¹ Awak, Paulus, diriku sandiri mamohon ka kamu dengan kalombutan dan kamurahan Kristus, awak, nan tak barani pas bahadapan muko dengan kamu, tatapi barani pas jauh dari kamu, ² Awak mohon ka kamu bak supayo pas aku datang, aku tak porlu manjadi barani dengan kayakinan nan dengannyo awak mamparhitungkan ondak barani malawan babarapo orang nan manganggap kami hidup sacaro daging. ³ Memang, kami masih hidup dalam kadagingan, tatapi kami tak bajuang sacaro daging, ⁴ Korno, sanjato-sanjato paporangan kami bukan dari daging, malainkan dari kakuatan ilahi untuk kahancuran benteng-benteng. ⁵ Kami maruntuhkan pamikiran-pamikiran dan satiap hal tinggi nan dibangun oleh keangkuhan manusio ondak manontang pangonalan akan Allah. Kami mangurung sagalo pikiran dan mangalahkannyo kapado Kristus. ⁶ Dan kami siap manghukum samuo katidaktaatan, pas kataatan kau disampurnokan. ⁷ Tengoklah samo aoi nan ado didopan kau, Kalok ado orang nan mayakinkan dirinyo adolah milik Kristus, bak biarlah dio bapikir balek hal ni, yaitu sabagemano dio adolah milik Kristus, kek gitu jugonyo kami. ⁸ Bahkan, kolokpun aku agak balobihan mambagokan otoritas, nan Allah kasihkan ka kami ondak mambangun kalian dan bukan ondak manghancurkan kamu, takkan malu aku doh. ⁹ Awak tak ondak ditengok saolah-olah awak ondak manakut-nakuti kamu dengan surat-surat ku. ¹⁰ Korno, orang tu bacakap, "surat-suratnyo memang togas dan koras, tatapi sacaro kahadiran tubuh, dio lomah dan cakapnyo pun tak bararti." ¹¹ Biarlah orang nan macam tu bapikir hal ni, yaitu, apo nan kami katokan dengan surat pas kami tak basamo kau, samo macam parbuatan kami pas basamo kau. ¹² Korno, kami tak barani ondak mangalompokkan ato mambandingkan diri kami dengan babarapo orang nan mamuji-muji dirinyo sandiri. Namun, pas orang tu mangukur dirinyo dengan diri orang tu sandiri dan mambandingkan dirinyo dengan diri orang tu sandiri, orang tu tak akan mamahaminyo. ¹³ Akan tatapi, kami tak akan banggo atas hal-hal nan malampoi batasan kami, malainkan manurut batasan dari katotapan nan Allah tolah bagikan ka kami, yaitu batasan untuk manjangkau sampe kapado kamu jugo. ¹⁴ Korno, kami tak malampoi batasan kami, saolah-olah kami tak manjangko sampe kapado kamu, kamilah nan partamo kali sampek ka kamu dengan Injil Kristus. ¹⁵ Kamu jugo tak bangga malampoi batasan kami dengan babanggo atas jorih lolah orang laen, malainkan dengan pangharapan, kolok sebagemano iman kau batumbuh, wilayah pakorjoan kami diantaro kamu akan samakin diparluas lagi. ¹⁶ Bak supayo kami dapat mambaritokan Injil ka wilayah-wilayah diluar kamu, dan tak babangga atas apo nan tolah disalosekan di wilayah pakorjoan orang laen. ¹⁷ "Siapo nan ondak babanggo, bak biarlah dio babanggo didalam Tuhan." ¹⁸ Korno, tak orang nan mamuji dirinyo sandiri nan tabukti tahan uji, malainkan orang nan Tuhan puji.