¹ Pilatus na ngalayi Yesus mono naha rehawe dajalage Yesus kapaluyi. ² Tangada Prajurit da mayanana wu kataupa manadana wali tatara mono da tau nage ta katakunai Yesus, mono da tauni kalabe madaka mal melo tabaraNa. ³ Yida da yanga dahe kayi Yesus mono lidage, "Maringna, ta Raja ata Yahudi!" Loho, yida da kapoka nage mataNa. ⁴ Pilatus hu wal nage mono linage tabarada yida, "Etayige! Nauwa enga hu ngidi guni Yesus tabarami dajalage mi kam tadawe nauwa ai gukoleni jalaNa aga hingkayi tabaraNa." ⁵ Loho, Yesus huna waige bana waina kataupa tara mono kalabe madaka mal melo. Pilatus linage tabarada yida, "Etayila Nyi!" ⁶ Kole Rato-rato kapala mono Perwira etayi Yesus, yida daka wula, "Kadailono Nyi, kadailoni Nyi!" Ta nyiduwe, Pilatus linage tabarada yida, "Ngidiyi Nyi mono kadailo dauni oro nauwa waleg kolek mani jalana aga hungkai tabaraNa." ⁷ Ata Yahudi rada balehayi Pilatus, "Nami da hukum ma, mono dokudi Hukum rada, Nyi na mate daho oro Nyi nahadadigre tauNa ba Ana Allahyi." ⁸ Kolei Pilatus rangewe hatak rada, nyi rehi madautana ⁹ mono na tama hagga ta uma dau tija, mono nakanuka tabarai Yesus, "Gi dau waliMu?" Tanyiduwe, Yesus walena balehakma. ¹⁰ Pilatus linage tabaraNa, "Yau walem au mawu hanewe dangaga?Apa Yau walem tadak mawe inna nauwa ba dayo kawahagu tut pahoilaWu mono bada kawaha tut kadailoGu?" ¹¹ Yesus balehawe, "Yau wale lakma kawaha ammu tuba tauGu, likege kawaha inna ba yiguge tabramu wali dete. Nyikwe oroge, ata Nyiwa Nauwa tabaramu rehina madaka hoge jalana." ¹² Kole ba rangeyi rada, Pilatus nakaruhuwe tut pahoilayi Yesus, tabolo ata Yauhudi da kawula, "Nyi yau bamu pahoilayi ata nade, yau wale ole atek managu Kaisar; tangana ata kataki dauwe tauna raja nyi gaba nani Kaisar." ¹³ Kolei Pilatus rangewe hanewena rada, nyi nangidiyi Yesus ta bali hadi, mono ngodo ta kursi matija, ta wuha dau ka ngarana Litostrotos, tabola lar taha newe Ibrani daha nagarage Gabata. ¹⁴ Lado inna lado haiyaka tut Paskah, mahigo inna na Jam anniyi. Pilatus linage tabara ata Yahudi, "Nadde Rajami!" ¹⁵ Nyiwe, yida da kawula, "Laini Nyi! Laini Nyi! kadiloni Nyi!" Pilatus linage tabarada yida, "Ug kadailo daho gimini Rajami?" Rato-rato kapala da baleha, "Nami lakma Raja hekama duka dahe Kaisar!" ¹⁶ Hadukagege, Pilatus nayiyi Yesus tabarada yida kapiku kadailoni. Yesus Kadailoni ¹⁷ Yesus huna waige dita dauyi kadailoNa aro taha dau ka nagarana"Hadau katakku", lar tahanewe Ibrani hatakda "Golgota". ¹⁸ Neda bali, yida dakadailo oleni Yesus duda ata wadeka, pakadailo takawanana mono ta kalina Yesus, nai Yesus ta tilnani. ¹⁹ Pilatus dumo tolhawe wu kamatolha mono na tauwe ta panu yayu ha dailo. Hatolha inna punyige, "YESUS ATA NAZARET, RAJA ATA YAHUDI." ²⁰ Buta ata Yahudi kabahawe hatolha inna oro hadau kadailoyi Yesus inna dage loho dagetawe harona, mono hatolha inna tolhawe lar taha newe Ibrani, Latin, mono Yunani. ²¹ Nyiwe, Rato-rato Kapala ata Yahudi dahanewe tai Pilatus, "Ilam tolhawe, 'Raja ata Yahudi, 'tabolo tolhadawe, Ata nade linage, 'NauwagNa Raja ata Yahudi."' ²² Bale hawe Pilatus, "Agawe hatolha begu, engage matolha kitage!" ²³ Tangada Prajurit, kole yida bada be hadailoni Yesus, da ngala dadi kalabeNa