(Yesus adolah Tuhan Atas Hari Sabat) ¹ Pas waktu tu, Yesus bajalan malewati ladang gandung pas hari Sabat, dan murid-murid-Nyo lapar, dan orang tu mulei mamotik bulir-bulir gandum dan mamakannyo. ² Akan tatapi, pas orang-orang Farisi manengoknyo, orang tu bacakap samo Dio, Tengoklah, murid-murid-Mu itu malakukan apo nan tak botul pas hari sabat,." ³ Namun Yesus bacakap samo orang Farisi tu, "Nan bolum paronah nyo kamu mabaco apo nan dilakukan Daud pas dio dan paro pangikutnyo kalaparan? ⁴ Kek mano dio masuk kadalam Rumah Allah dan makan roti parsombahan nan tak dibotulkan samo-Dio untuk makanannyo, kek gitu jugolah orang-orang nan basamonyo, kacuali hanyo untuk paro imam? ⁵ Ato, bolum pornahkah kamu mambaco dalam Hukum Taurat, kolok pas hari sabat, para imam di Bait Allah malanggar sabat dan orang tu tak basalah? ⁶ Akan tatapi, Aku kasihtaukan samo kamu, kolok nan lobih bosar dari pado Bait Allah ado disinin. ⁷ Namun, kolok kamu dah mangatahui artinyo ni, "Nan ondak ati-Ku adolah Kasih, dan bukan parsombahan', kamu tak akan pornah manghukum nan tak basalah. ⁸ Karono, Anak Manusio adolah Tuhan atas hari sabat. ⁹ Satolah barangkat dari sanan, Yesus tibo di sinagoge orang tu, ¹⁰ Tengok, ado saorang laki-laki nan lumpuh sabolah tangannyo, dan, orang tu batanyo samo Yesus, kato orang tu, "Apokah dibotulkan ondak manyombuhkan pas hari sabat?" bak supayo orang tu biso manyalahkan Yesus. ¹¹ Dan, Dio bacakap samo orang tu, "Siapokah diantaro kamu nan mampunyoi saekor domba, dan kolok domba tu jatuh ka dalam lubang pas hari sabat, bukannyo dio akan manariknyo dan mangaluarkannyo? ¹² Batapo lobih banilainyolah manusio dari pado saekor domba! karono tu, dibotulkan babuek baik pas hari sabat." ¹³ Abistu, Yesus bacakap samo orang itu, "Ulurkan tanganmu." orang itu pun mangulurkan tangannyo dan disombuhkan saponuhnyo macam tangannyo nan lain. ¹⁴ Akan tatapi, orang-orang Farisi pogi dari situ dan basubahat malawan Dio, kek mano caronyo ondak mambinasokan-Nyo. ¹⁵ Namun, Yesus, pas mangatahui hal ini, manyingkirlah Dio dari sanan, Banyak nan mangikuti-Dio dan Dio manyombuhkan orang tu samuo. ¹⁶ Dan mamparingatkan orang tu, supayo tidak mambuek diri-Nyo diketahui orang banyak. ¹⁷ Hal ini tajadi untuk manggonapi apo nan disampekkan lewat Nabi Yesaya : ¹⁸ "Tengoklah, hamba-Ku nan dah Kupilih, nan Kukasihi, nan samo-Nyo Aku akan manaruh roh-Ku ka atas-Nyo dan Dio akan manyatokan kaadilan kapado bangso-bangso lain. ¹⁹ Dio tak akan mambantah, ato batariak, dan tak akan ado saorangpun nan mandongar suaro-Nyo dijalan-jalan. ²⁰ Buluh nan patah tak akan Dio putuskan, dan sumbu nan hampir padam, tak akan Dio matikan, sampe Dio mambuek kaadilan monang. ²¹ Dan dalam Namo-Nyo, bangso-bangso laen akan baharap. ²² Kamudian saorang nan karasukan roh ta'un, nan buto dan bisu, dibawak ka Yesus. Dan, Yesus manyombuhkannyo, sahinggo orang nan buto dan bisu tu pun bacakap dan manengok. ²³ Samuo orang manjadi tacongang-congang dan batanyo, "Mungkinnyo Dio ni anak Daud?" ²⁴ Akan tatapi, pas orang-orang Farisi mandongarnyo, bacakaplah orang tu, "Orang ni tak mungkin mangusir roh-roh ta'un kolok tak pake kuaso Beelzebul, pamimpin roh-roh ta'un." ²⁵ Yesus tau pikiran orang tu, dan bacakap samo orang tu, "Satiap Karajoan nan tapocah-pocah, malawan dirinyo sandiri, ditinggalkan. Dan, satiap kota ato rumah nan tapocah-pocah, malawan diri-nyo sandiri dan tak akan batahan. ²⁶ Dan, kolok iblis mangusir iblis, dio tapocah-pocah malawan dirinyo sandiri, Kolok kek gitunyo, kek manolah karajoannyo akan batahan. ²⁷ Dan, kolok Aku, magusir