¹ Pada maso tu, Kaisar Agustus mangaluarkan parintah supayo dibueklah sensus bagi samuo penduduk di saluruh dunio. ² Sensus panduduk ni lah nang partamo kali dibuat waktu Kirenius manjadi gubernur di Siria. ³ Samuo orang balek ka kota asal orang tu masing-masing ondak mandaftarkan diri. ⁴ Yusuf jugo pogi maninggalkan Nazaret, kota di Galilea, dan munuju Yudea, ka kota Daud nang disobut Betlehem, korno dio barasal dari garis katurunan Daud, ⁵ supayo dio didaftarkan basamo dengan Maria, tunangannyo yang sedang mangandung. ⁶ Waktu Yusuf dan Maria barado di Betlehem, tibolah waktunya buat Maria untuk malahirkan. ⁷ Maria pun malahirkan Anak laki-laki nang partamo. Dio mambungkus-Nyo dengan kain lampin dan digolekkan-Nyo di dalam palungan korno udah tak ado lagi kamar buat orang tu untuk manginap. ⁸ Di daerah nang samo, ado babarapa gembala nang tinggal di padang untuk manjaga kawanan domba orang tu pado tongah malam. ⁹ Tibo-tibo, malaikat Tuhan badiri di dopan orang tu dan kamuliaan Tuhan basinar di sakaliling orang tu sahinggo orang tu katakutan. ¹⁰ Tapi, malaikan tu bacakap samo orang tu, "Jangan takut dongarlah, AKu mangasitau samo kamu kabar nang elok tontang sukacita bosar nang disadiokan buat samuo bangsa. ¹¹ Hari ini, sudah lahir untuk kamu saorang Juru Selamat, yaitu Kristus, Tuhan, di kota Daud. ¹² Inilah tando buat kamu: kamu akan manjumpoi Bayi nang dibungkua dongan kain lampin dan tagolek dalam palungan." ¹³ Tibo-tibo, kaliatanlah basamo-samo malaikat tu sakumpulan bosar tantara surgawi nang mamuji Allah dan bacakap, ¹⁴ "Kamuliaan bagi Allah di tompat nang mahatinggi dan damai sajahtra di bumi, diantaro orang-orang nang bakonan samo-Nyo." ¹⁵ Waktu para malaikat tu pogi maninggalkan gembala tu dan balek ka surga, gembala tu bacakap samo nang laen, "Mari kito ka Betlehem untuk manengok apo nang sudah tajadi ni, nang sudah Tuhan kasitau ka kito." ¹⁶ Kamudian, orang copat-copat pogi dan manomukan Maria dan Yusuf, serta Bayi nang tagolek di palungan. ¹⁷ Pado saat gembala-gembala tu manengok Dio, dicaritokan orang tulah carito nang sudah dibilang samo orang tu mangonai Anak tu. ¹⁸ Dan, samuo orang nang mandongar hal tu tacongang samo nang dicakapkan gembala tu ka orang tu. ¹⁹ Tapi, Maria diam sajo dan maronungkannya dalam hati. ²⁰ Lalu, para gembala-gembala tu balek ka tompat domba-domba orang tu sambil mamuliokan dan mamuji Allah atas samuo nang sudah orang tu tengok dan dongar macam nang dicakapkan ka orang tu. ²¹ Dan, sasudah gonap dalapan hari tibolah untuk manyunantkan Bayi tu, nama-Nyo disobut Yesus, macam namo yang dikasi samo malaikat sabolum Dio dikandung di dalam rahim. ²² Katiko hari-hari panyucian sasuai hukum Musa buat manyorahkan-Nyo samo Tuhan, ²³ macam nang sudah tatulis dalam hukum Tuhan, "Satiap anak laki-laki nang paling bosar harus dikuduskan untuk Tuhan. ²⁴ dan untuk mamborikan parsembahan sasuai samo apo nang dicakapkan dalam hukum Tuhan, yaitu sapasang burung dara ato dua ekor burung marpati mudo." ²⁵ Ado saorang laki-laki nang banamo Simeon nang tinggal di Yerusalem. Dio adolah orang nang bonar elok prilakunyo, nang manunggu-nunggu