mono da baweyi dadi patayi, diha kajinaka tut diha-diha Prajurit, tauda jalage kalbe madakaNa;kalabe madakaNa inna wale lakma kattige, wali dete kaha bawa. ²⁴ Tangada Prajurit rada lida wikida, "Ilda hirawe, tanyiduwe kada tau mowala kada tadawe iyayi kakolege." Hada inna na dadiwe dajalage kana banuge kam tolha lar tajurata biha: "Yida daha bawe gage kalabeGu tajongada Yida mono kalbe madakaGu, yida datau mowala." Mazmur 22:18 Tauda dagege tangada Prajurit rayige tangage hada rada. ²⁵ Tamrahege inage, iyanai Yesus, angu winena iyai Yesus, Maria ole umma Klopas, mono Maria Magdalena, dede dahekayi kadailoNa. ²⁶ Kolei Yesus etayi inyaNa mono ana hakodo manawaraNa ded neda bali, Nyi linage tabra inyaNa, "Lawaiyo, etawela, nade ana muni!" ²⁷ Loho, Yesus linage tabara anaha kodo hama nawaraNa nada, "Nade inyamu!" Wali neda, ana hakodo nada hibayi inyanai Yesus engana ta umana. Matenai Yesus ²⁸ Kole inage, Yesus, katadawe ina tangage bana mahada bewe, tut banuge Jurata Biha, Nyi linage, "Nauwa ug mariwa!" ²⁹ Taha dau neda dani wu hajalu kabanuna we anggur Mayege. Oroge inage, yida dateskani wala ruta watu pa yaklabe lar ta we anggur mayege ta wu ta gayu takko mono hajola nani ta banai Yesus. ³⁰ Kole bana kabihkage we anggur mayege innage, Yesus linage, "Be kahawege." Bege, Nyi naha tadoluge katakNa mono na yiwe NgahuNa. ³¹ Oro lado inna lado hainyakawe, mono tangadi karogo rada walena engak madi tayayu hadailo talado ngahu, oro lado ngahu yikna lado madaka, ata Yahudi karaiwe tai Pilatus dajalage leduda ata hadailo rada ka kipudadi mono karogoda haburudi wali ta kadailo. ³² Loho, tangada Prajurit amidi mono kipu dadi leduda ata kadihana mono wadeka, paha dailo dangani Yesus. ³³ Tanyidawe, kole yida dikini Yesus mono etayi inna Nyi bana matebe, yida wale dakipuk manadi lduNa. ³⁴ Tabolo, wu Prajurit nada natoja kayi nabbu ta kalebokanai Yesus, mono neda mema, rana lalowe bana huge. ³⁵ Ata ka etewe inna kadadi nyiduwe kayiyo rehi hira inna, mono papahira natenawemono nyi tadawe inna nyi bana takki kawe katetakkana, dajalage mi dumo hatenawe. ³⁶ Oro, tangage kadadi kana banuge kama tolha lari ta Jurata Biha:"Wale gayukma riNa papata." ³⁷ Mono wali, lari taha hadu wadeka Jurata Biha naha newewe, "Yida enga toro dani Nyi hatoja beda." Yesus Da Tanini ³⁸ Kole babewe tangage innage, Yusuf wali ta Arimatea, mono kadadi anahakodo jalanai Yesus tabolo waige ai kadedo oro madautadi tabarada ata Yahudi, karaiwe tabarai Pilatus dajalage nyi dapahaini ngala nage karogonai Yesus;mono Pilatus napanu nage kabu atena. Yusuf wali ta Arimatea amini mono ngalawe karogonai Yesus. ³⁹ Nikodemus, ata kataboka uluyi Yesus bana gadige, ammi dumoni loho na ngidi paha kila welengha mur mono huka, ka lima kabulu kataiana biktana. ⁴⁰ Nyiwe, Yida dahaburuni karaogonai Yesus mono dawukhayi waini kaba taluja da taujalani kabau mumura, dokuge kakaldadi hatani ata Yahudi. ⁴¹ Tabrana hadau kadailoni Yesus, dage wu hadau mono ta hadu inna dage wu rate kaberu wale kal dak maho ata kamate patanikbe neda bali. ⁴² Oro lado neda nyi lado painyaka ata Yahudi, mono hadauge rate inna wale na marauk mawe, yida datanige karogonai Yesus neda bali.