roh-roh ta'un pakek kuaso Beelzebul, pakek apolagilah anak-anakmu mangusir orang tu? karono tu, orang tu akan manjadi hakimmu. ²⁸ Akan tatapi, kolok pakek Roh Allah, Aku mangusir roh-roh ta'un, Karajaan Allah dah datang atas kamu. ²⁹ Ato, kek manolah sasaorang tolap masuk ka rumah orang nan kuat dan marampas barang-barangnyo, kolok tak diikatnyo dulu orang kuatnyo, dan marampok rumah tu. ³⁰ Siapo sajo nan tak basamo dengan Aku, pasti tacore-borei. ³¹ Karono tu, aku mangatokan samo kamu, kolok satiap doso dan hujatan manusio akan diampuni, tatapi hujatan samo Roh, tak akan diampuni. ³² Dan, siapo sajo nan mangatokan sasuatu hal nan malawan Anak Manusio akan diampuni, tatapi siapo sajo nan bacakap malawan Roh Kudus, tak akan diampuni, elok pas masa kinin maupun pas maso nan akan datang." ³³ "Kolok pohon tu elok, elok jugolah buahnyo, ato, kolok pohon tu tak elok, tak elok jugolah buahnyo, karono, pohon tu dikonal dari buahnyo. ³⁴ Hai, katurunan ular baludak, apo mungkin kamu nan jahat mangucapkan hal-hal nan elok? karono, apo nan diucapkan mulut, kaluarnyo dari hati. ³⁵ Orang elok mangaluarkan hal-hal nan elok dari panyimpanan hatinyo nan elok, dan orang jahat dari panyimpanan hatinyo nan jahat. ³⁶ Namun, Aku bacakap samo kamu, kolok satiap kato nan sio-sio, nan diucapkan orang, mereka akan mampartanggung-jawabkannyo pas hari panghakiman. ³⁷ Karono oleh parkataanmu, kamu akan dibotulkan, dan karono parkataanmu, kamu akan dihukum. ³⁸ Abistu, babarapo ahli taurat dan orang Farisi bacakap samo Yesus, "Guru, kami ondak manengok tando dari-Mu." ³⁹ Dijawab Yesus lah orang tu, "Generasi nan jahat dan bazinah ni, manuntut suatu tando. Dan, tak akan ado tando nan dikasihkan samo mereka, kacuali tando Nabi Yunus. ⁴⁰ Karono, Kayak Yunus nan sompat ado diporut ikan bosar salamo tigo hari dan tigo malam, kek gitu jugo lah Anak Manusio akan barado dalam porut bumi salamo tigo hari tigo malam. ⁴¹ Orang-orang Niniwe akan badiri basamo-samo dengan generasi ini pas penghakiman dan akan manghukumnyo, karono orang tu batobat satolah mandongar caramah si Yunus. Dan tengoklah, nan lobih bosar dari pado Yunus ado disinin. ⁴² Ratu dari salatan akan bangkit basamo-samo generasi ini pas hari panghakiman dan akan manghukumnyo karono dio datang dari ujung bumi ondak mandongar hikmat Salomo. Dan, tengoklah, nan lobih bosar dari pado Salomo ado disinin. ⁴³ "Pas roh najis kaluar dari manusio, dio malewati tompat-tompat nan tak barair ondak mancari tompat istirahat, tatapi tak manomukannyo. ⁴⁴ Trus, dio bakato, "baleklah aku karumahku samulo," dan, pas tibo dio ka tompatnyo samulo, ditengoknyolah rumah tu kosong, dah borsih dan taratur. ⁴⁵ Abis tu, pogi lah dio dan mambawak kawannyo nan lobih jahat dari dio, dan masuklah orang tu dan tinggal di rumah nan samulo tadi, tarakhir, kaadaan orang tu pun manjadi jauh lobih buruk dan jahat dari sabolumnyo. Kek gitu jugolah nan akan tajadi samo generasi nan jahat ni. ⁴⁶ Samantaro Yesus masih bacakap samo orang banyak, tengoklah, omak dan sodaro-sodaro-Nyo badiri diluar, barusaho ondak bacakap samo Dio. ⁴⁷ Sasaorang bakato samo-Dio, "Guru, omak dan sodaro-sodaro-Mu badiri di luar, barusaho ondak bacakap samo Engkau" ⁴⁸ Yesus manjawab orang nan mangasihtaukan samo Dio dan bacakap, "Siapolah agaknyo omak-Ku dan siapolah agaknyo sodaro-sodaro-Ku? ⁴⁹ Dan, sambil mambontangkan tangan-Nyo ka arah murid-murid-Nyo, kato Yesus, "Inilah omak-Ku dan sodaro-sodaro-Ku! ⁵⁰ Karono, siapo sajo nan malakukan kehendak Ayah-Ku nan ado disurgo, diolah sodaro laki-laki-Ku, sodaro parampuan-Ku dan omak-Ku."