¹ Iman adolah jaminan atas sagalo sasuatu nang kito harapkan, dan bukti dari sagalo sasuatu nang tak talihat. ² Sobab, Karono iman, orangtulah, orang-orang di zaman dulu mandapatkan pujian. ³ Karono Iman, kito mangorti, kolok alam samesta dibuek pake Firman Allah. nah, jadi apo nang talihat tak tabuat dengan apo nang talihat pulak. ⁴ Korno Iman, Habel manyorahkan ka Allah korban nang lobih elok dari pado nang di sorahkan Kain. Lewat sasorahannyo tu, Habel manarimo kasaksian elok dari Allah sabage orang botul; Allah mangasihkan kasaksian tu dengan manarimo korban sasorahannyo. Dan, korno Imannyo, kalokpun dio mati, Habel masih biso bacakap. ⁵ Korno Iman, Henokh tarangkat, supayo dio tak mosti mangalami kamatian, dan dio tak di jompoi, korno Tuhan sudoh mangangkatnyo; karono sabolum tarangkat, dio manarimo kasaksian sabage orang nang manyonangkan Allah. ⁶ Tak mungkin biso manyonangkan Allah kolok tanpa iman, korno, siapapun nang mandokat ka Allah harus pacayo kolok Allah tu ado, dan kolok Allah mangasih pahalo ka mereka nang mancari Dio. ⁷ Korno Iman, sasudoh diingatkan samo Allah tontang kajadian nang bolum io tengok, Nuh dengan gamotar dan taat mambuek sabuah kapal bosar [Bahtera] ondak manyalamatkan kaluargonyo. Dengan inilah, Nuh manghukum dunia dan manjadi pawaris kabonaran nang sasuei samo imannyo. ⁸ Karono Iman, Abraham waktu dipanggil Tuhan, taat ondak pogi ka satu tompat nang ondak di kasihkan sabage milik pusakonyo. Dan, dio bagorak pogi, moskipun tak tau dia ondak pogi kamano. ⁹ Karono Iman, dio pogi dan manotap di tanah nang di janjikan, kayak tinggal di tanah parantoan, itulah, didalam kema basamo Ishak dan Yakub; sang pawaris dari janji nang samo. ¹⁰ Karono Abraham sodang manunggu sabuah kota nang mampunyoi Pondasi, nang parancang dan pambangunyo adolah Allah. ¹¹ Karono Iman, Sara manarimo kakuatan ondak mangandung dan malahirkan anak, walopun dio mandul dan sudoh talalu tuo ondak malahirkan, karono Sara bapikir, Dio nang tolah bajanji kapadonyo adolah satio. ¹² Korno itulah, dari satu orang nang sudoh sangat tuo dan hampir mati, lahirlah katurunan nang banyak kayak bintang dilangit, dan nang banyaknyo tak tahitung kayak butiran pasir di pantai. ¹³ Orang ni samuo sudoh mati dalam iman dengan tak manarimo apo nang di janjikan, tatapi, orang tu malihat dan manyambut janji-janji tu dari jauh, dengan mangatahui, kolok orang tu adolah para pandatang dan orang paranto di bumi. ¹⁴ Parkatoan orang tu nang macam tu, manunjukkan dengan jolas, kolok orang tu lagi mancari satu tanah air bagi orang tu. ¹⁵ Karono, kolok nang orangtu pikirkan itu, adolah nogri nang orangtu tompati sabolumnyo, orang tu pun biso sajo balek lagi kasanan. ¹⁶ Itupun, orang tu totap marindukan satu nogri nang lobih elok, itulah Nogri Surgawi. Korno itu jugolah, Allah tak malu dibilang sabage Allah orang tu, korno Dio sudoh manyiapkan satu kota untuk orang tu. ¹⁷ Korno Iman, pas waktu Tuhan mancobainyo, Abraham manyorahkan Ishak sabage korban; dio nang sudoh manarimo janji-janji tu, rela pulak manyorahkan anaknyo nang tunggal itu. ¹⁸ Mangonoi anak itu, Allah pornah bacakap, "Dengan namo Ishaklah, katurunan kau akan