad habaikayi. Nada wuyo na ngodo tabara katakna mono wuyo na ngodo tabara ta leduna. ¹³ Kadudana Malaikat rada dakanukayi Maria, "Lawaiyo, aha mami hom miyo?" Maria na balehayi malaikat nada, "Yida da ngala beyi karogonai Mori mono nauwa walegu tadak mayi yida bagiyo yida dau ijala daNi." ¹⁴ Bana be hanewe tauna ge, Maria na gilaka mono naetayi Yesus ded taha dau neda, tabolo walena tadak mayi ba nyiyo Yesus. ¹⁵ Yesus naka nukayi, "Lawaiyo, aha miyo mami hoyo? Iyayi hama yegami?" Oro bana hangadage nyi ka anguge hadau neda, Maria linage tabarana, "Marabba, Nyi marabba kaha dikini Nyi, takigage nauwabagiyo marabba dau tau muni Nyi, mono nauwa kagu ngala haggayi Nyi." ¹⁶ Yesus linage tabarana, "Maria."Maria dumo na gilaka mono linage tabaraNa lar tah newe Ibrani, "Rabuni, " ka ngihi dana "Guru". ¹⁷ Yesus linage tabarana, "Ilam naro ga Nauwa oro Nauwa waleg kakok mahowa ta AmaGu. Ta nyiduwe, kakomi ta ole baiGu mono tak dage yida, 'Nauwa enga kakoGu ta AmaGu mono Amami, tabara AllahGu mono Allahmi."' ¹⁸ Maria magdalena kako mono takkiwe ta ana hakodoNa, "Nauwag eta beyi Mori, "mono Yesus dauyo ka takkiwe tangage hada inna. Yesus Naha Dedala Wikina Ta Ana Hakodona ¹⁹ Kole lado neda bana gadige, lado kadihana ta miggu neda, mono binna hadau dadi ana hakodo makaha matoniyi oro yida bada madautadi ata Yahudi, Yesus amini mono na dede ta tiluna ta jongada yida loho linage, "Moli kama ringina tubami!" ²⁰ Bana be hanewe taunage, Yesus naha tingodi limana mono kalebokaNa tabarada yida. Tangada ana hakodo da lagahara kole yida bada etayi Mori. ²¹ Bege, Yesus linage ta barada yida wali, "Moli kama ringina tubami. Kataunai Ama bana halewawa nauwa, tauda jala nage batauge Nauwa ug halewami miyo." ²² Mono kole Nyi balinage, Yesus naha upuyo yida mono linage, "Kam hibayi Wadi Biha! ²³ Nyi mi bamu wal kanadi jalana wu ata, nyi jalana ata nada hawali nadi. Nyi ba daka ata jalana mi ai hawalimi, nyi jalada yida wale hawalik manadi." Yesus Naha Dela Wikina Tabarai Tomas ²⁴ Tomas, wuyi wali kabulu dudana ana hakodo, paha nagara leba Didimus, walda olek madi yida ba ammini Yesus. ²⁵ Nyiwe, anahakodo wadeka takki nage nyi."Nami ma etabeyi Mori." Tabolo, Tomas linage tabrada yida, "Duka dahege nauwa etawe oro pako ta limaNa mono hatamani karaku limagu neda lari ta oro paku inna, loho hatamani limagu lar taka lebokaNa, nauwa walegu hatenak mawe." ²⁶ Podo pata lado hege, ana hakodo da makaha haga ta uma inna, monoi Tomas da jalani. Loko bana maton duyi bina, Yesus amini ded tajongada yida, loho linage, "Moli kama ringina tubami!" ²⁷ Bege, Nyi linage tai Tomas, "Hajolange karaku limamu inne mono torro gadi limaGu;mono hajolani limamu inne moni tauyi taka lebo kaGu. Ilam ai hatenawe, tabolo hatenawe!" ²⁸ Tomas na balehai Yesus, "O, Mori mono AllahGu!" ²⁹ Yesus linage tabarana, "Apa yau batauge um hatenawe oro yau bamu etawa Nauwa? Maringkana yida ai kaetawa, tabola kaha tenaWa." Kappege Yohanes Tolhawe Jurata Inne ³⁰ Loho buta hoyi ada heka gaina wadeka harayinai Yesus ta aroda ana hakodoNa, ai kama tolha lar tajurata inne. ³¹ Ta nyiduwe, tanagadi rade ma tolhayi dajalage mi kam hatenayi nadai Yesus ba nyiyo Kristus, Ana Allah, mono dajalage hatenamu inna, kam kolege morha lar tangaraNa.