¹ Hari tu, ado orang bakumpul, tak ado apo-apo ondak di makan, dipanggil Yesus lah murid-murid-NYO dan dibilangkannyo samo orang tu, ² "AKU kasihan samo orang rame tu, lantaran sakarang dah tigo hari lamonyo orang tu samoKU, dan tak ado ondak di makan. ³ Kok KU suruh orang tu pulang karumahnyo, porut orang tu kan lapar, nanti orang tu pangsan pulak lah di jalan, sobab jauh tompat tinggal orang tu." ⁴ Habis tu murid-murid-NYO manjawab Yesus, "Dimano pulak ado di tompat nang sopi ni ado orang mangonyangkan porut dongan kue?". ⁵ Habis tu, batanyo pulak lah Yesus samo orang tu, "Barapo banyak kue nang kamu punyo?" orang tu pun manjawab, "Tujuh kue." ⁶ Sasudah tu di suruh Yesus lah orang tu duduk di tanah, abis tu di ambek Yesus lah tujuh bijik kue, dan mangucap syukur, abis tu di pocah-pocahkan-Nyo lah kue tu dan dibagikan-Nyo samo murid-murid-Nyo bak di siapkan samo orang rame. Orang tu pun manyiapkan samo orang rame. ⁷ Murid-murid-Nyo tu pun ado jugo punyo ikan nang kocik. Sasudah mangucap syukur, Yesus manyuruh murid-Nyo mambagi jugo ikan nang kocik tadi tu samo orang rame. ⁸ Biar dimakan sampek konyang, habis orang tu makan dikumpulkannyo lah pulak sisa-sisa bokas makan tadi tu ka dalam tujuh bijik karanjang ponuh. ⁹ Ado kiro-kiro ompat ribu orang nang makan tadi. barulah di suruh Yesus orang tu pogi. ¹⁰ Habis tu masuk Yesus kadalam sampan samo murid-murid-Nyo sampek lah Yesus samo murid-Nyo ka kampung nang banamo Dalmanuta. ¹¹ Habis tu, orang-orang Farisi datang dan ondak batongkar samo Yesus, ondak mamintak Yesus manengokkan tando dari surgo, nang ondak marecok-recoki DIO. ¹² Abis tu Yesus manarek napas panjang dalam Roh-Nyo, sambil bacakap, "Kenapo panorus ni mancari tando? AKU mambilangkan nang sabotulnyo samo kau, tak ado satupun tando nang ondak dibagi kan samo panorus ni." ¹³ Abis tu, ditinggalkan Yesus lah orang tu, masuk lah DIO balek ka sampan, dan pogi ka saborang. ¹⁴ Murid-murid-Nyo tak ingat mambawak kue, abis tu cumo ado sapotong kue nang ado di dalam sampan tu. ¹⁵ Abis tu Yesus baposan samo orang tu, "Basiap-siaplah! Bahati-hatilah samo ragi orang Farisi jugo ragi orang Herodes." ¹⁶ Abis tu bapokat lah orang tu tontang orang tu tak ado mambawak roti. ¹⁷ Sudah tu, pas Yesus tau tontang hal ni, Yesus bacakap samo orang tu, "Kenapo kamu mancaritokan kamu nang tak punyo roti? Apo kau bolum paham jugo? apo memang nang korasnyo hati kau? ¹⁸ Adonyo mato kau, tapi tak biso manengok? Habis tu adonyo kuping kau tapi tak mandongar? nang luponyo kau? ¹⁹ Habis KU bagi-bagi kan kue tu, limo biji untuk limo ribu orang. Barapo karanjang nang tarisi ponuh nang kau kumpulkan dengan pocahan-pocahan makan tu.? ²⁰ "Abis tu, waktu tujuh kue samo ompat ribu orang tu, barapo karanjanglah nang sudoh ponuh dengan bolahan-bolahan kue nang kau satukan? Diajawab orang tu lah, "Tujuh karanjang" ²¹ Abis tu, bacakaplah DIO