panghiburan Allah atas Israel, dan Roh Kudus manyortainyo. ²⁶ Roh Kudus mangkasitaunyo kalo dio tak kan mati sabolum manengok Kristus nang diurapi Tuhan. ²⁷ Lalu, Simeon datang ka Bait Allah atas tuntunan Roh Kudus, waktu Yusuf dan Maria mambawa Bayi Yesus ka Bait Allah buat malakukan samo-Nyo apo nang sudah ditontukan hukum Taurat. ²⁸ Kamudian, Simeon manggendong Bayi itu lalu mamuji Allah, katonyo, ²⁹ "Sakarang, ya Tuhan, kiranyo, Kau mangazinkan palayan-Mu ni pogi dalam damai sasuai dengan firman-Mu; ³⁰ sobab mataku sudah manengok kasalamatan-Mu, ³¹ nang sudah Kau sadiokan di dopan samuo bangso; ³² yaitu sinar nang akan manorangi bangso-bangso nang tak mangonal Tuhan, nang manjadi kamuliaan bagi umat-Mu, Israel." ³³ Yusuf dan omak Anak tu manjadi heran samo apo nang dicakapkan Simeon mangonai Dio. ³⁴ Lalu, Simeon mamborkati orang tu dan bacakap ka Maria, omak Yesus, "Dongar, Anak ni sudah ditotapkan buat manjatuhkan dan mambangkitakn banyak orang di Israel, jugo manjadi tanda nang dilawan banyak orang. ³⁵ (Dan, sabatang podang akan manikam jiwamu) supayo isi hati banyak orang dinyatokan." ³⁶ Di sano jugo ado sorang nabiah banamo Hana, anak Fanuel dari suku Asyer. Dio sudah sangat tuo. Dio hanya hidup samo suaminyo salamo tujuh tahun sasudah parnikahannyo. ³⁷ dan kamudian manjadi janda sampek umur 84 tahun. Dio tak pornah maninggalkan Bait Allah, tapi baribadah siang dan malam samo barpuasa dan badoa. ³⁸ Pado saat tu, datanglah Hana dan dio mangucap syukur ka Allah jugo mancaritokan tontang Yesus ka smuo orang nang manunggu-nunggu panobusan Yerusalem. ³⁹ Sasudah Yusuf dan Maria mangarojokan sagalo sasuatu sasuai hukum Tuhan, orang tu balek ka Galilea, ka kota asal orang tu, yaitu Nazaret. ⁴⁰ Anak tu pun mulai samakin bosar, kuat, ponuh hikmat, dan Allah mamborkati-Nyo. ⁴¹ Satiap tahun, orang tuo Yesus pogi ka Yerusalem pado Hari Raya Paskah. ⁴² Waktu Yesus barumur duo bolas tahun, orang tu pogi ka sanan sasuai kabiasaan hari raya tu. ⁴³ Sasudah parayaan tu salose, orang tu pulang. Tapi, Yesus totap tinggal di Yerusalem tanpa tau orang tuo-Nyo. ⁴⁴ Korno orang tuo Yesus mangira bahwa Dio barado di rombongan, orang tu pun malanjutkan parjalanan sampe saharian. Lalu, orang pun mulai mancari-Nyo di antaro kaum kaluargo dan orang-orang na orang tu konal. ⁴⁵ Waktu orang tu tak manomukan Yesus, orang tu balek ka Yerusalem buat mancari-Nyo. ⁴⁶ Sasudah tigo hari, orang tu manomukan Yesus di Bait Allah sodang duduk diantaro guru-guru agamo, sambil mandongarkan dan batanyo ka orang tu. ⁴⁷ Samuo orang nang mandongar-Nyo tacongang akan pangatahuan dan jawaban-jawaban-Nyo. ⁴⁸ Katiko orang tuo-Nyo manengok Dio, orang tu jugo heran. Torus, omak-Nyo batanyo, "Nak, mangapo Kau malakukan ini samo kami? Ayah-Mu dan aku katakutan mancari-Mu." ⁴⁹ Kato Yesus ka orang tu, "Mangapo kamu mancari Aku? Tak tau kamu Aku pasri ado di rumah Ayah-Ku?" ⁵⁰ Tapi, orang tu tak mangorti apo nang dicakapkan-Nyo ka orang tu. ⁵¹ Lalu, Yesus pulang samo orang tu ka Nazaret dan manuruti orang tu. ⁵² Yesus pun samakin bosar dan samakin bijaksana. Dio jugo samakin disukoi Allah dan manusiao.