¹ Kito jagolah torus kasih parsodaroan tu!. ² Salalu ingat untuk mangasih tumpangan kapado orang-orang paranto, korno, kalok babuat kek gitu, sabagian orang tolah manjamu malekat-malekat, tanpo orang tu sodori. ³ Cok kalian ingat orang-orang nang di kurung dipanjaro, saolah-olah kalian di kurung panjaro samo orang tu, ingat jugo orang-orang nang disiksa, korno kalian pun ado di dalam tubuh. ⁴ Parkawinan tu harus di hargoi dengan ponuh hormat oleh samuo orang, dan jagolah tompat tidur parkawinan bak totap suci, korno Allah pasti manghukum orang-orang nang cabul dan para pazinah. ⁵ Jangan sampek hidup kau tu jadi cinta uang, cukuplah ondaknyo apo nang sudoh ado samo kau, karono Dio sandiri nang bacakap: "Takkan Aku tinggalkan kau doh, dan takkan pornah Aku abekan kau," ⁶ Korno tu, kito biso bacakap dengan yakin kali: "Tuhan adolah Panolongku, dan aku takkan takut. Antah apopun nang ondak dibuek orang ka awak." ⁷ Ingot jugo pamimpin-pamimpin kau, orangtu yang tolah mangajarkan firman Tuhan ka kalian. Tengoklah taladan cara hidup orangtu, dan contoh iman orangtu. ⁸ Yesus Kristus tu totap samo, kamarin, kinin, dan sampe salamo-lamonyo. ⁹ Jangan sampe kalian disosatkan dengan pangajaran nang barmacam-macam dan nang tak pornah kalian konal; Korno eloknyo, kalok hati dikuatkan dengan anugrah, bukan dengan paraturan tontang makanan nang tak ado manfaatnyo buek siapo sajo nang malakukannyo. ¹⁰ Kito punyo Altar, nang kalok satiap orang-orang nang bakorjo di Kemah Suci tu, tak layak untuk makan. ¹¹ Dan, korno daging dari hewan-hewan tu, nang darohnyo dibawak samo imam bosar ka Ruang Mahasuci, sabage parsombahan panobusan doso, dibakar diluar parkemahan. ¹² Bagitu pulaklah, Yesus juga mandarito diluar gorbang kota, domi manguduskan umat-Nyo dengan darah-Nyo sandiri. ¹³ Korno tu, moh lah kito manjumpoi Yesus di luar parkemahan, dan mamundak kahinaan nang samo dengan kahinaan nang tolah dipundak-Nyo. ¹⁴ Sobab, dibumi ni, kito tak punyo kota nang akan ado untuk salamo-lamonyo, tatapi kito sodang manunggukan kota nang akan datang karang. ¹⁵ Korno tu, lewat Kristus, moh lah kito satorusnyo manyorahkan kurban pujian ka Allah, itulah ucapan dari mulut nang mamuliokan namo-Nyo. ¹⁶ Janganlah ondaknyo kalian lupo babuek nang elok dan babagi apo nang kalian punyo, korno kurban kayak gitulah nang manyukokan hati Allah. ¹⁷ Taat samo pamimpin-pamimpin, dan tunduk jugo ka orang tu, karono orang tulah nang manjaga jiwo kau, dan nang harus batanggung jawab atasnyo. ¹⁸ Doakan kalianlah kami, korno kami yakin, kolok kami mampunyoi hati nurani nang elok, nang torus barusaho malakukan samuo hal dengan caro nang tarhormat. ¹⁹ Aku mamaksa kalian, supayo badoa dengan lobih basungguh-sungguh lagi, bak supayo aku di balekkan lagi ka kalian. ²⁰ Kinin, Allah adolah sumber sojahtro, nang sudoh manghidupkan lagi Yesus, Tuhan kito, Sang Gembala Agung atas domba-domba-Nyo, dengan darah parjanjian nang kokal. ²¹ Diparlongkapilah kalian ondaknyo dalam sagala hal nang elok, untuk malakukan kahondak-Nyo. Dan, biarlah Dio bakorjo didalam kito untuk manyukokan hati-Nyo lewat Kristus Yesus, nang samo-Diolah kamulioan sampe satorus-torusnyo. Amin. ²² Sodaro-sodaroku, aku mangarahkan kalian supayo mandongarkan kato-kato patuahku ni dengan sabar, korno kato-kato patuahku ni sudoh ku catatkan ka kalian samuo dengan singkat. ²³ Aku ondak mangasihtaukan ka kalian, kalok sodaro kito, Timotius, tolah dilopaskan dari kurungan panjaro. Dan, kolok dio sacopatnyo datang ka aku, akupun akan datang dengan dio, pas waktu manjumpoi kalian. ²⁴ Kirim salam kami ka samuo pamimpin-pamimpin kalian dan ka samuo orang-orang suci. Sodaro-sodaro kito dari Italia, kirim salam jugo kalian samuo. ²⁵ Anugrah Allah manyotoi kalian samuo.