Maria Nalewu Nadi Ledunai Yesus Ta Betania ¹ Ba anni lado hoge ai diki hoge lado rayage Paskah, Yesus kako ta Betania, hadu enganai Lazarus, pa hakade bena wali tamate. ² Needa bali, naha iyaka bewe pakula gak katenguna tutu Yesus; monoi Marta tamrana hanukuyi, tabolo lazarus nyi wu wali ta yida ka ngodo oleni Yesus ta meja. ³ Bege, Maria na ngalawe kabu gori legha Narwastu langna kahada bikta hina, loho nalewunadi ledunai Yesus mono na hopi wai nage wuna. Nyiwe, umma inna bau burata kahawe. ⁴ Tabolo Yudas Iskariot, wuyo wali ta ana hakodoNa, ka enga malajani Nyi, linage, ⁵ "Ahha lengha bau burata inna ai malajage dage kahina tallu ngahu dinar mono yidage tabarada ata milla?" ⁶ Nyi balinage katauna wale oro milla atek manage ta ata milla, tabolo oro nyi ba ata keduyi, mono oro nyi bana ngidiyi hadau amaha, nyi dadiwe bana ngalayi amaha paha tama lari ta patti. ⁷ loho, Yesus na baleha, "Yammani lawai nada, nyi narayige hainya nage tutu ba taniGa. ⁸ Oro, ata millada hangatani tabarami, tabolo Nauwa wale la hangattak maga tabarami." Tangada Rato Kapala Kabu Atege Hamateyi Lazarus ⁹ Kole ata Yahudi kiki buta karangewe nai Yesus ba dani ta Betania, yida kako dage neda bali, wale nyikel mawe oro Yesus, tabolo dumo yida kabu atege etayi lazarus ha kade bena wali Nyi wali ta ata mate. ¹⁰ Loho, Rato-rato kapala da woroge kapiku hamate dumo lazarus. ¹¹ Oro lazarus, buta ata Yahudi tanadi yida mono hatena tabarai Yesus. Yesus Tama Ta Harona Yerusalem Tujai Raja ¹² Damma hege tana, ata buta kadana ta rayi ulla inna, kole rangeyi nadai Yesus enga ammini ta Yerusalem, ¹³ yida da ngala ro karre mono kako huna tabo kayi Nyi mono halege dage kabura, "Hosanna! Hamaringiyi Nyi kamai lari tangaranai Mori, Raja Israel!" Mazmur 118:25-26 ¹⁴ Kole bada koleni wu keledai bodi, Yesus na ngodo tapanu kabedona, katauna kama tolha: ¹⁵ "Illam madautaka, ta bau wine Sion! Torroyi ge! Rajami ammini, ngodo ta wu keledai bodi." Zakaria 9:9 ¹⁶ Kapugena, ana hakodoNa wale da yappak mawe tangage kama hada inna, tabolo kole Yesus ba hama nadayi, yida murruge bada tadawe inna tangage kama tolhabe tutu Nyi, mono inna yida da rayi bege tangage inna tut Nyi. Ata Buta Dul Kawe Tutunai Yesus ¹⁷ Nyiwe, ata kamaranagani Yesus baNa kamai kani Lazarus huna wali tarate mono bana na hakdeyi nyi wali tamate engana takkiwe. ¹⁸ Oro ge inna, buta ata katabokayi Yesus oro yida bada rangewe ba Nyi karayige mujizat inna. ¹⁹ Nyiwe, ata Farisi da hanewe diha-diha, "Kam etawe, agawe haworoda wale nadadik mawe. Etawela, tangage panu tana da doku beni Nyi!" Yesus Na Takkiwe Tutu Morha Mono Mate ²⁰ Ta neda mema, da dumodi ata Yunani tajongada yida ka kako kangote dangani ta lado madakka inna. ²¹ Yida da tabo kayi Filipus, kawali ta Betsaida ta Galilea, mono lidage tabarana, "Marabba, nami makabu atege tabo kayi Yesus." ²² Filipus kako mono na tak nage Andreas; loho Andreas mono Filipus kako mono tak nagei Yesus. ²³ Yesus na balehayi yida, "Diki nage rahige tubana Ana na kadadi Ata ba hama nadai. ²⁴ Waige ka tau takkana, nauwag tak gimige tabarami, likege wiha pare monu ta tana mono mate, wiha pare nada engana ba wukuyi; tabolo nyi bana mateka, nyi dadi wuyo buta. ²⁵ Ata kama nawarage ngahuna, enga bungage ngahuna, tabolo ata ai kama nawarage ngahuna tapanu tana inne, enga karawa nage tutu morha ai kadukana. ²⁶ Nyi wu ata kaha nukuwa Nauwa, nyi na doku dahoga nauwa; ba giyo Nauwa dau daga, neda dumo kaha nuku gage ha ulaGu dau dadi; nyi wu ata hanukku kanaga Nauwa, Amagu enga ha aka nani bana mate." Yesus Naha Nawege Matena ²⁷ "Batauge, dewagu na boyata. Aga dahona hatakkiGu? 