¹ Aring yel du hari Sabath, teliang Maria Magdalena, Maria Yakobus Owo, med Salome, nami na maneme we ang duru we yuulung puin yang med Yesus taahele. ² Mong palii madala hair ominumi, wed poo arahama yuulungnu hoo eng dalita. ³ Yuulungnun miyata, "Anu nu yo pa, wui ba engdeli o yaara midu u ebeng?" ⁴ Bo, mong yuulungnun dunu midi he, wui namati du nami ebeng ang. ⁵ Ohowe, yuulungnun engdeliomlawa, yuulungnun dunu he ei loti nu, wenewele puin wa tenilolo dopo mi mihe. We yuulungnunmi yaudu. ⁶ Duru we, ei yuulungnun aramating, "Haai boroit banebeng ei, i Yesus Nazareth hini onami ba tiarapa tahili duru i lap. Ei yatele tohoang, Ei oindo mi dang, leng ba nami mi Atarang du i edunu. ⁷ Ba, i boro yang skol Eikenewe med Petrus aramating, wedee Ei mi yoturu moin Galilea leangang. Moin dopo mi ohowe ipa ahol wedee aring na du Ya ubangang. ⁸ Mong duru he yuulungnun loling lehele. Ohowe, teeng leng du elete, wedee yuulungnun tabibing baroit du eile. ( Naana-ana ba nani yuulungnun ahowo. Petrus med Oteneng elnun aramating du, yuulungo toong o kurung we ubang. Duuin yang we Yesus yo yuulungnun ahowo lami wed poo mi yang wed muyu mi , duuin e mating Paa Madulung med weseng eme ba iling yaha du ubang u mating, Amin). Yesus Yo Skol Eikenewe A long Yaring U tubu ⁹ Aring Minggu om dumi , lalalami, hair o minumi, Yesus yateletoho du, Ei miaayanta yang Maria Magdalena ba Yesus Ei homi yaha piruito a lolohele du along yaring u tubu. ¹⁰ Duuin ang lawe, Ei yang moin nami ba Yesus arahama-hama turu mi, bo yuulungnun didi med dumidu ara susukarang ahain awee ommi du aramating. ¹¹ Du arahama, ya ubang yuulungnun me ehe, Yesus yo weseng ang duuin didi, ya yang puin edunu ahol noang. Bo nami oatinoo ubang dang. ¹² Mong aring na du noo Yesus, Ei woil yanoo beng nu, puin ma nami pirolo ba lami moin bang leang arahama. ¹³ Ang lawe, yuulungnun yaboro oteneng elbeng nun du aramating, yobo teneng elbeng oin didi, yuulungnun o atinoo ubang dang. Yesus Yo Skol Eikenewe Towong Aramating Mong noohe, Ei yo bobomo hoo Yo skol eikenewe piri airnu welingnu du along. Yuulungnun didi mihi naadi he, Ei yuulungnun aramating, anoo uma. Wedee o atinoo ubang ang med om paluhu du ei, wedee Yesus moin yateletoho, ohowe nami ba ahol noang didi yuulungnun o atinoo ubang dang. ¹⁵ Duuin yang we, Ei yuulungnun aramating, " I lami yang paliimati oin do alolo- alolo Injil du umating, med nami noo towong du arahama. ¹⁶ Ann naminuyo o atinoo ubang ang ohowe nami Babtis ang, weseng eme du ya med yei anoo, yo bo anu naminuyo o atinoo du ubang dang, duuin he hukung salang duru yamed. ¹⁷ Med o utubu nun didi ara nami ba o atinoo ubang du arahama. Na ning du eile, nami puin hooniyaha nun du alolo nami mating bebeng didi ubang. ¹⁸ Nami pa yatang puin mon diapuin, duuin di nami pa dawang yaha di naa, bo yuulungnun a mini tabang dang, Yuulungnun yatang med nami modi tameng, aring nami du tabiring haruu." Yesus Latele Sorga Leyang ¹⁹ Mong Tuhan Yesus yuulungnun aramating, O o homi, Ei latele Surga leyang, Lahatala atang teni mimihi. ²⁰ Duru we, yuulungnun yang bang palii aring ana, aring nanun du u tutung u mating wedee Tuhan didi hama-hama kreyeng Ampaa du eile anoo du mi tutung kuwaa ei med Ei utubu du ommi.