samo orang-orang tu, sudah mangortinyo kau? ²² Abis tu, Yesus dan murid-murid-Nyo tibolah ka Betsaida. Abis tu, ado orang mambawak samo Yesus orang nang tak dapat manengok dan maminta tolong samo Yesus supayo manjamahnyo. ²³ Akhirnyo dipegang Yesus lah tangan orang nang tak manengok tadi tu, abis tu dibawaknyo lah ka luar desa. Abis tu diludahi Yesus tangan-Nyo di lotakkan-Nyo di mato orang nang buto tadi tu, abis tu di lotakkan-Nyo jugo tangan-Nyo diatasnyo. Di tanyo Yesus lah samo orang buto tu, "Ado kau tengok sasuatu?". ²⁴ Abis tu , orang buto tu manengok ka atas dan dibilangnyo, "Ku tengok orang, tapi samuo ku tengok nang miripan samo pohon-pohon nang lagi bajalan." ²⁵ Abis tu, di lotakkan Yesus pulak lah tangan-Nyo di atas mato orang tu balek, abis tu dibukaknyo lah mato orang tu lagi, sombuh lah mato nyo, habis tu jolas lah dio manengok. ²⁶ Abis tu, di suruh Yesus lah orang tu pulang ka rumahnyo balik dan dibilangnyo, "Jangan lagi masuk kau ka kampung tu." ²⁷ Abis tu, Yesus pun pogi, samo murid-murid-Nyo, ka desa di Kaisarea Filipi, di tongah jalan Yesus batanyo samo murid-murid-Nyo, dan dibilang-Nyo samo orang tu, "Siapolah Aku ni?" ²⁸ Di jawab orang tu, 'Yohanes Pambabtis, ado nang mambilang Elia dan nang lainnyo mambilang salah satu nabi-nabi." ²⁹ Abis tu, Yesus batanyo samo orang tu, "Kalo manurut kau siapo aku?! Datanglah si Petrus manjawab-Nyo, "Kaulah Kristus." ³⁰ Abis tu, Yesus malarang orang-orang tu bak tidak mangasih tau samo siapo-siapo manggonai Dio. ³¹ Lalu, Yesus muloi lah mangajar murid-murid-Nyo bahwasonyo Budak Manusio harus banyak mandarita nang mano di usir oleh nang tuo-tuo Yahudi, imam-imam kapalo, jugo ahli-ahli Taurat, dibunuh, habis tu tigo hari barikut nyo togak balek. ³² Abis tu bacarito lah Yesus sacaro torang-torangan, lantas tu, di tarek si Petrus lah Yesus kasamping-Nyo dan manogur-Nyo. ³³ Namun, sakali-sakali di tengok Yesus murid-murid-Nyo, di togur Yesus si Petrus dan Yesus bacakap, "Pogilah kau dari-Ku, woi iblis! sobab tak kau pikirkan jang pakaro-pakaro Allah, tapi pakaro-pakaro manusio," ³⁴ Abis tu, dipanggil Yesus lah orang rame, samo murid-murid-Nyo, udah tu dibilang-Nyo samo orang tu, "Jiko ado orang ondak ikut samo-Ku, dio harus manyangkal dirinyo sandiri, habis tu mamikul salibnyo, habis tu mangikut Aku. ³⁵ Sobab, antah siapo sajo nang ondak manyalamatkan nyawanyo pasti kahilangan dio. Tapi siapo sajo nang hilang nyawanyo untuk Aku pasti Injil manyalamatkan-Nyo. ³⁶ Tapi apolah untungnyo kalo kito mandapatkan samuo dunio ini, kok nyawanyo pun lonyap? ³⁷ Apokah nang bisa dibagi orang samo kito untuk manobus nyawanyo?. ³⁸ Jadi, siapo pun nang malu korno firman-Ku dan Aku, nang tak satio dan badoso ni, bagitu jugo lah karang Budak Manusio jadi malu mangakui orang tu, pas Dio datang dalam kamuliaan Ayah-Nyo basamo-samo jugo dongan malaikat-malaikat-Nyo nang suci."