'Ama, hamane mara kiwa Nauwa inna batauge?' Enga yidawe, tutu innawe magu maiwa batauge inna. ²⁸ Ama, manadage ngaraMu!" Loho, rangewe li wali ta surga, "Nauwa ug hamanada beguge ngaraMu mono nauwa enga hamanadal guge." ²⁹ Ata buta kadede tah dau neda mono karangewe lida dage inna li kagurkawe, tbolo wadeka lidage, "Wu malaikat kaha newe tabaraNa!" ³⁰ Yesus na bale hawe mono linage, "li inna ba rangewe wale tutu maguGe, tabolo tutu mige. ³¹ Batauge yige rakage panu tana inna, batauge kadauge panu tana enga wugayi. ³² Mono, nyi nauwa baha madehtawa wali tapanu tana inne, Nauwa enga tingi kaha gudi ata tabaraGu." ³³ Yesus na takkiwe inne tutu hatingoge waige mate katujawe aga linawe bana mate. ³⁴ Ata buta rada da belehayi Nyi, "Nami ma range bewe wali ta ukku pareha Taurat nai Kristus enga enga hangatana; aga linak ka Yau balumuWu, 'Anana kadadi ata nada hama dehta hoyi?' Iya duyi Anana Kadadi Ata nada?" ³⁵ Yesus na balehayi yida, "Hodi mowege magakaha inna dage tabarami. Kakomi ba langa dahoge magakaha inna dajalage kapagta ilna kalubu gimi miyo; oro ata kaa kako lar ta pagtana walena tadak mawe nyi dau kakona. ³⁶ Inna mi bamu dau hoge magakaha, hatenawe inna magakaha dajalage mi dadi ana magakaham." Be bana takkiwe katauda na, Yesus kako nage mono kabunyi nage tauna wali ta yida. Kapirana Ata Yahudi Wale Hatenakma Tabarai Yesus ³⁷ Lokoi Yesus bana rayi bedudi buta tada heka gaina ta aroda yida, yida engage aida hatena tabaraNa, ³⁸ dajalage kana banuge hanewe paha dikinai Nabi Yesaya, "Mori, iya duyi kaha tenawe hatalarama nami? Mono, tabara iyakna limanai Mori bana dedoni?" Yesaya 53:1 ³⁹ Nyikwe oroge, wale nadadiwe bada hatena oroi Yesaya lina dumoge, ⁴⁰ "Nyi naha moro bedadi matada yida maono hatube dadi ateda yida, dajalage yida illna eta waidi matada yida mono yapa waige ateda yida, loho da kabali dajalage Nauwa ug hatagahayi yida."Yesaya 6 :10 ⁴¹ Yesaya na takka kahawe inna oro nyi na eta bewe manadai Yesus mono nyi naha newe be tubana Nyi. ⁴² Lpkp Batau dakge, buta dumo rada rato kaha hetena tabarai Yesus, tabolo oro madautada tabara ata Farisi, yida wale tak pahirak mage oro madauta enga hikaladi wali ta Sinagoge. ⁴³ Oro, yida rehi naha bai dahoge hibawe manada wali kadadi ata wali ta manadai Allah. Ha Akkai Yesus Enga Hokudi Kadadi Ata ⁴⁴ Bege, Yesus na kawula, linaGe, "Tangana ata kaha tena tabaraGu, ai kaha tena tabaraGu, tabolo tabarana Nyi kaha lewawa Nauwa. ⁴⁵ Mono, tangana ata ka eta bewa Nauwa, na eta beyi Nyi kaha lewawa Nauwa. ⁴⁶ Nauwag mai bewa ba magakaha panu tana wa, dajalage tangana ata kaha tena TabaraGu ilna engana lar tapag tana. ⁴⁷ Nyi wu ata bana tangewe hatak kiGu, tabolo nyi aina doku kage, Nauwa waleGu hokuk mani nyi; oro Nauwag maiwa wale tutu hokuk maguge panu tana, tabolo tutu pa mane mara guge panu tana. ⁴⁸ Iya katularaga Nauwa mono aina hiba gage hatak kiGu, yiwe li hatak kiGu enga hoku nani nyi taha dukkage. ⁴⁹ Oro Nauwa walegu hanewek mawa dokuge hakabu ateGu, tabolo Amagu kaha lewawa Nauwana yigaGe pareha ba gi dahoge hatak kigu mono Nauwa haloluGu. ⁵⁰ Mono, ug tadawe inna pareha Na yikwe morha aika dukana. Oroge inna, nauwa paha dikiGu, Nauwag hadikige tujawe hatak nai Ama tabaraGu