¹ Yuulung lami hoo Yerusalem along mi, yuulung yo air leng ba mi air du ening Betfage woil med Betania, i oin Zaitun binita, Noang we Yesus ei yoskol eikenewe du ei piri olo ei ahowo. ² Noang we Yesus ei yuulung ara mating, i ang moin Dese nu ba ara topong adang mi du honoong i lamidi, wedee ara leng dumidu , Keledai bololo nudu lepese ara dopomi namiden dei tamihi dei, Keledai du i o aweteng noohi i witihoo. ³ Mi yebeng namiden u i atana, " Toroein we i na oindu panene dooin?" Aramating, Lahatala ei keledai oindu Ei dei ubang tamihi, noohi luwungdang hi nu taho wo holong ara leng domi ang." ⁴ Ohowe, nami yang hi keledai balolo du lepese ara bang yeara mi, yeabulu along mi ohowe nami o aweteng. ⁵ Nami Lobongnu du ara dumi toho hedu, nami yuulung atana, " Naba we i panene we keledai du i aweteng? ⁶ Yuulung amating aboro du mongwe dee Yesus yuulung aramating duuin, Ohowe nami Lobongnu ba wedee du nami yuulung aboro yang. ⁷ Noohi nami keledai du med ara yang Yesus ene, noohi nami yo kondohing keledai amoto topepe noanglailwe Yesus ei keledai du tamihi. ⁸ Duuin didi naminoo towong ara dumidu yuulung yo kondohing noohi med ye abulu mipepe denhiatang lewhoro noohi med ye abulu mimeng. ⁹ Nami noo towong ba opong turu du woilmed beng ba ara ataai du, hama-hama ubang, " Hosana! Eioindu hoomadu Lahatala Eningpuin duuin we berkat illoling ma aramaha. Mazmur 118: 25-26. ¹⁰ Daud ba pi bapak pi belidu O awenbang du ho ang duuin we berkat illoling aramaha! Hosana! aratoin lengwen mi. ¹¹ Noo ohowe Yesus Ei Yerusalem lamidi noohi Ei yang Lahatala Obang Madulung layang. Ei lelengairnu ara obong along midu edunu, noohi Ei woilmed oskol eikenewe airnu welingolo yuulung hama-hama Betania layang wedee yel du luwung ang. Yesus Ei O'ong Ara Sumpu Beye ¹² Midi lelehi yuulung Betania bangdu atain. tanutnu Yesus omo latele mongwedee omhili. ¹³ Ei yang atele dunuhi O'oang yeledunu obehi loong empiri, duru we Ei yang edunu, haaiwe nadene tidu omi Ei ahol Ei yang tidu along mihi nadene ara tidu midang tidu behe momong. Wedee aring toping dumidu tidu hili oyel midei. ¹⁴ Duru Eiwele Yesus Ei tidu aramating," Nami dene woil opiri opaa du woil edi dang yong yu e i eme, mating paa du." Skol eikenewe didi tamahe. Yesus Ei Lahatala Obang Madulung Layang ¹⁵ Noohi yuulung yang Yerusalem mi ohowe Ei Lahatala O'bong lamidi, noohi Ei nami towong ba ara dumi dang wali hedu Ei alolo, Ei mejaba ta seng uteleng, woilmed nami ba Ueilow wel hedu odee ba tanoowail duEi iri abeeng atepeng. ¹⁶ Ohowe Ei nami ehapa, duuin eyuulung haai woil dumi nawel nawail ei, noohi woil tawewe Lahatala Obang Madulung du along mi lami ei. ¹⁷ Noanglailwe Yesus Ei yuulung ara skolubang doui, " Hulu lalang yo, Nobang du ening sembayang leng, bang airnu ei?" Bo weddomi i omoo yaha panene oleng. ¹⁸ A ringdu arahama Yesus Ei mating ubang, Imam Kepala, Ahli Taurat ara lengdumi yuulung mehe du eile yuulung yelap anootoro oin panene we duuin e uil- uil Yesus du aminiwe. Bo yuulung Yesus ubros wedee naminoo towong du nami Yesus Omating paa du yuulung uyahoir oyaha. ¹⁹ No ang pali de parang duru eile Yesus med oskol eikenewe ara yuulung leng du atain. O'atinoodu U ei Anoo Ara Lahatala Ommi ²⁰ Lalami yuulung lami leng du mieli, yuulungnun hi O'ong umini yang O'ali ing mimeng. ²¹ Petrus tonut teeng duruwe ei Yesus aramating, "Tunggur, e dunu! O'ongba Ara supu du eita' ata ang!" ²² Yesus Ei yuulung ei aboro O'atinoodu med u li anoo ara Lahatala Ommi. ²³ Na oabulu-abulu Na u i aramating, ara naminu ubang binilawen arahama, a latele noohi a aring wew poin tang om layang noohi Om tutulu du ara ommi ei, bo O'atinoo duru we puin wedee naba o' na we Ei ubang du uil-uil miana duuin hi uil ei miana ma arahama dumi. ²⁴ Duuin we Na aramating, naba we i u sembayang noohi i u nabang O'atinoodu puin wedee i med u i yeyanoo ang, duui hi nadu uil-uil med ene. ²⁵ Noohi atoho Sembayangdu a aring utanut du omating paa yaha dene a ubang med otenengel dene arahama mi ang yo eduuinhi ohala du among u paabala, duuin we i ming Lahatala aratain Surga midu Ei woil oyaha-oahala du Ei woil upaabala. ²⁶ Bo ohala du mi iring upaabala dang, duuin hi i ming ba ara toin Surga midu Ei woil iring upaabala dang. Yahudi O'mangsing Nami Yesus O'kawasa Utain ²⁷ Yuulung woil hoo Yerusalem mi, Yesus Ei midi Lahatala Obang Madulung Omlamidi lami yang lami hoo hi Imam-imam Kepala woil med Ahli-ahli Taurat, duuin didi Yahudi Otamaa bala Hoo alangmi. ²⁸ Ohowe yuulung aramating, " Anaba kuasa we puin lelengairnu oindo Aaraleleng yo, me ana yo kawasa oindo med enewe, Apuin barapi oindu Aaraleleng?" ²⁹ Yesus Ei yuulung aramating, Natain paanu oindu Na utana i u aboro mednene duuin angwe naba kawasawe Napuin du Na u i aramating? ³⁰ Babtisan Yohanisdu Sorga we mi hoo me, naminoo we mihoo? I u aboro med nene!" ³¹ Yuulung yara kahain yara talolo wanu arahama manu arahama. Noo ohowe yuulung mating, piubang Ei sorga mihoo, duuinhi Eiubang, edihi mitorooinwe i o atinoo ubang dang?" ³² Dee piwoil ubang, 'naminoo'?" Bo yuulungnun du bros empiri wedee naminoo towong du nami ubang Yohanis du atinoo Nabi. ³³ Noanglailwe yuulung Yesus eiaboro, "niaholdang yo" ohowe Yesus i yuulung aramating, " Mong wedee Naring duuin, Naring didi woil i yene mehedang kawasa nabawe Napuin lelengairnu du araleleng."