(Tujuh Cawan nan Baisi Murka Allah) ¹ Lalu, aku mandonge sabuah suara nan koas dai dalam Bait Allah nan bakata kapada katujuh malaikat, "Pogilah dan tumpahenlah katujuh cawan murka Allah otou ka bumi." ² Malaikat patama pogi dan manumpahen cawannyeh ka bumi, maka muncullah bisul nan manjijien dan manyakiten pada urang-urang nan mamokei tanda binatang otou dan nan manyembah patungnyeh. ³ Malaikat kadua manumpahen cawannyeh ka laut, maka laut baubah manjadi darah, sapaeti darah urang mati; dan samua nan hidup di dalamnyeh pun mati. ⁴ Malaikat katiga manumpahen cawannyeh ka sungai-sungai dan mata-mata ayek, dan samuanyeh manjadi darah. ⁵ Lalu, aku mandonge malaikat nan bakuasa atas ayek bakata, "Kamu adil, ya Nan Suci, nan ada dan sudah ada kaena Kamu manghakimi samua ikok. ⁶ Sebab, mareka tolah manumpahen darah umat-Mu nan suci dan darah nabi-nabi-Mu, topi Kamu mambagien mareka darah untu diminum. Mareka pantas manarimanyeh." ⁷ Dan, aku mandonge altar bakata, "Ya, Tuhan, Allah Nan Mahakuasa, bone dan adillah panghakiman-Mu." ⁸ Malaikat kaempat manumpahen cangkenyeh ka atas matahai, maka matahai dibagien kuasa untu manghangusen manusia dengan api. ⁹ Manusia dihangusen oleh panas nan lue biasa, topi mareka manghujat nama Allah nan mamunyai kuasa atas samua bencana ikok. Mareka idak mau batobat dan mamuliaen Allah. ¹⁰ Malaikat kalima manumpahen cangkenyeh ka atas tahta binatang otou, maka karajaennyeh manjadi gelap; dan mareka manggigit lidah mareka kaena kasakitan, ¹¹ dan manghujat Allah nan di saruga kaena rasa sakit dan bisul-bisul mareka; topi mareka idak batobat dai pabuaten-pabuaten mareka. ¹² Malaikat kaenam manumpahen cangkenyeh ka muaro bose, yaitu Efrat, maka ayeknyeh manjadi koing untu mampasiapen jalan bagi raja-raja dai Timur. ¹³ Lalu, aku mandang dai mulut naga, dai mulut binatang otou, dan dai mulut nabi palsu kalue tiga roh najis nan tampak sapaeti katak, ¹⁴ kaena mareka adalah roh-roh jahat, nan mangadaen tanda-tanda ajaib, nan pogi kapada raja-raja di bumi untu mangumpulen mareka untu manghadapi paperangen pada hai bose, yaitu hai Allah, Nan Mahakuasa. ¹⁵ ("Pandanglah! Aku tiba sapaeti pamaling. Diberkatilah urang nan totap tajaga dan mamalihara pokeiennyeh sahingga dia idak nak bajalan dengan talanjang dan urang-urang idak mandang kamaluennyeh") ¹⁶ Kamudien, roh-roh jahat otou mangumpulen mareka di tompat nan dalam bahasa Ibrani disobut Harmagedon. ¹⁷ Malaikat katujuh manumpahen cawannyeh ka udara, maka tadongelah suara nan koas dai dalam Bait Allah, dai tahta otou bakata, "Sudah Salosei." ¹⁸ Dan, tampaklah kilat nan manyambar-manyambar, suara dan gemuruh potus, dan gempa bumu nan hebat, sapaeti nan bolum paenah tajadi sejak manusia ada di atas bumi, sangat dasyat gempa otou. ¹⁹ Kota bose otou tabelah manjadi tiga bagian; dan Babel nan bose otou idak dilupaen Allah untu mambagien kapadanye cangke anggur murka-Nyeh nan maluap-luap. ²⁰ Satiap pulau lenyap dan gunung-gunung idak ditemuen. ²¹ Hujan es nan bose, kira-kira saboat 1 talenta, jatuh dai langit manimpa manusia; topi manusia manghujat Allah kaena bencana hujan es otou. Sebab, bencana otou baitu mangerien.