(Surat Kapada Jemaat di Efesus) ¹ "Kapada malaikat jemaat di Efesus tulisenlah: Ikoklah pakataen Dia nan manggomgom tujuh bintang di tangan kanan-Nyeh dan nan bajalan di hantara tujuh kaki dian emas otou: ² Aku tontu samua pakaejaenmu dan jerih payahmu dan katekunanmu, bageimona kamu idak tahan tahadap nan jahat, dan kamu manguji urang-urang nan manyobut dirinyeh rasul, topi saboneennyeh mareka bukanlah rasul, dan mandapati mareka palsu. ³ Kamu mamunyai katekunen dan batahan demi nama-Ku dan idak mangenal lelah. ⁴ Topi, Aku manegurmu kaena kamu tolah maninggalen sayangmu nan samula. ⁵ Kaena otou, ingatlah dai mona kamu jatuh dan batobat saeta lakuen apa nan sudah kamu kejaen samula. Bila idak, Aku nak tiba kapadamu dan mangambik kaki dianmu dai tompatnyeh, kacuali kamu batobat. ⁶ Topi, ikok nan kamu punyai: kamu mambenci pabuaten-pabuaten para pangikut Nikolaus, nan juga Kubenci. ⁷ Dia nan mamunyai talinga biaklah mandonge apa nan dikataen Roh kapada jemaat-jemaat. Kapada dia nan menang, Aku nak mambagien makan dai Pohon Kahidupen nan ada di Taman Allah." (Surat kapada Jemaat di Smirna) ⁸ "Dan, kapada malaikat jemaat di Smirna tulisenlah: Ikoklah pakataen dai Nan Awal dan Nan ahir, nan tolah mati dan hidup balik: ⁹ Aku tontu kasusahen dan kamiskinenmu, topi sasungguhnyeh kamu kaya! Aku tontu fitenah nan ditujuen kapadamu oleh mareka nan manyobut diri urang diri urang Yahudi, topi saboneennyeh bukan, malainen sinagoge Ibelis. ¹⁰ Jangan takut tahadap apa nan kamu tanggung. Pandanglah, setan nak mancampaen babarapa dai kamu ka panjaa supaya kamu diuji, dan kamu nak mangalami panganiayaan salama 10 hai. Satialah sampei mati, dan Aku nak mambagien kapadamu mahkota kahidupen. ¹¹ Dia nan mamunyai talinga biaklah mandonge apa nan dikatain Roh kapada jemaat-jemaat. Urang nan menang idak nak mananggung oleh kamatien nan kadua." (Surat kapada Jemaat di Pergamus) ¹² "Dan, kapada malaikat jemaat di Pergamus tulisen: Ikoklah pakataen Dia nan mamunyai podang tajam bamata dua: ¹³ Aku tontu di mona kamu tunak, di tompat tahta ibelis baada; topi kamu bapogang pada nama-Ku dan idak manyangkal iman-Ku bahkan pada zaman Antipas, saksi-Ku nan satia nan dibunuh di hantaramu, tompat Ibelis tunak. ¹⁴ Namun, Aku manegurmu kaena ada babarapa di hantaramu nan mangikuti ajeen Bileam, nan mangaje Balak untu manaruh sandungan di depan budak-budak Israel, untuk makan mokonen nan dipasembahen kapada bahala dan malakuen dosa-dosa seksual. ¹⁵ Demikian juga, ada babarapa di hantaramu nan bapogang pada ajeen Nikolaus. ¹⁶ Kaena otou, batobatlah! Bila idak, Aku nak sagera tiba kapadamu dan mamerangi mareka dengan podang dai mulut-Ku. ¹⁷ Dia nan mamunyai talinga biaklah mandonge apa nan dikataen Roh kapada jemaat-jemaat. Kapada dia nan menang, Aku nak mambagien manna nan tasembunyi; dan Aku nak mambagien kapadanyeh sabuah batu putih, dan sabuah nama bahau tatulis pada batu otou, nan idak saurang pun manontuinyeh kacuali urang nan manarimanyeh." (Surat kapada Jemaat di Tiatira) ¹⁸ "Dan, kapada malaikat jemaat di Tiatira tulisenlah: Ikoklah pakataen Budak Allah, nan mata-Nyeh sapaeti nyalak api dan nan kaki-Nyeh manyalak sapaeti tambaga dalam parapien: ¹⁹ Aku tontu pabuaten-pabuatenmu, sayang dan imanmu, palayanenmu dan kasabarenmu, dan bahwa pakejaen-pakejaenmu nan taahir malampaui nan patama. ²⁰ Namun, Aku manegurmu kaena kamu mambiaken batina Izebel otou, nan mangaku sabagei saurang nabiah, mangaje dan manyosaten palayan-palayan-Ku supaya bajina dan makan mokonen nan tolah dipasembahen kapada bahala. ²¹ Aku tolah mambagiennyeh waktu untu batobat, topi dia idak mau batobat dai jinanyeh. ²² Pandanglah, Aku nak mancampaen dia ka atas tompat tido pandaitaen dan mareka nan bajina dengannyeh nak Kucampaen ka dalam kasusahen bose, kacuali mareka batobat dai pabuaten-pabuaten batina otou. ²³ Dan, Aku nak mambunuh budak-budaknyeh dengan kamatian; dan smua jemaat nak manontui bahwa Akulah nan manguji pikien dan hati urang, dan Aku nak mambagien kapadamu masing-masing manurut pabuatenmu. ²⁴ Namun, kapada kamu nan lain di Tiatira, nan idak mangikuti ajeen ikok, nan bolum manontui rahasia-rahasia ibelis, Aku mangataen: Aku idak nak malotaen beban lain ka atasmu. ²⁵ Topi, bapoganglah teus pada apa nan tolah kamu punyai sampei Aku tiba. ²⁶ Dan, kapada urang nan menang dan malakuen pakejaen-pakejaen-Ku sampei ahir, Aku nak mambagien kuasa atas bangsa-bangsa, ²⁷ dan mareka nak mamaentah bangsa-bangsa otou dengan tongkat bosi, dihancoen bakoping-koping sapaeti tembike tukang pariuk, kaena Aku juga tolah manarima kuasa dai Bopak-Ku ²⁸ Dan, Aku nak mambagien kapadanyeh bintang timur. ²⁹ Dia nan mamunyai talinga biaklah mandonge apa nan dikataen Roh kapada jemaat-jemaat."