¹ Sudah tu, awak manengok Anak Domba togak di Bukit Sion, dan basamo-Nyo ado 144 ribu orang, nang punyo namo AYAH-Nyo pada koning orang tu. ² Awak mandongar suaro dari surgosamo macam suaro galombang aer nang bosar tu jugo macam bunyik guntur nang koras, tapi suaro nang awak dongar tu kek macam bunyik para pamaen kacapi nang mamaenkan kacapi orang tu. ³ Orang tu manyanyikn suatu nyanyaian baru didopan takhta da didopan kaompat makhluk dan nang tuo-tuo tu, dan tak ado saorang pun nang biso mampalajari nyanyian tu salain nang saratus ompat puluh ompat ribu orang nan udah ditobus dari bumi. ⁴ Orang tu adolah orang-orang nang tidak mancomarkan dirinyo samo prompuan-parompuan, karono orang tu suci kek parawan. Mereka tu adalah orang-orang nang mabgikuti Anak Domba tu kemano sajo Dio pogi. Orang tu ditobus sebage korban-korban sulung buek Allah jugo buek Anak Domba tu. ⁵ Tak ado bongak di dalam mulut orang tu; orang tu tak ado salah. ⁶ Awak manengok malaikat laen tarobang di tongah-tongh langit tu,mambawak Injil kokal buek dibaritokan samo orang tu nang tinggal di bumi dan kapado samuo bangso, suku, bahaso dan kaum ⁷ dan dio bacakapdongan suaro nang koras, "Takutlah samo Alah dan kasikanlah kamulioan-Nyo karono waktu panghakiman-Nyo udah tibo; sombahlah Dio nang manjadikan langit, bumi, laut samuo mato aer." ⁸ Lantas, malaikat nang laen, nang kadup, manyusul dan bacakap, "Roboh, sydah roboh Babel nang bosar tu karono dio sudah mambikin samuo bangso maminum anggur nafsu seksualnyo nang bojat tu." ⁹ Lopas t, malaikat nang laen, nang katigo, manyusul kaduo malaikat sabolumnyo dan bacakap dongan suaro koras, "Bilo siapo sajo manyombah binatang tu dan patungnyo, dan manarimo satu tando pado koning ato tangannyo, ¹⁰ orang tu akan minum anggur murka Allah, nang dituangkkan dongan kakuatan ponuh ka dalam cawan murka-Nyo,dan dio akan disiksa dongan api dan balerang di hadapan malaikat-malaikat nang suci dan dihadapan Anak Domba. ¹¹ Dan, asap siksaan orang tu naek salamo-lamonyo. Orang tu tak punyo waktu buek istirahat, baek siang ato malam, yaitu orang-orang nang manyombah binatang samo patungnyo tu, dan barangsiapo nang udah manarimo tando namonyo. ¹² Inilah katokunan orang-orang suci nang mamaliharo parintah Allah jugo iman orang tu di dalam Yesus. ¹³ Lantas awak mandongar suaro dari surgo bacakap, "Tuliskanlah ini: Mulai saat ni, diborkatilah orang nang mati di dalam Tuhan." Roh bacakap, "Botul, bak orang tu biso barehat dari jorih lolah orang tu karono parbuatan-parbuatan orang tu mangikuti orang tu." ¹⁴ Lantas, Awak manengok satu suatu awan putih dan ado nang duduk di atas awan tu saorang nang samo macam Anak Manusio, mamakek mahkota omas di kapalo-Nyo dan sabit nang tajam di tangan-Nyo. ¹⁵ Lantas, malaekat nang laen kaluar dari Bait Allah, dan batariak dongan suaro koras kapado Dio nang duduk di atas awan, "Ayunkanlah sabitMu dan panenlah krono saat buek mamanen udah tibo dan panenan di bumi udah matang." ¹⁶ "Mako,Dio nang di atas awan mngayunkan sabit-Nyo ka atas bumi, dan bumi pun di panen. ¹⁷ Habis tu, malaekat nang laen kaluar dari Bait Allah nang ado di surgo, dan dio jugo punyo sabit nang tajam. ¹⁸ Lalu, malaekat laennyo lagi, nang bakuaso atas api, kaluar dari altar. Batariak dio dongan suaro koras kepado malaekat nang mamogang sabit tajam tu, "Ayunkan sabit kau nang tajam tu dan kumpulkanlah garontolan buah anggur dari pokok anggur di bumi. ¹⁹ Lantas, malaekat tu mangayunkan sabitnyo ka bumi dan mangumpulkan garontolan buah anggur dari pokok anggur di bumi dan mancampakkannyo ka dalam batu kilangan bosar murko Allah. ²⁰ Pamorasan buah anggur tu dikorjokan diluar kato, dan darahpun mangalir dari pamorasan anggur tu kiro-kiro satinggi kakang kudo dan sapanjang saribu onam ratus satadia.