dikonal." ¹⁹ Abraham malotakkan kayakinannyo ka Allah, bahkan dio pun pacayo kolok Allah tolap manghidupkan orang nang sudah mati. Ibaratnyo, Abrahan tolah manarimo balek si Ishak dari kamatian. ²⁰ Korno Iman, Ishak mamborkati masa dopan si Yakub dan Esau. ²¹ Korno Iman, Yakub pas mandokati ajalnyo, sompat mamborkati anak-anak si Yusuf. Dio manyombah ka Allah dengan manyandarkan kapalonyo ka tongkatnyo. ²² Korno Iman, Yusuf, pas akhir hayatnyo, bacakap tontang kaluarnyo bangsa Israel dari Mosir dan mambori parintah nang barhubungan dengan tulang-tulangnyo. ²³ Korno Iman, Musa, pas dio lahir, dirondokkan salamo tigo bulan samo omaknyo. Orangtu manengok, kalok si Musa adolah bayi nang amat manis, dan orangtu tak takut samo parintah rajo. ²⁴ Korno Iman, Musa, pas dio samakin bosar, tak tarimo di bilang anak dari putri Firaun. ²⁵ Dio lobih mamilih mandarito basamo dengan umat Allah, dari pado manikmati kasonang doso nang hanyo samantaro sajo. ²⁶ Dio mangiro bahwa, kahinaan Kristus lobih bahargo dari pado saluruh harto kakayaan Mosir, karono Musa malihat ka pahalo nang akan datang [Kokal]. ²⁷ Korno Iman, Musa maninggalkan Mosir tanpo raso takut kapado kamarahan Rajo Firaun, saolah-olah Musa biso manengok Dio nang tak kaliatan itu. ²⁸ Korno Iman, Musa malaksanakan Paskah dan pamorcikan darah, sahinggo malekat kamatian tak biso manyontuh bangso Israel. ²⁹ Korno Iman, bangso Israel bajalan manyobrangi Laut Merah, saakan-akan orang bajalan di tanah nang koring. Tatapi orang-orang Mosir ikut mancuba manyobrang jugo, sayangnyo, orang tu di tanggolamkan. ³⁰ Korno Iman, tembok Yerikho roboh, sasudah di kalilingi salamo tujuh hari. ³¹ Korno Iman, Rahab, pelacur itu, tak dibunuh basamo dengan orang-orang nang tak taat, karono dio manarimo mato-mato Israel dengan dame. ³² Torus, apolah lagi nang ondak aku cakapkan? Tak cukup pulak waktuku ondak mancaritokan tontang Gideon ka kalian, Barak, Simson, Yefta, Daud, Samuel, dan paro Nabi. ³³ Nang karono Iman, tolah mangalahkan karajaan-karajaan, babuat kabonaran, manarimo janji-janji, dan mangatupkan mulut singo-singo, ³⁴ Mamadamkan kobaran api, salamat dari mato podang, dikuatkan dari kalomahan orangtu, gagah parkaso dalam paporangan, dan manghalo tantaro asing. ³⁵ Samuo parampuan manarimo kambali orang-orang mati, lewat kabangkitan, tatapi, ado pulak nang dianiayo dan manolak supayo manarimo kabebasan, bak orangtu mandapatkan jugo kabangkitan dalam kahidupan nang lobih elok. ³⁶ Salain tu, ado jugo nang dihina dan di cambuk, nang parahnyo ado nang di pasung dan di kurung panjaro. ³⁷ Orangtu di rajam, digergaji manjadi duo, dan di bunuh samo podang. Ado pulak nang mangambaro dengan mamakek baju dari kulit domba ato kulit kambing; orangtu sangat miskin, ditindas, dan diparlakukan semena-mena. ³⁸ Dunia ni tak cocok buat orangtu, orangtu mangambaro di padang gurun dan gunung-gunung, tinggal di colah-colah gunung, dan goa-goa di bawah tanah. ³⁹ Walopun mandapat kasaksian nang elok karono iman nang orangtu punyo, orangtu tak manarimo apo nang dijanjikan. ⁴⁰ Sobab, Allah manyadiokan sasuatu nang lobih elok lagi buek kito, sahinggo tanpo kito, orangtu tak akan jadi sampurno.