¹ Catatkan lah ka malaikat jamaat di Efesus : Inilah parkatoan Dio nang mamegang tujuh bintang di tangan kanan-Nyo dan nang bajalan di antaro tujuh kaki lampu omas. ² Taunyo Aku samuo pakorjoan kau dan jorih lolah kau, dan katokunan kau, macam mano kau tak tahan samo nang jahat tu, dan kau manguji orang-orang nang manyobut dirinyo Rosul, tapi sabotulnyo orang tuh bukanlah rosul, dan tarnyato orang tu palsu. ³ Kau mampunyoi katokunan dan batahan domi namo-Ku nang tak mangonal lolah. ⁴ Tapi aku ondak manogur kau jang, karono kau sudah kahilangan kasih kau nang samulo tu. ⁵ Sobab tu, kau ingatlah dari mano kau jatuh dan batobat, lalu buat apo nang sudah kau karojokan dari awal. Kalo tidak, Ku ambil karang kaki lampu kau dari tompatnyo, kaculai ko batobat. ⁶ Tapi inilah nang kau punyo : kau mambonci para pangikut Nikolaus, nang juga Ku bonci. ⁷ Dio nang punyo kuping baklah mandongar apo nang dicakapkan Roh ka jamaat-jamaat. Ka dio nang monang, Ku kasih makan dio dari pokok Kahidupan nang ado ditaman Allah. ⁸ "Dicatatkan malaikat jamaat di Smirna lah bagini : Inilah cakap-Ku dari nang Awal dan nang Akhir, nang sudah mati dan hidup kambali.: ⁹ Taunyo Aku kasulitan kau dan kamiskinan kau, tapi sabotulnyo kau kayo, Taunyo Aku fitnah nang sidampekkan ka kau samo orang tuh nang mambilang dirinyo orang Yahudi, tapi sabotulnyo tidak, malainkan Sinagoge iblis ¹⁰ Usah ko takut samo apo nang akan kau alami karang, Tengoklah, setan ondak mancampakkan babarapa dari kau ka panjaro, supayo kau di cobai, dan kau akan marasokan siksaan salama 10 hari, satiolah sampe ko mati, dan Aku akan mangkasih kau mahkota kahidupan. ¹¹ Dio nang punyo kuping bak lah mandongar apo nang dicakapkan Roh ka jamaah-jamaah, orang nang monang tak akan sangsaro samo kamatian nang kaduo." ¹² Catatkanlah ka malaikat jamaah di Pergamus : Inilah cakap Dio nang mamiliki podang tajam bamato duo tu, ¹³ Aku tau dimano kau tinggal, ditompat takhta iblis barado, tapi ko bapegang samo namo-Ku dan tak manyanggah iman-Ku waktu zaman Antipas, saksi-Ku nang satio nang dibunuh diantaro kau, tompat iblis tinggal. ¹⁴ Tapi Aku manogur kau karono ado babarapa diantaro nang mangikuti ajaran Bileam, nang mangajar Balak ondak mambikin sandungan di muko budak-budak Israel, buek makan-makanan nang diparsombahkan ka barhala dan mambuek doso-doso seksual. ¹⁵ Bagitu jugo ado babarapa diantaro kau nang bapegang samo ajaran Nikolaus. ¹⁶ Karono tuh, batobatlah! kolok tidak, Aku sacopatnyo datang ka kau dan mamorangi orang tuh pake podang dari mulut-Ku. ¹⁷ Dio nang punyo kuping, bak lah mandongar apo nang dicakapkan Roh ka jamaah-jamaah, ka dio nang monang, kan Aku kasih Manna nang tarondok dan kan Aku kasih jugo ka dio sabijik batu putih dan sabijik namo baru di batu tu, nang tak saorang pun nang tau, kacuali orang nang mandapatnyo. ¹⁸ Catatkanlah ka malaikat jamaah di Tiatira: Inilah cakap Anak Allah nang mato-Nyo macam nyalo Api dan kai-Nyo manyala macam tambaga di api pambakaran. ¹⁹ Taunyo Aku parangai-parangai kau, kasih dan iman kau, palayanan kau dan kasabaran kau dan karojoan kau nang tarakhir malewati nang partamo. ²⁰ Jadi, Aku manogur kau, karono kau mambiarkan parampuan Izebel tu, nang mangaku macam saorang nabiah, mangajar dan manyosatkan pambantu-pambantu-Ku, bak supayo bazinah orang tu, dan makan-makanan nang sudah di sorahkan ka barhala. ²¹ Aku sudah mangkasih waktu bak supayo barobah, tapi dio tak ondak batobat dari zinanyo ²² Tengoklah, Aku mancampakkan dio ka atas tompat tidur kasusahan dan orang tu nang bazinah, dengan dio akan Ku campakkan ka dalam kasulitan nang bosar, kacuali orang tu batobat dari parangai parampuan tu. ²³ Kan Aku bunuh budak-budak nyo dengan kamatian, dan saluruh jamaah tau, Akulah nang manguji pikiran dan hati orang tu, dan Aku mangkasih ka kau masing-masing sasuei parangaimu. ²⁴ Tapi, ka kamu nang laen di Tiatira, nang tak mangikuti ajaran ni, nang bolum tau rahasio-rahasio iblis, Aku bilangkan lah ni ka kau, "Tak kan Ku lotakkan boban nang laen ka atas kau". ²⁵ Tapi kan!, bapeganglah torus samo apo nang sudah kau punyo sampe Aku datang. ²⁶ Dan ka orang nang monang, dan mambuek parangai-parangai-Ku sampe akhir, Aku akan mangkasih kuaso atas bangso-bangso. ²⁷ Orang tuh akan mangatur bangso-bangso tu pake tongkat bosi, dimusnahkan bakoping-koping macam tambilar tukang pariuk, karono Aku jugo sudah mandapat kuaso dari Ayah-Ku. ²⁸ Dan Aku jugo mangkasih samonyo bintang timur. ²⁹ Dio nang punyo kuping bak lah mandongar apo nang dikatakan Roh ka jamaah-jamaah.